வாக்குப்பதிவு நாள் ...

8 மணி வரை தூங்கிக் கொண்டிருந்த பெண்ணை எழுப்பி ... "கூட்டம் குறைவா இருக்காம். வாங்க போலாம்" என எழுப்பிக் கொண்டிருந்தார் ஒரு அம்மா.

நேற்று நள்ளிரவில் ஒரு நண்பர் என்னை அழைத்தார். பாரம்பரியமாக திராவிட இயக்க குடும்பம் அவருடையது. இருந்தாலும், அவருக்கு பெரிய அரசியல் ஞானமெல்லாம் இல்லை. இந்த முறை யாருக்கு வாக்களிப்பது? என்ற குழப்பம் வேறு. வெகுநேரம் பேசிக் கொண்டிருந்தோம். யாருக்கு வாக்களிப்பது என்பதை விட, இனி நான் அரசியலில் பங்களிப்பை செலுத்த வேண்டும் என்ற உறுதியுடன் எங்கள் உரையாடல் முடிந்தது.

நான் காலையிலேயே வாக்குப்பதிவு மையத்துக்கு சென்றுவிட்டேன். நீண்ட வரிசையில், சிரித்த முகங்களுடன் மக்கள் காத்திருந்தார்கள். ஜனநாயகத்தில் தானும் ஒரு பங்களிப்பை செலுத்தப் போகிறோம் என்ற எண்ணம் வலுவாக தெரிந்தது. ஓட்டு எந்திரத்திற்கு சென்றதும் பட்டனை அமுக்கிவிட்டு அகன்றுவிட்டேன்.

வெளியே வந்த பிறகு, இரண்டு நிமிடங்கள் நின்று எல்லா பட்டனையும் கவனித்திருக்கலாமோ என்று தோன்றியது. சில நிமிடங்கள் அங்கே நின்றுகொண்டிருந்தேன். வாக்குரிமை பெற்ற தன் மனைவியை அனுப்பிவிட்டு, குழந்தையோடு காத்திருந்தார் என் நண்பர். அவருக்கு வாக்கு இல்லை. வாக்கு இருந்தும் சொந்த ஊருக்கு சென்று பதிய முடியாத 5 பேரை சந்தித்தேன்.

ஒரு தேசத்தின் திசைவழியை தேர்ந்தெடுக்க தனக்கு அளிக்கப்படும் வாய்ப்பை ஒவ்வொரு குடிமகனும் நேசிக்கிறார். நாம் தேர்ந்தெடுத்தவர் சிலர் ஊழல் செய்கின்றனர். சிலர் நமக்கே விரோதமான சட்டங்களை கொண்டுவருகின்றனர். இவர்களை திரும்ப அழைக்க நமக்கு உரிமையில்லை. விலைபோகிறவர்கள், அயோக்கியர்களை நாம் வெறுக்கிறோம். இந்த நேரத்தில் வாய்ப்பிருப்பவர்கள் ஆனந்த் டெல்டும்ப்டே எழுதிய (http://bit.ly/1rnfCuc)

இந்தக் கட்டுரையை வாசித்தும் பார்ப்பது உதவியாக இருக்கும். இதையெல்லாம் மாற்ற வேண்டும் என்பதுடன், கிடைத்திருக்கும் குறைந்த அதிகாரத்தை தன்னளவில் நேர்மையுடன் பயன்படுத்த வேண்டும் என்ற உணர்வு மக்களுக்கு இருக்கிறது. உண்மையிலேயே, நாம் நமக்காக பெருமைப்பட வேண்டும். ‪

#‎Vote‬ I ‪#‎Election‬ I Sindhan Ra I ‪#‎Reforms‬ I ‪#‎India‬

கெஜ்ரிவால் அரசியல் - சாமனியனின் ஜனநாயக தாகம் !

தன்னை அடித்த ஆட்டோக்காரரை சந்தித்து பூங்கொத்து கொடுத்திருக்கிறார். மேலும், என்னை ஏன் அடித்தீர்கள்? என்று காரணத்தை விசாரிக்க, அந்த ஆட்டோ டிரைவருக்கு அழுகையே வந்துவிட்டது. அரவிந் கெஜ்ரிவாலின் இந்த நடவடிக்கை வரவேற்புக்கு உரியது.

இதனை தேர்தல் ஸ்டன்ட் என்று சொல்லிவிடலாம். ஏற்கனவே இடதுசாரிகள் எளிமையாகவும், மக்களுக்கு நெருக்கமாகவும் இருக்கிறார்களே இவர்கள் மட்டும் எளியவர்கள் இல்லை என்றும் சொல்லலாம். ஆனால், அது சரியான விமர்சனம் அல்ல.

தில்லி மெட்ரோ சானல் அளவுக்கே விசாலப் பார்வை கொண்ட ஊடகங்களின் தேசிய செய்தியாளர்களின் கவனத்தை அவர்கள் பெற்றிருக்கிறார்கள் என்பது உண்மைதான். முழுமையான கொள்கை சார்ந்த மாற்று சக்தியாக அவர்கள் இல்லாமல் இருக்கலாம். ஆனால் அதனைத் தாண்டியும் இந்தப் பிரச்சனையை வேறு ஒரு கோணத்தில் பார்ப்பது அவசியம்.

