ரேசன் கடையில் ஒரு இஞ்சினியரிங் மாணவி ...

சாமானிய டைரி 5:

இஞ்சினியரிங் மாணவி ஒருத்தரின் அம்மா என்னிடம் தொலைபேசியை வாங்கி அழைத்தார் ... "சாமி, கடைலதான் இருக்கியா?.. இன்னைக்கு என்ன பொருள் போடறாங்க?" "கூட்டம் அதிகமாத்தான் இருக்கும், வாங்காம திரும்பிடாத"

ரேசன் கடையில், கூட்டத்தின் இடையே அந்தப் பெண் காத்திருந்தது சொல்லாமலே விளங்கியது. "பச்சரிசி போட்டா வாங்கிக்கோ" என்றபடி அழைப்பைத் துண்டித்தார்.

நியாயவிலைக் கடையில் குறைந்த விலையில் பொருட்கள் கொடுப்பதற்கு சில ஆயிரம் கோடிகளை அரசு செலவிடுகிறது. தமிழக மக்கள் அந்த சேவையை பெரும்பாலும் பயன்படுத்துகிறார்கள். ஓரளவு வருமானம் வரும் குடும்பத்தினருக்கு ரேசன் பொருட்களால், சேமிக்க வழி கிடைகிறது. ஏழைக் குடும்பங்களோ பசியிலிருந்து தப்பி, அவசியமான பிற செலவுகளை மேற்கொள்கிறார்கள்.

அந்த மாணவியின் கல்வி இஞ்சினியரிங் வரை தடையில்லாமல் தொடர்ந்ததற்கு - போசாக்கான உணவு கிடைக்கவும், பொருளாதாரம் காக்கப்படவும் வழிவகுக்கும் இப்படிப்பட்ட திட்டங்கள் ஒரு காரணம். அன்றாடத் தேவைகளுக்கு கடன் வாங்க வேண்டியில்லாத நிலையில்தானே நம்மால் பிற செலவுகளைப் பற்றி சிந்திக்க முடியும்.

ஆண்டுக்கு 5 லட்சம் கோடி மிகப்பெரும் நிறுவனங்களுக்கு சலுகையாக, வரித் தள்ளுபடியாக கொடுப்பதால் விளைந்த நன்மைகளை விட. சில 10 ஆயிரம் கோடிகளில் செயல்படுத்தப்படும் இத்தகைய திட்டங்கள் விளைவித்த நன்மைகள் ஏராளம்.

அந்தப் பெண் குழந்தை காத்திருக்கிறாள். அவளுக்குத் தெரியும், தன் குடும்பத்துக்கும், எதிர்காலத்துக்குமான உழைப்பு இதுவென்று.

உயிர் இருப்பது வீழாது ...

சாமானிய டைரி 4:

திருமணமான அந்தத் தோழி பல மாதங்களுக்குப் பின் என்னை அழைத்தாள். "நேற்று எதிர்பாராத நேரத்தில், முன்பின் அறிமுகமில்லாதவரிடமிருந்து ஒரு பாராட்டுக் கிடைத்தது. இப்போதுவரை அவரையே நினைத்துக் கொண்டிருக்கிறேன்" என்றார்.

சுய சிந்தனையுடைய பெண் அவள், அவளே தொடர்ந்தால் "சின்ன அங்கீகாரம் கூட இவ்ளோ சந்தோச்சம் கொடுக்குது ... ஏன் தெரியுமா?. நம்ம குடும்ப அமைப்பு, பாராட்டு நிறைந்ததாவும், மகிழ்ச்சி கொடுப்பதாவும் இல்ல."

பின் கொஞ்சம் புலம்பினாள், "நான் என் சுயத்தை இழக்காம இருப்பதே ஒரு போரட்டமா இருக்கு. 25 வயசுக்குள்ள நம்ம வாழ்க்கை முடிஞ்சிட்டா என்ன"

இந்தியக் குடும்பங்கள் அழியுதேனு பலரும் பேசராங்க. தினமும் எத்தனையோ செய்திகள் படிக்குறோம். "அதுக்குள்ள என்ன உயிர் இருக்கு? உயிர் இல்லாவிட்டால் அது அழியத்தான செய்யும்?"

சக மனிதர்கள், நேசத்தை பரஸ்பரம் வெளிப்படுத்தும் இடமாக இல்லாத குடும்பம், ஒருவர் மீது இன்னொருவர் ஆதிக்கம் செலுத்தும் இடமாக இருப்பது அதன் பலவீனம்.

அவள் ஆதிக்கத்தின் பால் வெறுப்புற்றிருந்தாள், திணிக்கப்பட்ட கடமைகளை வெறுத்தாள், இந்த நிலையை மாற்ற முடியும் என்ற நம்பிக்கைதான் அவளுக்கு உயிராக இருந்தது.

உயிர் இருக்கிற எதுவும் வீழாது ...

சாக்கடையில் விழுகும் பந்துகள் ...

சாமானிய டைரி 3:

ஒரு பிராமண நண்பருடன் விவாதித்துக் கொண்டிருந்தேன். ஆம் நான் பேசும்போது அவர் பிராமணராக நான் என்னை உயர்வாக நினைத்துக் கொள்வதில் என்ன தவறு ? என்ற எண்ணத்தில்தான் இருந்தார். இத்தனைக்கும் அவர் ஒரு நடுத்தர வர்கம், ஒரு நிர்வாகத்துக்கு பணிந்து வேலை செய்பவரும் கூட.

நான் சாதிப் படிநிலைகள், படிநிலைகளைப் பாதுகாக்கும் தீட்டு, தீண்டாமை, அகமண முறை உள்ளிட்ட கற்பிதங்களை விளக்கினேன். அப்போது அவர் எனக்கு ஒரு உதாரணம் சொன்னார். "சிறு வயதில் நான் கிரிக்கெட் விளையாடுவேன். பந்து சாக்கடைக்குள் விழுந்துவிட்டால், நான் ஒதுங்கி நின்றுகொண்டு, என் நண்பனை எடுக்கச் சொல்வேன். என் கை அழுக்காகாமல், விளையாட்டும் தொடரும்... இது என் இயல்பு." என்று சொன்னவர் - அந்த சாமர்த்தியத்தில் என்ன தவறு என்று கேட்டார்.

நான் என் கிரிக்கெட் விளையாட்டு அனுபவத்தைச் சொன்னேன், "நாங்கள் ஆளுக்கு ஒரு குச்சியை எடுப்போம். பந்துக்கு முட்டுக் கொடுத்து, மெதுவாக சாக்கடையிலிருந்து வெளியே எடுப்போம். புல் மேட்டில் உருட்டி அதன் சகதியை அகற்றுவோம். பின் கொஞ்சம் தண்ணீர் விட்டு, பந்தை சுத்தமாக்கி எல்லோரும் விளையாடுவோம். கூட்டு உழைப்பின் மகத்துவத்தால் எங்கள் பிரச்சனை தீர்ந்தது. யாரும் அங்கே ஏமாளியில்லை" என்று சொன்னேன்.

சுயநல சிந்தனையின் அடிப்படையில் தீர்வுகளை அணுகும்போது, அல்பமான தீர்வுகளே கிடைக்கின்றன. அதுவே தனித் தனித் தீவுகளாக மனிதர்களை மாற்றுகிறது. இன்றைக்கு நாம் பின்தங்கியதொரு சமூகமாக இருக்கிறோம்.

இணைந்த கரங்களின் வலுவே, உலகத்தின் உன்னதம் ...

இது குடும்பங்களின் பிரச்சனை ...

சாமானிய டைரி 2:

நேற்று Dhamayanthi பகிர்ந்திருந்த ஒரு சம்பவம் மனதை பாதித்தது ...

ஈக்காட்டுத்தாங்கல், ஆம்வே பக்கம் ஒரு பெண் ஸ்கூட்டியில் அவளோடு ஒரு ஆண் பேசியபடி இருந்தான். சடாரென, அந்தப் பெண்ணை அவன் வாகனத்திலிருந்து இழுத்து கீழே எறிந்தான். பக்கத்தில் மெட்ரோ வேலைக்காக தோண்டப்பட்ட கல்/ மண் குவிந்த இடத்தில் ஒரு பந்து மாதிரி தெறித்து விழுந்தாள்.

உடனே அக்கம் பக்கம் இருந்தவர்கள் என்னவென்று அவனை நெருங்க ...
"Family பிரச்னை..நீங்க போங்க ..."
அந்தப் பெண் நெஞ்சைப் பிடித்தபடி வண்டியில் அமர்ந்து
“என் Husband தான்... ஷாப்பிங் போலாம்னு கூப்பிட்டேன். அவர் ப்ரெண்டோடப் போயிட்டு இப்ப தான் வந்தார். ஏன்னு கேட்டேன்... அதனால சண்டை" என்றபடி அவர் கண்களில் நீர் ததும்பியது.

இதைப் பார்த்த அவன் மமதையுடன் “என்ன சீன் போடுற என்று முறைத்தான்." தமயந்தி அவனை திட்ட தொடங்கியதும், அந்தப் பெண் “வுட்டுருங்க... அவர் இன்னும் அடிப்பார்”என்று தணிந்த குரலில் சொன்னது.
----

இந்த ஒரு சம்பவத்தில் பின்னணியை ஆராய்ந்து தீர்ப்புச் சொல்வது நம் வேலையல்ல. ஆனால், சக மனிதர்களுக்குள்ளான பிணக்குகளை தீர்க்கும் ஜனநாயக வழிமுறைகளில் எதுவும், தன் மனைவிக்கு பொருந்தாது என்ற மனநிலையை அந்த ஆணிடம் காண முடிந்தது.

ஆளுமை நிறைந்தவர் என்பதை, உடல் வலிமையும், ஆதிக்கமும் முடிவு செய்வதில்லை. மாறாக நமக்காக கவலைகொள்ள எத்தனை மனிதர்களைப் பெற்றிருக்கிறோம் என்பதுதான் நம் ஆளுமையை உருவாக்குகிறது.

சிறியோரை இகழ்தல் இலம் என்ற புறநானூற்றுப் பாடல் நினைவுக்கு வருகிறது. சக மனிதனின் சுய உணர்வுகளை எத்தனை காயப்படுத்துகிறோமோ, அத்தனை கீழான நிலைக்கு நாம் நம்மை உட்படுத்திக் கொள்கிறோம். உயர்வு நம்மிலிருந்து தொடங்கட்டும்.

என்ன வகையான அமைதி இது?

இந்தியாவின் அரசமைப்புச் சட்டம் அவமானப் படுத்தப்பட்டுள்ளது. உரிமைகள் நசுக்கப்படுகின்றன. யாரும் கொதிப்படைந்ததாகத் தெரியவில்லை.

சிதம்பரம் அருகே வடக்கு மாங்குடி கிராமத்தில் தலித் கிராமத்தினர் தங்கல் விருப்பப்படி வாக்களித்தனர். எங்கள் ஓட்டு யாருக்கு என தீர்மானிப்பது எங்கள் உரிமை என்று சொல்லிய குற்றத்துக்காக அவர்களின் சொத்துக்கள் சுரையாடப் பட்டுள்ளன. அடித்து நொறுக்கப்பட்ட மக்கள் கதறியபடி தெருவுக்கு வந்து போராடுகிறார்கள். தாக்கியவர்கள் சாதி வெறி ஊட்டப்பட்டவர்கள். நிதானித்து சிந்திக்கும் எந்த சாதி மனிதனும், இது மனித குலத்திலிருந்து ஒதுக்கப்படவேண்டிய மனநிலை என்று உரக்கப் பேசுவான். மார்க்சிஸ்ட் எம்.எல்.ஏ பாலகிருஷ்ணன் உடனே அங்கு சென்று சேர்ந்தது ஆறுதல். ஆனால் இந்த சம்பவத்தைக் கண்டு தமிழகம் கொதித்தெழவில்லை. அமைதி நிலவுகிறது.

**

 25 ஆம் தேதிக்குள் இந்த வழக்கு முடிவுக்கு வரும் என நீதிபதி சதாசிவம் அறிவித்தார். உடனே குஜராத்திலிருந்து பிரவீன் தொகாடியா ஒரு சர்ச்சைக்குரிய பேச்சை வெளியிட்டார். முஸ்லிம்களின் சொத்துக்களை சூரையாட வேண்டும் என அமைந்திருந்த அந்த பேச்சில் 'ராஜிவ் கொலையாளிகளே விடுதலை பெறப் போகிறார்கள்' என்ற வாசகம் இடம்பெற்றது தற்செயல் அல்ல.

மனிதநேயம் பேசி, மரண தண்டனைக்கு எதிராக இருப்பதாக காட்டிக் கொள்ளும் வைகோ போன்றோர் அந்த இந்துத்துவக் கூச்சலை மெளனமாகவே கடந்து சென்றனர். இப்போது, இந்த சாதி வெறித் தாண்டவம் குறித்தும் கள்ள மெளனம் நிலவுவது - என்னவகையான மனநிலை??

 **

 தமிழுணர்வாளர் என்ற போர்வையில், எத்தகைய அயோக்கியத்தனத்திற்கும் துணை போகிறவர்கள் ஒரு பக்கம் இருக்க. தந்தை பெரியார் பிறந்த இந்த மண்ணில் சாதி வெறி தாண்டவமாடுவதும். சுரணையற்றவர்களாக தமிழினம் மாற்றப்படுவதும் அனுமதிக்கக் கூடிய ஒன்றா?? ‪

#‎மனிதனே‬ விழித்தெழு...

 ‪#‎சாதி‬ I ‪#‎வன்முறை‬ I ‪#‎தலித்‬ I Sindhan Ra I ‪#‎Caste‬ I ‪#‎Dalith‬

வாக்குப்பதிவு நாள் ...

8 மணி வரை தூங்கிக் கொண்டிருந்த பெண்ணை எழுப்பி ... "கூட்டம் குறைவா இருக்காம். வாங்க போலாம்" என எழுப்பிக் கொண்டிருந்தார் ஒரு அம்மா.

நேற்று நள்ளிரவில் ஒரு நண்பர் என்னை அழைத்தார். பாரம்பரியமாக திராவிட இயக்க குடும்பம் அவருடையது. இருந்தாலும், அவருக்கு பெரிய அரசியல் ஞானமெல்லாம் இல்லை. இந்த முறை யாருக்கு வாக்களிப்பது? என்ற குழப்பம் வேறு. வெகுநேரம் பேசிக் கொண்டிருந்தோம். யாருக்கு வாக்களிப்பது என்பதை விட, இனி நான் அரசியலில் பங்களிப்பை செலுத்த வேண்டும் என்ற உறுதியுடன் எங்கள் உரையாடல் முடிந்தது.