ஆம் ஆத்மிக்கு செல்வாக்கு வளரும் பகுதிகளான தில்லி, ஹரியானா, சத்தீஸ்கர் உள்ளிட்ட வட மாநிலங்களில் காங்கிரஸ் - பாஜக மட்டுமே உள்ளன. இந்தக் கட்சிகள் பெரு முதலாளிகளின் ஏஜெண்டுகளாக மாறிவிட்டதால், பிராந்திய மக்களின் உணர்வுகளையோ, ஏழை நடுத்தர, சாமானிய மக்களின் மெய்யான பிரச்சனைகளையோ பேசுவதில்லை. நாங்கள்தான் ஆள்வோம் என்ற திமிரோடு பவணிவரும் காங்கிரஸ் - பாஜக கொள்கை சார் விவாதத்தை ஏற்படுத்தவும் தயாரில்லை.

இந்த நிலையில், ஒருபக்கம் இடதுசாரிகளுக்கும், மாநிலக் கட்சிகளுக்கும் - மாநிலக் கட்சிகள் இல்லாத இடங்களில் ஆம் ஆத்மிக்கும் செல்வாக்கு உருவாகிறது. தேசம் ஒரு முழுமையான ஜனநாயகத்துக்கு ஏங்குவதும்... சாதாரண மக்களை முன்நிறுத்திய விவாதத்தை விரும்புவதும் இதன் மூலம் வெளிப்படுகிறது.

#ஜனநாயகம்வெல்லவேண்டும்

பாஜகவின் அரசியல் - வளர்ச்சியா? பிரிவினையா?

பொதுவாக பாஜக வளர்ச்சி அரசியலுக்கு மாறிவிட்டது என்ற பிரச்சாரம் நடைபெற்றுவருகிறது. இது உண்மையாக இருந்தால் நன்றாக இருக்கும். ஆனால் முஸ்லிம்களுக்கு எதிரான வன்முறையைக் கிளப்புவதையே அதிகாரத்தை பிடிப்பதற்கான தனது ஆயுதமாக பயன்படுத்துவதை பாஜக நிறுத்தவில்லை என்றே தெரிகிறது ...

உத்திரபிரதேசத்தின் "முசாபர் நகர்" பகுதியில் சில மாதங்களுக்கு முன்னர் கலவரங்கள் தூண்டப்பட்டு, ஏராளமானோர் வீடுகளை இழந்து வெளியேறியதை அறிவோம். அதன் பின்னணியாக தவறான வீடியோக்களை திட்டமிட்டு பரப்பிய எம்.எல்.ஏக்கள் கைதாகினர். ஆனால், கிடைத்த சில நாட்களில் சாதிப் பஞ்சாயத்துகளின் வழியே தங்கள் விஷமப் பிரச்சாரத்தைக் கொண்டு சென்று கிராமங்களுக்கு இடையே மோதலை உண்டாக்கினார்கள்.

இந்த நிலையில், அந்த கலவரத்தை எப்படியும் - நாடாளுமன்றத் தேர்தலில் பயன்படுத்தி ஓட்டாக மாற்றிடிவ வேண்டும் என்ற வகையில் பாஜகவும், ஆர்.எஸ்.எஸ் அமைப்பும் தங்கள் தேர்தல் பிரச்சாரத்தை மேற்கொண்டு வருகின்றன. (http://www.ndtv.com/elections/article/election-2014/truth-vs-hype-the-rss-mission-modi-504888)

இந்த நிலையில், பாஜகவின் உத்திர பிரதேச மாநில தேர்தல் பொருப்பாளரும், மோடியின் வலதுகரமும், போலி என்கவுண்டர் மற்றும் அரசே கலவரங்களுக்கு துணைபோன வழக்குகளில் தொடர்புடையவருமான அமித் ஷா ... உ.பி மாநிலத்தின் அப்பாவி மக்களிடையே மேற்கொள்ளும் பிரச்சாரம் அம்பலத்துக்கு வந்திருக்கிறது.

தேர்தல் ஆணையத்திடம் வழங்கப்பட்டுள்ள வீடியோ ஆதாரங்களில் - அவர் இரு மதங்களுக்கு இடையே வெறுப்பை விதைப்பது பதிவாகியுள்ளது. இந்துக்களிடையே அவர் பேசுகிறார் "மேற்கு உ.பியில் நடக்கும் இந்த தேர்தல் நமது கெளரவத்திற்கான தேர்தல், அவமானத்துக்கு பலிதீர்ப்பதற்கும், அநீதி இழைத்தோருக்கு பாடம் புகட்டுவதற்குமான தேர்தல்" "இது மற்றுமொரு தேர்தல் அல்ல. நமது சமூகத்துக்கு இழைக்கப்பட்ட அவமானத்துக்கு நாம் பலியெடுக்க வேண்டும்." என தொடர்ந்து பேசிவருகிறார்.

அப்பாவிகளை பலிகடாவாக்கும் அரசியல் ஒதுக்கப்பட வேண்டும்.

#ஒதுக்குவோம்!

பாபர் மசூதி இடிப்பு : சில அதிர்ச்சித் தகவல்கள் ...

பாபர் மசூதி இடிக்கப்பட்ட தினம் குறித்து - பாஜக தலைவர் அத்வானி "அது என் வாழ்க்கையிலேயே சோகமான தினம்" என்று சொன்னார். இப்போது உண்மை வெளியாகியுள்ளது.

அவர்கள், பலமுறை திட்டமிட்டனர், பாபர் மசூதியை எப்போது இடிக்க வேண்டும், எப்படி இடிக்க வேண்டும் என்று பயிற்சி செய்துதான் இடித்துள்ளனர். அதன் மூலம் அரசியல் அதிகாரத்தைப் பிடிப்பதுதான் அவர்களின் திட்டம்.

முலாயம் சிங் அரசாட்சியில் இருந்தபோது அவர்கள் முதல் முயற்சி செய்தார்கள். முடியவில்லை. எனவே இரண்டாவது முறை திட்டமிட்டார்கள். கல்யாண் சிங் முதல்வராக இருந்தபோது திட்டம் வெற்றியடைந்தது. முன்னாள் பிரதமர் நரசிம்மராவ் நடப்பதை அறிந்திருந்தார்.

குஜராத்தின் சர்கெஜ் பகுதியிலும், அயோத்தியாவின் நீலா டீலா பகுதியிலும் கர சேவர்களுக்கு மாதக் கணக்கில் பயிற்சி கொடுக்கப்பட்டதும். மேலும், கரசேவகர்களை 'தியாகிகளாக" ஆக்குவதற்காக விஹெச்பி அமைப்பின் அசோக் சிங்காலும், பஜ்ரங் தள் அமைப்பின் வினய் காட்டியரும் போலீசாரை துப்பாக்கிச் சூட்டுக்கு தூண்டும் விதத்தில் செயல்பட்டிப்பதும் அதில் வெளியாகியுள்ளது.

பெருமிதத்துடன் இந்து மதவெறியர்கள் தங்கள் சாதனைகளை விளக்குகிறார்கள். அப்பாவிகளின் பிணங்களின் மீது நடந்த அரசியல் கணக்கு வெளியாகிறது.

அறிமுகம்: http://www.cobrapost.com/index.php/video-detail?vid=153

முழுமையான பதிவுகள்: https://www.youtube.com/channel/UCJbGQNou2GBFAi_fnMP2_4A

இந்தியாவுக்கு ஒரு மாற்று தேவை - ஆனால், அது இந்த தரமற்ற நபர்களின் கூட்டமல்ல...

Sindhan Ra

கண்ணை விற்று சித்திரம் வாங்குதல் தகுமோ 2 : சில விவாதங்கள்

பெரும்பாலும் விளைவுகளின் மீது விவாதம் நடத்தும் நாம், அடிப்படைக் காரணங்களை நோக்கிச் செல்வது குறைவு. நேற்று வாரிசு அரசியல் தொடர்பாக ஒரு விவாதம் நடந்துகொண்டிருந்தது.

அய்யா பழ.கருப்பய்யா - இந்தியா முழுவதும் எல்லாக் கட்சிகளும் இப்படி மாறிவிட்டன. இன்றைய சூழலில் தவிர்க்க முடியாதது என்று பொதுப்படுத்தி பேசிக் கொண்டிருந்தார். தொடர்ந்து பேசிய பத்திரிக்கை ஆசிரியர் Vijayasankar Ramachandran அரசியலில் தகுதியற்ற வாரிசுகள் அதிகரிக்கும் அதே நேரத்தில் - இப்படியான குற்றச்சாட்டு இடதுசாரிகள் மீது இல்லை என்பதைச் சொல்லி - அடுத்ததாக எதையோ சொல்ல எத்தனிக்க ...

விவாதத்தை ஒருங்கிணைத்த Gunaa Gunasekaran (அவர்களிடம் இப்படிப்பட்ட நல்ல பண்புகள் இருந்தால் என்ன?) 'அவர்கள் வெற்றிகரமாக இல்லையே' என்று கேள்வியெழுப்பினார். அவ்வளவுதான் விவாதம் முழுக்க திசை மாறிவிட்டது.

இதில் எனது கருத்து "அரசியல் கட்சிகள் கொள்கை சாராம்சத்தை இழந்து, சிலரின் கைப்பாவைகளாக மாறிவிடும்போது, தகுதியற்ற வாரிசுகள் முன்னுக்கு வருகிறார்கள்." என்பதாகும். பொதுவாக தேர்தல் 'வெற்றி'யை மட்டுமே மையப்படுத்தி அரசியலை மதிப்பிடுவதுதான் இந்த சருக்கலுக்கு முதல் அடிப்படையாக அமைகிறது.