நான் காலையிலேயே வாக்குப்பதிவு மையத்துக்கு சென்றுவிட்டேன். நீண்ட வரிசையில், சிரித்த முகங்களுடன் மக்கள் காத்திருந்தார்கள். ஜனநாயகத்தில் தானும் ஒரு பங்களிப்பை செலுத்தப் போகிறோம் என்ற எண்ணம் வலுவாக தெரிந்தது. ஓட்டு எந்திரத்திற்கு சென்றதும் பட்டனை அமுக்கிவிட்டு அகன்றுவிட்டேன்.

வெளியே வந்த பிறகு, இரண்டு நிமிடங்கள் நின்று எல்லா பட்டனையும் கவனித்திருக்கலாமோ என்று தோன்றியது. சில நிமிடங்கள் அங்கே நின்றுகொண்டிருந்தேன். வாக்குரிமை பெற்ற தன் மனைவியை அனுப்பிவிட்டு, குழந்தையோடு காத்திருந்தார் என் நண்பர். அவருக்கு வாக்கு இல்லை. வாக்கு இருந்தும் சொந்த ஊருக்கு சென்று பதிய முடியாத 5 பேரை சந்தித்தேன்.

ஒரு தேசத்தின் திசைவழியை தேர்ந்தெடுக்க தனக்கு அளிக்கப்படும் வாய்ப்பை ஒவ்வொரு குடிமகனும் நேசிக்கிறார். நாம் தேர்ந்தெடுத்தவர் சிலர் ஊழல் செய்கின்றனர். சிலர் நமக்கே விரோதமான சட்டங்களை கொண்டுவருகின்றனர். இவர்களை திரும்ப அழைக்க நமக்கு உரிமையில்லை. விலைபோகிறவர்கள், அயோக்கியர்களை நாம் வெறுக்கிறோம். இந்த நேரத்தில் வாய்ப்பிருப்பவர்கள் ஆனந்த் டெல்டும்ப்டே எழுதிய (http://bit.ly/1rnfCuc)

இந்தக் கட்டுரையை வாசித்தும் பார்ப்பது உதவியாக இருக்கும். இதையெல்லாம் மாற்ற வேண்டும் என்பதுடன், கிடைத்திருக்கும் குறைந்த அதிகாரத்தை தன்னளவில் நேர்மையுடன் பயன்படுத்த வேண்டும் என்ற உணர்வு மக்களுக்கு இருக்கிறது. உண்மையிலேயே, நாம் நமக்காக பெருமைப்பட வேண்டும். ‪

#‎Vote‬ I ‪#‎Election‬ I Sindhan Ra I ‪#‎Reforms‬ I ‪#‎India‬

நீர் நம் உயிர் ...

மு.க.ஸ்டாலின் தேர்தல் பிரச்சாரத்தில் முன்வைத்த முழக்கங்களில் ஒன்று குடிநீரை அரசாங்கம் விற்பனை செய்கிறது என்பதாகும்.

இன்று தோழர் லீலாவதி நினைவுதினம். தண்ணீர் வியாபாரிகளுக்கும் பிற சமூக விரோதிகளுக்கும் எதிராக களத்தில் போராடியவர். அவரை கொடூரமாக படுகொலை செய்த வழக்கில் கைதான திமுகவினர் இதுவரை தண்டிக்கப்படவில்லை.

குடிநீரை வியாபாரப் பொருளாக்குவது சர்வதேச நிதியத்தின் திட்டங்களில் ஒன்று. உலகமயக் கொள்கைகளை விசுவாசத்தோடு கடைபிடிக்கும் திமுக, அதிமுக ஆட்சிகளில் நமது நீராதாரங்கள் சீரழிக்கப்பட்டன.

 அதன் காரணமாக குடிநீர் ஒரு விற்பனைப் பொருளாக மாற்றப்பட்டது. இந்தியாவிலேயே "திருப்பூர் 3 வது குடிநீர் திட்டம்" மட்டும் தனியாரால் நிறைவேற்றப்படும் குடிநீர் திட்டம். குடிநீர் வடிகால் வாரியம் 4 ரூபாய்க்கு கொடுக்கும் தண்ணீரை இந்த நிறுவனம் 26 ரூபாய்க்கு விற்பனை செய்கிறது. அதிமுக ஆட்சியில் கொண்டுவரப்பட்ட இந்த திட்டத்தை திமுகவும் ஊக்குவித்தது.

எல்லா மெட்ரோ நகரங்களிலும் குடிநீர் விற்பனை தொடர்கிறது. இது அதிகரித்தும் வருகிறது. இந்த நிலை மாற்ற வேண்டுமானால், நமது நீராதாரங்கள் பாதுகாக்கப்பட வேண்டும், மணல் கொள்ளை உள்ளிட்ட கனிம சுரண்டல் தடுக்கப்பட வேண்டும்.

தொழிற்சாலைகளுக்கு சுற்றுச் சூழல் விதிகளை கடுமையாக அமலாக்க வேண்டும். அரசு இலவசமாக வழங்கும் குடிநீரின் தரத்தை அதிகரிக்க வேண்டும். மாறாக, தண்ணீர் பாட்டில் விற்பனையை கட்டுக்குள் கொண்டுவர முடியாமல். அரசே குறைந்த விலை குடிநீரை கொடுப்பதென்பது தற்காலிக ஏற்பாடுதான்.

தேர்தலுக்கு பின்னர் குடிநீர் உரிமையை பாதுகாக்கவும், மக்களுக்கு இலவசமாக சுத்திகரித்த நீர் கிடைக்கவும் திமுக போராடுமா?. ஸ்டாலினுக்கு அப்படிப்பட்ட உறுதி இருக்கிறதா?. இல்லை என்றே படுகிறது. அவரைப் பொருத்தமட்டில் இதுவொரு தேர்தல் ஆயுதம். மக்களுக்கு வாழ்க்கைப் போராட்டம்.

#Stalin I #DMK I #Water I #LPG I Sindhan Ra I #Privatisation

நோட்டா: ஒரு அதிர்ச்சிகரமான தகவல் ...