நாம் கொண்ட கொள்கையில் சறுக்காமல் - ஒரே ஒரு அடி முன்னேற முடிந்தாலும் அதுதான் வெற்றி. கொள்கையை இழந்ததால் நமக்கு அகிலமே கிடைத்தாலும், அதுதான் மிகப்பெரும் தோல்வி.

தமிழகத்தில் பண்பாட்டுத் தளத்தில் மிகப்பெரும் மாற்றத்தை ஏற்படுத்திய அய்யா பெரியாரும், ஜீவானந்தமும், சீனிவாசராவும் எத்தனை தேர்தல்களின் வெற்றிபெற்றார்கள்? ... ஆனால், இன்றைக்கு வெற்றியை மட்டுமே மையமாகக் கொண்டு சிந்திக்கும் அரசியல் இயக்கங்கள் - கொள்கைகளின் எத்தனை நீர்த்துப் போயிருக்கின்றன.

சிலருக்கு இடதுசாரிகளின் அரசியலில் மாறுபாடு இருக்கலாம், சிற்சில கருத்து வேறுபாடுகள் இருக்கலாம். ஆனால், இந்தியாவில் கொள்கை அடிப்படையில் கூட்டணி அமைத்து - பொது நோக்கத்தை முன்நிறுத்திய மெய்யான கூட்டணிகள், இடதுசாரிகள் வலுப்பெரும்போதுதான் நடக்கிறது என்பதை இணைத்துப் பார்க்க வேண்டும்.

குறைந்தபட்ச பொது செயல்திட்டம் என்ற கருத்தாக்கத்தை வலுப்படுத்தியவர்களும், அதன் மூலம் கூட்டாட்சிக்கு புதிய பொருள் கொடுத்தவர்களும் இடதுசாரிகள். சொந்தக் கட்சிக்குள் மாநாடு, நிர்வாகிகள் தேர்வு, கொள்கை அறிக்கை மீதான விவாதம் போன்ற சமயங்களில் அதிகபட்ச ஜனநாயகமும், பிற சமயங்களில் நேர்த்தியான கட்டுப்பாடும் கொண்டு செயல்படுகிறார்கள்.

அரசியலில் இருந்து கொள்கைகள் தனிமைப்படுவது மிகப்பெரிய ஆபத்து. அந்த ஆபத்தை உணர்ந்த எதிர்வினைகள் தேவைப்படுகின்றன.

கண்ணை விற்று சித்திரம் வாங்குதல் தகுமோ 2

கண்ணை விற்றுச் சித்திரம் வாங்குதல் தகுமோ! - சில விவாதங்கள்

"அவர்கள் சுதந்திரப் போராட்டத்தில் முதலீடு செய்தார்கள். சுதந்திரத்திற்கு பின் சம்பாதித்துக் கொள்வார்கள்" டாட்டா, அம்பானி போன்ற பெரு முதலாளிகளிடம் காங்கிரசும், பாஜகவும் நிதி பெறுவது தொடர்பாக காங்கிரஸ் காரர் சொன்ன விளக்கம். அதுவும் தொலைக்காட்சியில்.

மேலும், எங்களுக்கு கட்சி நடத்த யார் பணம் கொடுப்பார்கள்? இவர்கள் கொடுப்பார்களா? எங்களுக்கு பணம் கொடுத்தவன் சம்பாதிப்பதை எப்படி தடுக்க முடியும்? அது அவனவன் திறமை. எனக்கு டீ வாங்கிக் கொடுத்துக் கொண்டிருந்த ஒருவன் திடீரென கோடீஸ்வரன் ஆகிவிட்டான் - ஒரே ஒரு லைன்சென்ஸ் வாங்கு 800 கோடிக்கு விற்பனை செய்தானாம். இதையெல்லாம் எப்படி தடுப்பது? - ஒரு பொது தொலைக்காட்சியில் - மக்கள் முன்னே அவர் வாக்குமூலம் கொடுத்துக் கொண்டிருந்தார். இந்த நாடு கொள்ளைபோவது தொடர்பாக அவர்களுக்கு எந்த வெட்கமும் இல்லை.

அதே நிகழ்ச்சியில் மார்க்சிஸ்ட் கட்சியின் தோழர் ஆறுமுக நயினார் பேசிய போது - பெரு முதலாளிகள் கொடுத்த காசோலையை - பகிரங்கமாக திருப்பி அனுப்பியதையும். உண்டியல் குழுக்கி சேர்த்த பணத்திலேயே தங்கள் தேர்தல் செலவுகளை மேற்கொள்வதையும் சொல்லக் கேட்க ஆறுதலாய் இருந்தது.

அந்த மார்க்சிஸ்டுகளை ஆதரிக்கிறேன் என்பதில் எனக்கு மகிழ்ச்சி. ஆனால், உண்மையைச் சொல்கிறேன் அந்த ஆறுதல் உணர்வில் பெருமிதம் ஒன்றுமில்லை.