Sindhan Ra

களத்தில் நிற்கும் எந்த வேட்பாளரும் இல்லை என்ற வாய்ப்பு இந்தத் தேர்தலில் அறிமுகப்படுத்தப்பட்டுள்ளதை நாம் அறிவோம். கடைசியாக தேர்தல் நடைபெற்ற 5 மாநில சட்டசபைத் தேர்ல்களில் (மத்திய பிரதேசம், ராஜஸ்தான், சதீஸ்கர், தில்லி, மிசோரம்) 'நோட்டா' பதிவான தொகுதிகள் குறித்த ஆய்வு செய்யப்பட்டுள்ளது.
கிரிமினல் வேட்பாளர்கள், வன்முறையாளர்களுக்கு எதிராக இந்த வசதி பயன்படுத்தப்பட்டிருக்கும் என்பது பொதுவான எதிர்பார்ப்பு.
ஆனால், நோட்டா - அதிகம் பயன்படுத்தப்பட்ட 25 தொகுதிகளில் 1 மட்டுமே பொது தொகுதியாக இருந்திருக்கிறது. 50இல் 5 தொகுதிகள் பொது தொகுதிகள். மற்ற தொகுதிகள் அனைத்தும் தாழ்த்தப்பட்ட/பழங்குடியினருக்கு ஒதுக்கப்பட்ட தொகுதிகள்.
வேட்பாளரை நிராகரித்தவர்கள் அதிகம் உள்ள 100 தொகுதிகளில் 3 இல் 2 பங்கு தாழ்த்தப்பட்டோர்/பழங்குடியினருக்கான தொகுதிகள். சத்திஸ்கர், மத்திய பிரதேசம் மற்றும் ராஜஸ்தானில் இந்த நடைமுறை அதிகமாக இருந்திருக்கிறது (The Hinduசெய்தி: http://bit.ly/1fjmnWL )
நோட்டா வாய்ப்பும் தலித், பழங்குடியினருக்கு எதிரான வன்கொடுமை/தீண்டாமைக் கருவியாக்கப்பட்டுள்ளது அதிர்ச்சியளிக்கிறது.
--
காங்கிரஸ், பாஜக மட்டுமே வலுவாக உள்ள இந்த மாநிலங்களில் சாதிப் பஞ்சாயத்துகளின் ஆதிக்கமும் அதிகம் என்பதை வைத்துப் பார்க்கும்போது நம்மால் சாதி அடிப்படையில் வேட்பாளர்கள் நிராகரிக்கப்படுவதன் அடிப்படையை புரிந்துகொள்ள முடிகிறது.
தமிழகம், கேரளம் மாநிலங்களில் என்ன போக்கு தென்படுகிறது என்பதை காத்திருந்துதான் பார்க்க முடியும். ஆனால், நிச்சயம் இந்த விசயத்தில் தெற்கு தன்னை வேறு படுத்திக் காட்ட வேண்டும்.
I ‪#‎NOTA‬ I ‪#‎Election‬ I ‪#‎SocialJustice‬ I Sindhan Ra I ‪#‎BJP‬ I ‪#‎INC‬

Fixed Interview களும்: செய்தியாளர்களின் மனசாட்சியும் ...

நரேந்திர மோடிக்கு தோதான கேள்விகளை மட்டும் கேட்டு நடத்திய நேர்காணல் இந்தியா தொலைக்காட்சியில் வெளியானது மனம் ஒவ்வாத அந்த ஆசிரியர் தனது வேலையை ராஜினாமா செய்துவிட்டார்.

பொதுவாக எனது ஊடக நண்பர்கள் பலரும் தங்கள் நிர்வாகம் பாஜகவுக்கு ஆதரவாகவோ, குறைவாக விமர்சிக்கும்படியோ 'வழிகாட்டுதல்' கொடுப்பதை தெரிவித்திருக்கிறார்கள். ஒவ்வொரு ஊடகத்துக்கும், அதன் நிர்வாகம் சார்ந்து சில சார்புகள் இருக்கவே செய்கின்றன. ஆனால் யாரும் வேலையை ராஜினாமா செய்ததில்லை. அது சாத்தியமும் இல்லை.

இந்திய ஊடகத் துறையில் மரியாதையான சம்பளமும், நிரந்தர வேலையும் எட்டாக் கனியாக உள்ள இந்த சூழலில், அவர்களால் எந்த எதிர்ப்பும் காட்ட முடியாதுதான்.

The Hindu அலுவலகத்தில் மாமிசம் சாப்பிடுவதற்கு விதிக்கப்பட்ட தடையையே எடுத்துக் கொள்வோமே. அங்கு ஒரு தொழிற்சங்கத்துக்கு வேறு அனுமதி இருக்கிறது. ஆனாலும், இப்படிப்பட்ட மனித உரிமை மீறல் உத்தரவுகளை எதிர்த்து என்ன குரல் எழுந்துவிட்டது??

ஒரு சாமானியனின் சிந்தனையில் செலுத்தப்படும் சுரண்டலானது, அவர் உடல் உழைப்பை திருடுவதை விடவும் கொடுமையானது. இந்த சுரண்டல்தான் ஆரோக்கியமான அறிவுச் சூழலை மாசுபடுத்தும் "முன் முடிவாக்கப்பட்ட செய்திகள்" "காசுக்கு எழுதப்படும் செய்திகள்" "மறைக்கப்படும், அல்லது கவனம் குறைக்கப்படும் செய்திகள்" உள்ளிட்டவைக்கு காரணமாக அமைகிறது.

ஊடகங்களிடமிருந்து கருத்து சுதந்திரத்தை மீட்க வேண்டியதன் தேவை அதிகரிக்கிறது. இப்போதைக்கு அந்த ஆசிரியரை வாழ்த்துவோம்.

முழுமையற்ற ஜனநாயகமும், மக்களும் ...

நேற்று சாலையோரக் கடை ஒன்றில், நின்றபடி சாப்பிட்டுக் கொண்டிருந்தேன். கடைக்காரரின் நண்பர் அங்கிருந்து கிளம்பிக் கொண்டிருந்தார். அவரிடம் ஓடிச் சென்ற கடைக்காரர், மறக்காம 'கதிர் அரிவாளுக்கு' ஓட்டுப்போட்டுடுங்க என்று கேட்டுவிட்டு, காத்திருந்த வாடிக்கையாளர்களுக்கு உணவு கொடுக்கத் தொடங்கினார்.

காலையில் ஒரு எஸ்.எம்.எஸ் வந்திருந்தது "நமது வேட்பாளர் இ.வி.கே.எஸ் இளங்கோவன். நமது சின்னம் கை. காங்கிரசுக்கு வாக்களிப்பீர்" என்று கேட்டது.

வீட்டை விட்டு வெளியே வந்தால் "ஆம் ஆத்மி" கட்சியின் வண்டி துடைப்பத்தோடு வந்தது. வெள்ளைக் குள்ளா அணிந்தவருடன் ஒரு டிப்டாப் இளைஞர் குலைந்து குலைந்து பேசிக் கொண்டிருந்தார். அனேகமாக ஆம் ஆத்மி மீது ஈர்ப்படைந்தவராக இருக்க வேண்டும். தொலைபேசியில் அவர்களின் எண்களைக் குறித்தபடி நகர்ந்தார்.

பிரச்சார வாகனத்தின் பதிவு செய்யப்பட்ட குரல் என்னை கடந்து சென்றது. "முரசு முரசு" என்ற பாடல் ஒலிக்க, "குஜராத்தை மிகச் சிறந்த மாநிலமாக மாற்றிய மகான் மோடியின் தலைமையில் இந்தியா" என அது உச்ச குரலில் வாக்குக்களைக் கேட்டது.

திமுகவினரும், அதிமுகவினரும் கிராமப்புறங்களில் தங்கள் கவனத்தை குவித்திருக்கிறார்கள். நகர மையத்தில் குஷ்புவும் வந்துவிட்டார். பாத்திமாபாபுவும் வந்துவிட்டார். நாம் தமிழர் கட்சியின் 'சீமான்' வேறு 2016 இல் நாங்கள் சட்டமன்றத்தில் போட்டியிடுவோம், இப்பொது இரட்டை இலைக்கு வாக்களியுங்கள் என பேசிச் சென்றிருக்கிறார். இன்னும் சுயேட்சைகள், வெற்றிபெருவோம் என்ற நம்பிக்கையில்தான் களம் காண்கிறார்கள்.