அரசியலை வேடிக்கை பார்க்கும் பார்வையாளர்களே - லட்சக்கணக்கான சுதந்திரப் போராட்ட வீரர்கள் தங்கள் இன்னுயிரை ஈந்து பெற்ற சுதந்திரத்தின் மேல் - சூதாட்டம் நடந்துகொண்டிருக்கிறது. நாம் நமது அரசியலை இழந்துகொண்டிருக்கிறோம். ஜனநாயகத்தின் மாண்புகள் விலைபோவதை வேடிக்கை பார்த்துக் கொண்டிருக்கிறோம்.

கண்ணை விற்றுச் சித்திரம் வாங்குதல் தகுமோ!

சூது கவ்வும் : கருணாநிதி அறிக்கை ...

கலைஞர் கருணாநிதி - அனுபவம் வாய்ந்த அரசியல்வாதி. எங்க தலைவரைப்போல சாணக்கியர் யாருமில்லை என்று திமுகவினரே பெருமைப்பட்டுக் கொள்வதை பார்த்திருக்கிறோம்.

அவர் சில்லரை வர்த்தகத்தில் அன்னிய முதலீட்டுக்கு ஆதரவாக வாக்களித்தது தொடர்பாக ஒரு அறிக்கை விட்டிருந்தார். அதில் "மத்திய அரசு கவிழ்ந்துவிடக் கூடாது" என்பதற்காகத்தான் - மசோதாவை திமுக ஆதரித்து வாக்களித்ததென குறிப்பிட்டுள்ளார்.

உண்மையில் என்ன நடந்தது?

நாடாளுமன்றத்தில் நம்பிக்கையில்லா தீர்மானம் கொண்டுவரப்பட்டால் மட்டும்தான் அரசு கவிழும். அப்படி நம்பிக்கையில்லா தீர்மானம் கொண்டுவர வேண்டுமென 'மம்தா பானர்ஜி' முயற்சி செய்தார்.

ஆனால், விழிப்புடன் செயல்பட்ட கம்யூனிஸ்டுகள் - 'சில்லரை வர்த்தகத்தில் அன்னிய முதலீட்டு மசோதா மீது மட்டும் வாக்கெடுப்புடன் கூடிய விவாதம்' நடத்தலாம் என்று கூறினர். இதன் பொருள், வாக்கெடுப்பில் அரசு தோல்வியடைந்தால், அந்த மசோதாவை மட்டும் நிறைவேற்ற முடியாது.

இதனால், மம்தா - காங்கிரசுக்கு உதவியாக செய்ய நினைத்த 'நம்பிக்கையில்லா தீர்மான' அறிவிப்பு நீர்த்துப் போனது.

ஆனால், திமுகவோ, அறிக்கையில் எல்லாம் அன்னிய முதலீட்டை எதிர்த்துவிட்டு - பாராளுமன்றத்தில் ஆதரித்து வாக்களித்தது.

உண்மை இப்படியிருக்க - கருணாநிதி தனக்கு ஒன்றுமே தெரியாது என்பதுபோல வெளியிட்டுள்ள அறிக்கை - சில்லரை வியாபாரிகள் கண்ணை திறந்திருக்கும்போதே, மண்ணைத் தூவும் வேலையாகும்.

தேர்தல் அரசியல்வாதிகளின் - சாணக்கியத்தனமெல்லாம் - அப்பாவி மக்களை ஏமாற்றத்தான் பயன்படுமென்றால், அதில் பெருமைப்பட என்ன இருக்கிறது?

#திமுக_தொண்டர்கள்தான்_சிந்திக்க_வேண்டும்...

'தேசிய' தொலைக்காட்சிகளின் வீழ்ச்சி ...!

மத்திய ஆட்சியில் மாநிலக் கட்சிகள் ஆதிக்கம் அதிகரித்துவிட்டால் இப்படித்தான் - ஒவ்வொரு மாநில மக்களின் நலன்களுக்காகவும் தேசம் வளைந்து கொடுக்க நேரிடும். - இது ஒரு ஆங்கிலத் தொலைக்காட்சியின் புலம்பல்.

மக்கள் இல்லையேல் ஏது தேசம்? மக்களுக்காக அரசுகள் சிந்தித்து, அவர்களின் உணர்வுகளை மதித்து செயல்படுவதில் என்ன தவறு இருக்கப் போகிறது?? இதுவரை மதிக்கப்படாத மாநிலங்களின் உணர்வுகளுக்கு இனியேனும் மதிப்புக் கிடைத்தால் என்ன நடந்துவிடும்? நாங்களன்றி ஏதடா தேசம்??? ...

இதுவெல்லாம் அவர்களுக்கு புரியாது. உண்மையைச் சொல்ல வேண்டுமென்றால்  நம் தேசிய சேனல்கள் எல்லாம் தில்லி மாநகரத்தின்  மெட்ரோ சானல்களாகத்தான் நடந்துகொண்டிருக்கின்றன.