சூரியன் சுட்டெரிக்க, நிற்காமல் ஓடுகிறார்கள் ஒவ்வொருவரும். திடீர் மவுசு மக்களுக்கு புதிதில்லை. மெளனம் பழகுகிறார்கள். அன்றாட வேலைகளில் எதுவும் நிற்கவில்லை. தேர்ந்தெடுக்கும் உரிமையைப் போல், திரும்பப் பெரும் உரிமை இல்லாத ஜனநாயகம்! நம்முடையது. குறைகள் நிறைந்த நம் தேர்தல் முறையை தெளிவாகவே கையாள்கிறார்கள் என்றுதான் சொல்ல வேண்டும்.

கெஜ்ரிவால் அரசியல் - சாமனியனின் ஜனநாயக தாகம் !

தன்னை அடித்த ஆட்டோக்காரரை சந்தித்து பூங்கொத்து கொடுத்திருக்கிறார். மேலும், என்னை ஏன் அடித்தீர்கள்? என்று காரணத்தை விசாரிக்க, அந்த ஆட்டோ டிரைவருக்கு அழுகையே வந்துவிட்டது. அரவிந் கெஜ்ரிவாலின் இந்த நடவடிக்கை வரவேற்புக்கு உரியது.

இதனை தேர்தல் ஸ்டன்ட் என்று சொல்லிவிடலாம். ஏற்கனவே இடதுசாரிகள் எளிமையாகவும், மக்களுக்கு நெருக்கமாகவும் இருக்கிறார்களே இவர்கள் மட்டும் எளியவர்கள் இல்லை என்றும் சொல்லலாம். ஆனால், அது சரியான விமர்சனம் அல்ல.

தில்லி மெட்ரோ சானல் அளவுக்கே விசாலப் பார்வை கொண்ட ஊடகங்களின் தேசிய செய்தியாளர்களின் கவனத்தை அவர்கள் பெற்றிருக்கிறார்கள் என்பது உண்மைதான். முழுமையான கொள்கை சார்ந்த மாற்று சக்தியாக அவர்கள் இல்லாமல் இருக்கலாம். ஆனால் அதனைத் தாண்டியும் இந்தப் பிரச்சனையை வேறு ஒரு கோணத்தில் பார்ப்பது அவசியம்.

ஆம் ஆத்மிக்கு செல்வாக்கு வளரும் பகுதிகளான தில்லி, ஹரியானா, சத்தீஸ்கர் உள்ளிட்ட வட மாநிலங்களில் காங்கிரஸ் - பாஜக மட்டுமே உள்ளன. இந்தக் கட்சிகள் பெரு முதலாளிகளின் ஏஜெண்டுகளாக மாறிவிட்டதால், பிராந்திய மக்களின் உணர்வுகளையோ, ஏழை நடுத்தர, சாமானிய மக்களின் மெய்யான பிரச்சனைகளையோ பேசுவதில்லை. நாங்கள்தான் ஆள்வோம் என்ற திமிரோடு பவணிவரும் காங்கிரஸ் - பாஜக கொள்கை சார் விவாதத்தை ஏற்படுத்தவும் தயாரில்லை.

இந்த நிலையில், ஒருபக்கம் இடதுசாரிகளுக்கும், மாநிலக் கட்சிகளுக்கும் - மாநிலக் கட்சிகள் இல்லாத இடங்களில் ஆம் ஆத்மிக்கும் செல்வாக்கு உருவாகிறது. தேசம் ஒரு முழுமையான ஜனநாயகத்துக்கு ஏங்குவதும்... சாதாரண மக்களை முன்நிறுத்திய விவாதத்தை விரும்புவதும் இதன் மூலம் வெளிப்படுகிறது.

#ஜனநாயகம்வெல்லவேண்டும்

பாஜகவின் அரசியல் - வளர்ச்சியா? பிரிவினையா?

பொதுவாக பாஜக வளர்ச்சி அரசியலுக்கு மாறிவிட்டது என்ற பிரச்சாரம் நடைபெற்றுவருகிறது. இது உண்மையாக இருந்தால் நன்றாக இருக்கும். ஆனால் முஸ்லிம்களுக்கு எதிரான வன்முறையைக் கிளப்புவதையே அதிகாரத்தை பிடிப்பதற்கான தனது ஆயுதமாக பயன்படுத்துவதை பாஜக நிறுத்தவில்லை என்றே தெரிகிறது ...

உத்திரபிரதேசத்தின் "முசாபர் நகர்" பகுதியில் சில மாதங்களுக்கு முன்னர் கலவரங்கள் தூண்டப்பட்டு, ஏராளமானோர் வீடுகளை இழந்து வெளியேறியதை அறிவோம். அதன் பின்னணியாக தவறான வீடியோக்களை திட்டமிட்டு பரப்பிய எம்.எல்.ஏக்கள் கைதாகினர். ஆனால், கிடைத்த சில நாட்களில் சாதிப் பஞ்சாயத்துகளின் வழியே தங்கள் விஷமப் பிரச்சாரத்தைக் கொண்டு சென்று கிராமங்களுக்கு இடையே மோதலை உண்டாக்கினார்கள்.

இந்த நிலையில், அந்த கலவரத்தை எப்படியும் - நாடாளுமன்றத் தேர்தலில் பயன்படுத்தி ஓட்டாக மாற்றிடிவ வேண்டும் என்ற வகையில் பாஜகவும், ஆர்.எஸ்.எஸ் அமைப்பும் தங்கள் தேர்தல் பிரச்சாரத்தை மேற்கொண்டு வருகின்றன. (http://www.ndtv.com/elections/article/election-2014/truth-vs-hype-the-rss-mission-modi-504888)

இந்த நிலையில், பாஜகவின் உத்திர பிரதேச மாநில தேர்தல் பொருப்பாளரும், மோடியின் வலதுகரமும், போலி என்கவுண்டர் மற்றும் அரசே கலவரங்களுக்கு துணைபோன வழக்குகளில் தொடர்புடையவருமான அமித் ஷா ... உ.பி மாநிலத்தின் அப்பாவி மக்களிடையே மேற்கொள்ளும் பிரச்சாரம் அம்பலத்துக்கு வந்திருக்கிறது.

தேர்தல் ஆணையத்திடம் வழங்கப்பட்டுள்ள வீடியோ ஆதாரங்களில் - அவர் இரு மதங்களுக்கு இடையே வெறுப்பை விதைப்பது பதிவாகியுள்ளது. இந்துக்களிடையே அவர் பேசுகிறார் "மேற்கு உ.பியில் நடக்கும் இந்த தேர்தல் நமது கெளரவத்திற்கான தேர்தல், அவமானத்துக்கு பலிதீர்ப்பதற்கும், அநீதி இழைத்தோருக்கு பாடம் புகட்டுவதற்குமான தேர்தல்" "இது மற்றுமொரு தேர்தல் அல்ல. நமது சமூகத்துக்கு இழைக்கப்பட்ட அவமானத்துக்கு நாம் பலியெடுக்க வேண்டும்." என தொடர்ந்து பேசிவருகிறார்.