இந்தியாவின் மிகப்பெரிய மாநிலமான உ.பி, வளர்ச்சிபெற்ற மாநிலங்களில் ஒன்றான தமிழகம், கல்வியறிவு பெற்ற கேரளா, திரிபுரா என எதுவும் அவர்களுக்கு நிர்வாக உதாரணங்கள் அல்ல. ஏனென்றால், இவர்களுக்கெல்லாம் தில்லியில் செல்வாக்கில்லை.

தில்லியில் ஒரு சிறுபான்மை அரசமைத்ததும், 'ஆம் ஆத்மி' கட்சியின் தலைவரை அவர்கள் பிரதமர் வேட்பாளர் வரிசையில் வைக்கத் தொடங்கிவிட்டனர். இந்த லட்சணத்தில் தாங்களே இந்தியாவைப் பாதுகாப்பதுபோன்ற தோரணை வேறு.

அவர்கள் கவலையெல்லாம், இந்த அறியாமைக் குட்டு வெளிப்பட்டுவிடுமே. அரைவேக்காட்டு புரிதலோடு நிகழ்ச்சிகளை ஓட்டிக்கொண்டிருக்க முடியாதே என்பதுதான்.

ஒன்று உறுதி ... அதிகபட்ச உரிமைகள் பெற்ற உண்மையான கூட்டாட்சி பெற்ற நாடாக இந்தியா மாறும்போது, இவர்கள் காணாமல் அடிக்கப்படுவார்கள்.

அன்னா ஹசாரே தெளிவாகத்தான் இருக்கிறார் ...

அன்னா ஹசாரே குறித்து மறந்தே போய்விட்டோம். முதலில் அவர் அரசியல் கட்சிகள், தேர்தல்களில் இருந்தெல்லாம் விலகியிருந்தார். ஆம் ஆத்மி வெற்றிபெற்ற போதும் கூட - மெளனம் காத்தார், விலகியிருந்தார்.

 காங்கிரசை மட்டும் வீழ்த்தினால் போதும் என்ற அளவில்தான் அவரின் நோக்கம் செயல்பட்டது. பின்னர், அவர் அணியில் இருந்த 'பாபா ராம்தேவ்' தன் அரசியல் விருப்பத்தை வெளிப்படுத்தியபோது அன்னாவின் உதடுகள் பாஜகவின் ஊழல்கள் குறித்து அமைதிகாத்தன.

ஆம் ஆத்மிக்கு - அன்னா ஏன் ஆதரவு கொடுக்கவில்லை என்பது அப்போது வெளிப்படையாகவே தெரிந்தது. அவர்கள் 'காங்கிரஸ் - பாஜக' இடையிலான ஊழல் கூட்டணியை எதிர்த்தார்கள். எனவே ஹசாரேவுக்கு அதில் ஈடுபாடு ஏற்படவில்லை.

லோக்பால் மசோதாவுக்காக ஆம் ஆத்மி தனது ஆட்சியையே இழக்கத் துணிந்த போதும் அன்னா அப்படியே இருந்தார். பின் சில கண்டிப்பான கருத்துகளை வெளிப்படுத்தினார்.

இப்போது அவர் தனது அரசியல் பிரவேசத்தை தொடங்கியிருக்கிறார். முற்றிலும் புதிய திசையில். முற்றிலும் புதிய களத்தில்.

சாமானிய மக்களிடமிருந்து கோடிகளைச் சுறுட்டிய சஹாரா நிறுவனத்தின் ஆதரவாளரான மமதா அவரின் உற்ற நண்பராகியுள்ளார். சுதந்திர இந்தியாவில் மிக அதிக ஆண்டுகள் தொடர்ந்து ஆட்சி நடத்தியும் ஊழல் குற்றச்சாட்டுக்கு ஆளாகாத கம்யூனிஸ்டுகளை எதிர்த்து - அன்னா பிரச்சாரம் செய்யப் போகிறார்.

ஏனென்றால், வரக்கூடிய தேர்தலில் கம்யூனிஸ்டுகள் அதிக சீட்டுகளை பெற்றுவிடக் கூடாது. அவர்கள் பலம்பெற்றால் பாஜகவால் ஆட்சியமைக்க முடியாது. இடதுசாரிகள் ஒரு குறைந்தபட்ச செயல்திட்டத்தை வலியுறுத்துவார்கள். யுபிஏ 1 அரசாங்கத்தை ஆட்டுவித்தது போல - பெட்ரோல் விலை ஏறினாலும், பொதுத்துறைகளை விற்பனை செய்தாலும் தடுக்கப் பார்ப்பார்கள். கொள்கை அடிப்படையில் ஒரு மாற்றத்துக்காக போராடுவார்கள். அவர்கள் பலவீனப்பட வேண்டும்.

#அன்னா தெளிவாகத்தான் இருக்கிறார்.

அரசு திரையரங்கம் நடத்தலாமா? ...

அரசு திரையரங்கம் நடத்தலாமா? என்பது ஒரு விவாதமாகியுள்ளது

திரையரங்கம், தொலைக்காட்சி போன்ற பொழுதுபோக்குத் துறைகள் சாதாரணமானவை அல்ல. எல்லாத் தரப்பினரின் விருப்பத்தையும் பெற்றுள்ள சினிமா - ஒரு காஸ்ட்லி வியாபாரமாக மாற்றம் பெற்றுள்ள.