அப்பாவிகளை பலிகடாவாக்கும் அரசியல் ஒதுக்கப்பட வேண்டும்.

#ஒதுக்குவோம்!

பாபர் மசூதி இடிப்பு : சில அதிர்ச்சித் தகவல்கள் ...

பாபர் மசூதி இடிக்கப்பட்ட தினம் குறித்து - பாஜக தலைவர் அத்வானி "அது என் வாழ்க்கையிலேயே சோகமான தினம்" என்று சொன்னார். இப்போது உண்மை வெளியாகியுள்ளது.

அவர்கள், பலமுறை திட்டமிட்டனர், பாபர் மசூதியை எப்போது இடிக்க வேண்டும், எப்படி இடிக்க வேண்டும் என்று பயிற்சி செய்துதான் இடித்துள்ளனர். அதன் மூலம் அரசியல் அதிகாரத்தைப் பிடிப்பதுதான் அவர்களின் திட்டம்.

முலாயம் சிங் அரசாட்சியில் இருந்தபோது அவர்கள் முதல் முயற்சி செய்தார்கள். முடியவில்லை. எனவே இரண்டாவது முறை திட்டமிட்டார்கள். கல்யாண் சிங் முதல்வராக இருந்தபோது திட்டம் வெற்றியடைந்தது. முன்னாள் பிரதமர் நரசிம்மராவ் நடப்பதை அறிந்திருந்தார்.

குஜராத்தின் சர்கெஜ் பகுதியிலும், அயோத்தியாவின் நீலா டீலா பகுதியிலும் கர சேவர்களுக்கு மாதக் கணக்கில் பயிற்சி கொடுக்கப்பட்டதும். மேலும், கரசேவகர்களை 'தியாகிகளாக" ஆக்குவதற்காக விஹெச்பி அமைப்பின் அசோக் சிங்காலும், பஜ்ரங் தள் அமைப்பின் வினய் காட்டியரும் போலீசாரை துப்பாக்கிச் சூட்டுக்கு தூண்டும் விதத்தில் செயல்பட்டிப்பதும் அதில் வெளியாகியுள்ளது.

பெருமிதத்துடன் இந்து மதவெறியர்கள் தங்கள் சாதனைகளை விளக்குகிறார்கள். அப்பாவிகளின் பிணங்களின் மீது நடந்த அரசியல் கணக்கு வெளியாகிறது.

அறிமுகம்: http://www.cobrapost.com/index.php/video-detail?vid=153

முழுமையான பதிவுகள்: https://www.youtube.com/channel/UCJbGQNou2GBFAi_fnMP2_4A

இந்தியாவுக்கு ஒரு மாற்று தேவை - ஆனால், அது இந்த தரமற்ற நபர்களின் கூட்டமல்ல...

Sindhan Ra

40 லட்சம் ஆதரவு அழைப்புகள்: நாமும் இணைவோம்!

பெண்களுக்கு எதிரான பாலியல் பலாத்கார வன்கொடுமையை வீழ்த்துவோம் என்ற தலைப்பில்#சத்யமேவஜெயதே நிகழ்ச்சியில் அழைப்பு விடப்பட்டது. 40 லட்சம் பேர் அந்த அழைப்புக்கு ஆதரவு கொடுத்துள்ளனர்.

ஒரு தொலைக்காட்சி நிகழ்ச்சியால் இதனைச் செய்ய முடியுமென்றால், நாம் ஒவ்வொருவரும் முயன்றால் அதுவொரு சமூக இயக்கமாகவே ஆகாதா?!

- பெண்களுக்கான அரசியல் அதிகாரத்தை வென்றெடுப்போம்.
(33 சதவீத இட ஒதுக்கீட்டை சட்டமாக்க குரல்கொடுப்போம்)

- சமநீதியுடன் அரசமைப்பை வளர்த்தெடுப்போம்
(காவல்துறை, நீதித்துறை உள்ளிட்ட அமைப்புகளை பாலின பேதமற்றதாக்குவோம். சட்டங்களை அமலாக்குவதில் முனைப்பாக்குவோம்)

- தகுதியான ஆண் பிள்ளைகளை வளர்த்தெடுப்போம்.
(பெண்களை சக மனிதர்களாக கருதும் - மனிதர்களாக, புத்தி புகட்டுவோம்)

- சமூக உணர்வுள்ள படைப்புக்களை ஆதரிப்போம்.
(பெண்களை - கவர்ச்சி உடலாக மட்டும் முன்நிறுத்தும் திரைப்படங்கள், விளம்பரங்கள் மற்றும் கதையாடல்களை எதிர்ப்போம்.

#மகளிர்_தினத்தில் உறுதியெடுப்போம்!

தெகிடி - தொடங்கிவைக்கும் சில தேடல்கள் !

'ஒரு தனிப்பட்ட நபரின் தகவல்களை திரட்டி என்ன செய்துவிட முடியும்??' ... 'எந்தக் குற்றமும் செய்யாத போது உங்களுக்கு ஏன் அச்சம்?' அரசாங்கங்கள் ஒவ்வொரு குடிமகனின் தகவல்களையும் எந்த கட்டுப்பாடுமில்லாமல் திரட்டுவது குறித்த தகவலை எழுதியபோது வந்த கேள்விகள் இவை.

அமெரிக்கா, பிரிட்டன் வரிசையில் இந்தியாவும் உலகம் முழுவதுமுள்ள/தங்கள் சொந்த குடிமக்களதும் தனிநபர் தகவல்களை திரட்டுகின்றன. தொலைபேசி உரையாடல்கள், சேட்டிங் தகவல்கள், இ-மெயில்கள் என எல்லாமும் சேகரமாகின்றன. (இவை அரசுகளின் கைக்கு மட்டுமல்லாது, பல தனியார் நிறுவனங்களின் கைகளுக்கும் செல்கின்றன)

இப்படிப்பட்ட தகவல்களை வைத்து என்னவெல்லாம் செய்ய முடியும் என்பதற்கு ஒரு உதாரணத்தைக் காட்டிக் கொடுக்கிறது 'தெகிடி'. படத்தின் நாயகன் ஒரு துப்பறியும் நிபுணர். அவர் எவ்வாறு பயன்படுத்திக் கொள்ளப்படுகிறார் என்பதுதான் கதை.
----
தனியார் இன்சூரன்ஸ் நிறுவனங்களில் நடக்கும் முறைகேடுகள் தொடர்பாகவும் படம் பேசுகிறது.

ஆனால், ஏதோ சில தனி நபர்கள் அல்ல - நிறுவனங்களே தங்கள் வாடிக்கையாளர்களை எப்படியெல்லாம் சுரண்டுகிறார்கள். குரூப் இன்சூரன்ஸ் பலன்கள் எவ்வாறு அபகரிக்கப்படுகின்றன என்பதையெல்லாம் 'சிக்கோ' என்ற ஆவணப்படம் இன்னும் தெளிவாகக் காட்டும். 

'தெகிடி' ஒரு சுவாரிசியமான கதைப் போக்கில், இப்படியான நல்ல தகவல்களை அறிந்துகொள்ளும் முயற்சியை தொடங்கி வைக்கிறது.

‪#‎A_feel_good_movie‬ ...

நரேந்திர மோடியும் - கற்றல் திறன் மேம்பாட்டு அட்டவணையும் !

கல்வி கற்றல் மற்றும் கற்பித்தல் திறன் குறித்த தேசிய அட்டவணை வெளிவந்துள்ளது. இரண்டு நிறுவனங்கள். ஏ.எஸ்.இ.ஆர் - மற்றும் என்.ஏ.எஸ் நடத்திய இரண்டு வெவ்வேறு ஆய்வுகள் மாநிலங்களின் வளர்ச்சி விகிதங்களைக் காட்டுகின்றன. http://www.thehindu.com/news/national/learning-levels-better-than-thought/article5737894.ece?homepage=true#lb?ref=infograph/0/

நாடு முழுவதும் உள்ள குழந்தைகளில் 85 சதவீதம், சொற்களை சரியாக அடையாளம் காண்கின்றன. மஹாராஷ்ட்ரா, தெற்கின் 4 மாநிலங்கள் திரிபுரா, மிசோரம், மணிப்பூர் ஆகியவை தேசிய சராசரியை விட கூடுதலாக பெற்றுள்ளன.

மொழியறிவில் முதலிடம் திரிபுரா - இரண்டாமிடம் மிசோரம், மூன்றாம் இடத்தில் தமிழகம், கோவா, மே.வங்கம், சிக்கிம் ஆகியவை உள்ளன. (அதிக மக்கள் தொகை கொண்டிருந்தாலும் - தமிழகமும், மே.வங்கமும் இடம்பெற்றுள்ளது மாநிலக் கட்சிகள் மற்றும் இடதுசாரிகளினால் மக்கள் பலன் பெற்றுள்ளதைக் காட்டுகிறது)

கணித அறிவில் தமிழகம், கர்நாடகம் மற்றும் மிசோரம் மாநிலங்கள் முதல் 3 இடங்களில் உள்ளன. சதவீத அடிப்படையில் வாசிப்புத் திறனில் தமிழகம் பின்தங்கியுள்ளது. கேரளம், மிசோரம் இமாச்சல் மாநிலங்கள் முன்னணியில் உள்ளன.

பொதுவாக நகரங்களுக்கும், கிராமங்களுக்கும் இடையே பெரிய வித்தியாசமில்லை. மத்திய பிரதேசத்தில் பெண்கள் நிலை மிக மோசமாக உள்ளது. கேரளத்தில் பெண்கள் நிலை மிகச் சிறப்பாக உள்ளது. பிற மாநிலங்களில் ஆண், பெண் இடையே வித்தியாசமில்லை.

-------------------------

ஒட்டுமொத்த இந்தியாவில் ஒரு மாநிலம் மட்டும் வேறு விதமாக இருக்க முடியாது என்றாலும், ஓரளவு சிறந்த நிர்வாகத்தை மாநிலக் கட்சிகளும், இடதுசாரிகளும் கொடுத்துள்ளனர்.

காங்கிரஸ் ஆளும் மாநிலங்களும் இவ்வட்டவணையில் இடம்பெற்றிருக்க - எப்போதும்போல கற்றல் திறன் அட்டவணையில் குஜராத் இடம்பிடிக்கவில்லை. நரேந்திர மோடி ஒருவேளை மேற்கண்ட மாநிலங்களில் பிறந்திருந்தால் - வரலாறாவது படித்திருக்கலாம்.

ராகுல் - முத்தம் - ஒரு படுகொலை ...

ராகுலுக்கு முத்தமிட்ட பெண் எரித்துக் கொலை ...

சக மனிதனுக்கு முத்தம் கொடுப்பதால் 'கற்பு' ஒழுக்கம் மீறப்படுவதாகக் கருதும் அந்தக் கணவன் - இனி அந்தக் கரிக்கட்டையோடு மட்டுமே படுத்து தன் கற்பொழுக்கத்தைப் பராமரிப்பான் எனில் - தானும் ஒருமுறை தீக்குளித்து, தன் உதடுகளின் தூய்மையை நிரூபிப்பான் எனில் - இந்த சம்பவத்தை நாம் மன்னித்துவிடலாம்.

ஆனால், அது ஒருபோதும் நடக்கப் போவதில்லை.

ஒவ்வொரு மனிதனுக்கும் தான் என்ன செய்ய வேண்டுமென தீர்மானிப்பதற்கான உரிமை, சரியானதைச் செய்வதற்கு மட்டுமல்ல - தவறிழைத்தும் கற்றுக் கொள்வதற்கான உரிமை தரப்படாத சமூகம் - திறந்த வெளிச் சிறையாகவே இருக்கும்.

சிறைச்சாலையின் கதவுகள் திறக்கப்படாமல், ஜனநாயகத்தின் பெருமையைப் பீற்றுவதில், பொருளேதுமில்லை.

இணையத்தால் சாதிக்க முடிந்த ஒரு சிறு வெற்றி!

நாம் மனித நேயம் குறித்து பேசுவதன் வெற்றி - செயலில், செயல்பாட்டில் வெளிப்பட வேண்டும் என்பது என் ஆதங்கம். குறிப்பாக, தீண்டாமை எதிர்ப்பு, தொழிலாளர் உரிமைகள், பெண் விடுதலை உள்ளிட்ட நோக்கில் பேசுகிறவர்கள் - தன் சொந்த வாழ்க்கையிலிருந்து மாற்றத்தைத் தொடங்க வேண்டும்.

துபாய், ஷார்ஜாவில் நாட்டில் பணியாற்றும் Sathish Joe - ஒரு பொறியாளர். அவருக்கு கீழ் 34 தொழிலாளர்கள் உள்ளனர். முதலில் நிறைய பேசுவோம், தொழிலாளர் உரிமைகள் குறித்து எதையாவது செய்ய வேண்டுமென அக்கறையோடு பேசுவார். ஆனால், அங்குள்ள நிலைமை அதற்கு உகந்ததில்லை என்று வருத்தமும் மேலிடும்.

இந்த நிலையில், பேசிப் பேசி சோர்வுற்று - தொடர்பிலிருந்தே காணாமல் போய்விட்டார். சில நாட்கள் முன் அவரிடமிருந்து இணைப்பில் உள்ள புகைப்படம் வந்தது. அவர் பணியாற்றும் பெயின்ட் நிறுவன தொழிலாளர்களுக்கு 'சுவாச' காப்பு கருவி ஏற்பாடு செய்ய நிறுவனத்தில் போராடி பெற்ற அனுபவத்தைச் சொன்னார்.

சதீஸ் குவாலிட்டி கண்ட்ரோலர் - பாதுகாப்பு அதிகாரி இன்னொருத்தர் இருக்கிறார். எனினும் இதுவரை பேப்பர் மாஸ்க் தான் கொடுத்திருக்கிறார்கள். இப்போது கொடுக்கப்பட்டுள்ள மாஸ்க் 600 டாலர்கள் வருமாம். முதலில் இந்த கோரிக்கையை வைத்தவுடன் வந்த எதிர்வினை என்ன தெரியுமா? 'உன் வேலை இது இல்லையே!' என்பதுதான். அவர், இல்லை இதுவும் என் வேலைதான் என விளக்கம் கொடுத்து - இந்த வசதியை பெற்றுக் கொடுத்ததை சொன்னார்.

இந்தியாவிலும் பெரும்பாலான பெயின்ட் அப்ளிகேசன் நிறுவனங்களில் இத்தகைய பாதுகாப்பு இல்லாத நிலையில், தேவையான முன்னேற்றம்தான்.