ரிலையன்ஸ் உள்ளிட்ட மிகப்பெரும் பணக்கார நிறுவனங்கள் அனைத்தும், பொழுதுபோக்கு துறையிலேயே அதிக லாபம் ஈட்டி வருவதும் கவனிக்கத்தக்கது. (தமிழகத்திலிருந்து ஆசிய பணக்காரர் வரிசையில் இடம்பிடித்த மாறன் சகோதரர்களும் ஒரு உதாரணம்) நூற்றுக்கணக்கான திரையரங்கங்களை ஆண்டுக்கணக்கில் ஒப்பந்தம் செய்து, ஒன்றுக்கும் ஆகாத திரைப்படங்களைக் கூட அதிக விளம்பரம் செய்து - நம் சட்டைப்பையைக் காலியாக்கிவிடுகின்றன.

சிறு திரைப்படங்களும், சுதந்திரமான படைப்பாளர்களும் - இதுபோன்ற சினிமா வியாபாரிகளின் தேவைக்காக 'கமர்சியல்' சமரசங்களுக்கும், பெண் உடல் வியாபாரத்திற்கும் அடிபணிவதற்கும் இத்தகைய ஏகபோகமும், கோடிகளை குவிக்கும் ஆசையும் காரணமாகிறது.

ஒரு துறையில் சிலரே (நடிகர்/நிறுவனம்) ஆதிக்கம் செலுத்துவது எப்போதும் ஆரோக்கியமான போட்டியை மறுத்து, குறுக்கு வழியில் லாபமீட்டவே வழிவகுக்கிறது.

இந்த சூழலில் அரசு சில திரையரங்கங்களை தொடங்குவதானது - எடுத்த எடுப்பிலேயே, மிகப்பெரும் வியாபாரத்தில் எந்த பாதிப்பையும் ஏற்படுத்தப் போவதில்லை என்றாலும்.திரையரங்கம் கிடைக்காத, நல்ல படங்களுக்கு ஒரு வாய்ப்பை ஏற்படுத்தலாம். ஓரளவு டிக்கெட் விலையை கட்டுப்படுத்த உதவலாம்.

ஆனால், இவையெல்லாம் இந்த திட்டத்தை நடைமுறைப் படுத்தும் விதத்தில்தான் உள்ளது.

மீண்டும் வருகிறது கம்யூனிசப் பேய் !

தினமலரின் இன்றைய தலைப்பும் செய்தியும் சிரிப்பை வரவழைத்தன. தமிழகம் ஆகிறது 'சோவியத் யூனியன்' என்று தலைப்பு போட்டிருந்தார்கள். அதோடு ஜெ யாரிடமோ தவறான யோசனை பெறுகிறார் - கண்ணை விற்று சித்திரம் வாங்குகிற கதைதான். இனி எல்லாம் முடிந்தது என்கிற போக்கில் எழுதியிருந்தார்கள்.

இந்தியா, உலகமயக் கொள்கையிடம் தன்னை அடகுவைத்து, மீளமுடியாத நெருக்கடிகளை வரவழைத்துக் கொண்டிருக்கும் நிலையில் - ஒரு மாநிலத்தில் மட்டும் பொருளாதாரக் கொள்கையை மாற்றிவிட முடியாது என்பது ஒரு பக்கம் இருக்க. இவர்கள் ஏன் குதிக்கிறார்கள்? எது அவர்களை உண்மையில் பயப்படுத்துகிறது? என்பது முக்கியமான கேள்வி.

நலத்திட்ட அரசு:
உணவகம், மருந்தகம், காய்கறிச் சந்தை, பாட்டில் குடிநீர், கேபிள் இணைப்பு - என்ற வரிசையில் திரையரங்கம் ஏற்படுத்தும் திட்டத்தை சென்னை மாநகராட்சி அறிவித்திருக்கிறது. பல முன்னேறிய நாடுகளில் உள்ளதுபோல இவைகள் அனைத்தும் நலத்திட்ட நடவடிக்கைகள்தான்.

குறிப்பாக திரையரங்கம், தொலைக்காட்சி போன்ற பொழுதுபோக்குத் துறைகள் சாதாரணமானவை அல்ல. எல்லாத் தரப்பினரின் விருப்பத்தையும் சினிமா - ஒரு காஸ்ட்லி வியாபாரமாகவே நீடித்திருக்கிறது. ரிலையன்ஸ் உள்ளிட்ட மிகப்பெரும் பணக்கார நிறுவனங்கள் அனைத்தும், பொழுதுபோக்கு துறையிலேயே அதிக லாபம் ஈட்டி வருவதும் கவனிக்கத்தக்கது. (தமிழகத்திலிருந்து ஆசிய பணக்காரர் வரிசையில் இடம்பிடித்த மாறன் சகோதரர்களும் ஒரு உதாரணம்)