இப்போது, அந்த தொழிலாளர்களை மாஸ்க் பயன்படுத்தி வேலைபார்க்க பழக்க வேண்டும். ஹெல்மெட் போடுவது போல, அசவுகரியத்தைப் பார்த்து பயன்படுத்தாமல் விட்டால் - உடல் நிலை மோசமாகிவிடும். இந்த வசதியும் காலாவதியாகிவிடுமே.

தொழிற்சங்கம் ஏதுமற்ற அந்த பன்நாட்டு நிறுவனத்தில் - தனக்குறிய வாய்ப்பை பயன்படுத்தி செய்த ஒரு சிறு பணியை பகிர்ந்துகொண்ட போது - நெகிழ்வாக இருந்தது. இன்னும், ஏராளமானவர்கள், சின்னச் சின்னதாய் மாற்றங்களை முன்னெடுத்தால் - இந்த பூமியைப் புரட்ட முடியாதா என்ன??

நம்மிலிருந்து தொடங்குவோம் ...

( Gunavathy Makizhnan மகிழ்நன் பா.ம என அனைவருக்கு வாழ்த்துகள்)

'தேசிய' தொலைக்காட்சிகளின் வீழ்ச்சி ...!

மத்திய ஆட்சியில் மாநிலக் கட்சிகள் ஆதிக்கம் அதிகரித்துவிட்டால் இப்படித்தான் - ஒவ்வொரு மாநில மக்களின் நலன்களுக்காகவும் தேசம் வளைந்து கொடுக்க நேரிடும். - இது ஒரு ஆங்கிலத் தொலைக்காட்சியின் புலம்பல்.

மக்கள் இல்லையேல் ஏது தேசம்? மக்களுக்காக அரசுகள் சிந்தித்து, அவர்களின் உணர்வுகளை மதித்து செயல்படுவதில் என்ன தவறு இருக்கப் போகிறது?? இதுவரை மதிக்கப்படாத மாநிலங்களின் உணர்வுகளுக்கு இனியேனும் மதிப்புக் கிடைத்தால் என்ன நடந்துவிடும்? நாங்களன்றி ஏதடா தேசம்??? ...

இதுவெல்லாம் அவர்களுக்கு புரியாது. உண்மையைச் சொல்ல வேண்டுமென்றால்  நம் தேசிய சேனல்கள் எல்லாம் தில்லி மாநகரத்தின்  மெட்ரோ சானல்களாகத்தான் நடந்துகொண்டிருக்கின்றன.

இந்தியாவின் மிகப்பெரிய மாநிலமான உ.பி, வளர்ச்சிபெற்ற மாநிலங்களில் ஒன்றான தமிழகம், கல்வியறிவு பெற்ற கேரளா, திரிபுரா என எதுவும் அவர்களுக்கு நிர்வாக உதாரணங்கள் அல்ல. ஏனென்றால், இவர்களுக்கெல்லாம் தில்லியில் செல்வாக்கில்லை.

தில்லியில் ஒரு சிறுபான்மை அரசமைத்ததும், 'ஆம் ஆத்மி' கட்சியின் தலைவரை அவர்கள் பிரதமர் வேட்பாளர் வரிசையில் வைக்கத் தொடங்கிவிட்டனர். இந்த லட்சணத்தில் தாங்களே இந்தியாவைப் பாதுகாப்பதுபோன்ற தோரணை வேறு.

அவர்கள் கவலையெல்லாம், இந்த அறியாமைக் குட்டு வெளிப்பட்டுவிடுமே. அரைவேக்காட்டு புரிதலோடு நிகழ்ச்சிகளை ஓட்டிக்கொண்டிருக்க முடியாதே என்பதுதான்.

ஒன்று உறுதி ... அதிகபட்ச உரிமைகள் பெற்ற உண்மையான கூட்டாட்சி பெற்ற நாடாக இந்தியா மாறும்போது, இவர்கள் காணாமல் அடிக்கப்படுவார்கள்.

அன்னா ஹசாரே தெளிவாகத்தான் இருக்கிறார் ...

அன்னா ஹசாரே குறித்து மறந்தே போய்விட்டோம். முதலில் அவர் அரசியல் கட்சிகள், தேர்தல்களில் இருந்தெல்லாம் விலகியிருந்தார். ஆம் ஆத்மி வெற்றிபெற்ற போதும் கூட - மெளனம் காத்தார், விலகியிருந்தார்.

 காங்கிரசை மட்டும் வீழ்த்தினால் போதும் என்ற அளவில்தான் அவரின் நோக்கம் செயல்பட்டது. பின்னர், அவர் அணியில் இருந்த 'பாபா ராம்தேவ்' தன் அரசியல் விருப்பத்தை வெளிப்படுத்தியபோது அன்னாவின் உதடுகள் பாஜகவின் ஊழல்கள் குறித்து அமைதிகாத்தன.

ஆம் ஆத்மிக்கு - அன்னா ஏன் ஆதரவு கொடுக்கவில்லை என்பது அப்போது வெளிப்படையாகவே தெரிந்தது. அவர்கள் 'காங்கிரஸ் - பாஜக' இடையிலான ஊழல் கூட்டணியை எதிர்த்தார்கள். எனவே ஹசாரேவுக்கு அதில் ஈடுபாடு ஏற்படவில்லை.

லோக்பால் மசோதாவுக்காக ஆம் ஆத்மி தனது ஆட்சியையே இழக்கத் துணிந்த போதும் அன்னா அப்படியே இருந்தார். பின் சில கண்டிப்பான கருத்துகளை வெளிப்படுத்தினார்.

இப்போது அவர் தனது அரசியல் பிரவேசத்தை தொடங்கியிருக்கிறார். முற்றிலும் புதிய திசையில். முற்றிலும் புதிய களத்தில்.

சாமானிய மக்களிடமிருந்து கோடிகளைச் சுறுட்டிய சஹாரா நிறுவனத்தின் ஆதரவாளரான மமதா அவரின் உற்ற நண்பராகியுள்ளார். சுதந்திர இந்தியாவில் மிக அதிக ஆண்டுகள் தொடர்ந்து ஆட்சி நடத்தியும் ஊழல் குற்றச்சாட்டுக்கு ஆளாகாத கம்யூனிஸ்டுகளை எதிர்த்து - அன்னா பிரச்சாரம் செய்யப் போகிறார்.

ஏனென்றால், வரக்கூடிய தேர்தலில் கம்யூனிஸ்டுகள் அதிக சீட்டுகளை பெற்றுவிடக் கூடாது. அவர்கள் பலம்பெற்றால் பாஜகவால் ஆட்சியமைக்க முடியாது. இடதுசாரிகள் ஒரு குறைந்தபட்ச செயல்திட்டத்தை வலியுறுத்துவார்கள். யுபிஏ 1 அரசாங்கத்தை ஆட்டுவித்தது போல - பெட்ரோல் விலை ஏறினாலும், பொதுத்துறைகளை விற்பனை செய்தாலும் தடுக்கப் பார்ப்பார்கள். கொள்கை அடிப்படையில் ஒரு மாற்றத்துக்காக போராடுவார்கள். அவர்கள் பலவீனப்பட வேண்டும்.

#அன்னா தெளிவாகத்தான் இருக்கிறார்.