அரசு சில திரையரங்கங்களை தொடங்குவதானது - அவர்களின் மிகப்பெரும் வியாபாரத்தில் எந்த பாதிப்பையும் ஏற்படுத்தப் போவதில்லை. மாறாக திரையரங்கம் கிடைக்காத சிறு படங்களுக்கு ஒரு வாய்ப்பை ஏற்படுத்தலாம். ஓரளவு டிக்கெட் விலையை கட்டுப்படுத்த உதவலாம். அதுவும் நடைமுறைப் படுத்தப்படும் விதத்தில்தான் உள்ளது.
---
இந்தியாவில் பெரும் தொழில்களை தொடங்க சோவியத் உதவி பெறப்பட்டுள்ளது. கலப்பு பொருளாதாரம் கடைப்பிடிக்கப்பட்டது. இதுவரையில் சோசலிசப் பொருளாதாரம் அமலில் இருந்ததில்லை.

தினமலர் ஒரு போலி அச்சத்தைக் கிளப்புவதற்கு வேறு ஒரு காரணம் உள்ளது. அவர்களின் விருப்ப நாயகனும், இந்திய பெரும் முதலாளிகளின் அன்பு வேட்பாளருமான நரேந்திர மோடியை அதிமுக ஆதரிக்கவில்லை என்பதே அது.
---
எது கம்யூனிசம் என்கிற விளக்கத்தைக் கூட - முதலாளிகளே கொடுப்பதும். 'மனைவியை' பொதுவுடைமை ஆக்கிடுவார்கள். இரண்டு சைக்கிள் இருந்தால் ஒன்றை பிடுங்கிக் கொள்வார்கள். என்றெல்லாம் தவறான விளக்கங்களைக் கொடுத்து அச்சப்படுத்துவது இன்றைக்கு மட்டும் நடப்பதல்ல. கம்யூனிஸ்ட் கட்சி அறிக்கையே "கம்யூனிச பூதம்" என்ற முதலாளிகளின் பிரச்சாரத்துக்கு பதில் கொடுத்துத்தான் தொடங்கும் என்பதிலிருந்து பார்ததால் - தொடக்கத்திலிருந்தே அவர்கள் இதைத்தான் செய்துவந்திருக்கிறார்கள்.

அம்பானி, அடானி வகையராக்களும், அவர்களின் கதா நாயகர்களும் அச்சமடையத் தொடங்கியுள்ளார்கள்.

#இது_நல்லதுதான்!

மூவர் தூக்கு தீர்ப்பு - பாஜகவை தோற்கடிக்குமா?

"கொடூரமான அரசியல் படு கொலைகள் .. தண்டனை பெற்ற குற்றவாளிகள் , மன்னிக்கப் படவேண்டியவர்களா ?"

"தமிழக மக்களின் மனிதாபிமானம் குற்றவாளிகளின் சார்பாக ஒரு நாளும் திரும்புவதும் இல்லை." - 'இதனால் பாஜக கூட்டணி தோல்வியடையும்' என்றெல்லாம் தனது ஆற்றாமையை வெளிப்படுத்தியுள்ளார் Banu Gomes.
---

ராஜிவ் கொலை வழக்கில் தண்டனை பெற்ற மூவருக்கும் தூக்கு ரத்து செய்யப்பட்டுள்ளது. ஒரு குற்றத்திற்கு இரண்டு தண்டனைகள் வழங்க முடியாது என்ற நிலையிலேயே இதைச் செய்துள்ளார்களே அல்லாமல் அவர்களை மன்னித்து விடுகிறோம் என்பதல்ல நீதிமன்றத்தின் நிலைப்பாடு.

கொலைக்கு மற்றொரு கொலை சமனாகிவிட முடியாது என்கிற நிலையில் இருந்தும் - தண்டனையின் நோக்கம் 'பலிக்கு பலி' அல்ல என்கிற உயந்த நிலையிலிருந்துமே நீதித்துறை செயல்பட வேண்டும். இந்த வகையில்தான், தமிழக மக்களின் மனிதாபிமான உணர்வு மரண தண்டனையை எதிர்க்கிறதே அன்றி - குற்றங்களுக்கு ஆதரவான மனநிலை அல்ல.

மேலும், தமிழகத்தில் பாஜக நிராகரிக்கப்படப் போவது - நிச்சயம் நடக்கப் போவதுதான். அவர்கள் அரசியல் படுகொலைகளுக்கு எதிரானவர்கள் இல்லை என்பதுடன், படுகொலை அரசியலில் திளைத்தவர்கள் என்பதாலுமே மக்கள் அவர்களை நிராகரிப்பார்களே அன்றி. மரண தண்டனைக்கு எதிரான தீர்ப்பினால் அல்ல.

உண்மையைச் சொல்லப்போனால், இந்த தீர்ப்புக்கு ஒரு காரணமாக அமைந்த மதிமுகவும், அந்த அணியோடு சேர்ந்து வீழப்போகிறது என்பதே நிதர்சனம்.

ஏனிந்த சரணாகதி Mr. கெஜ்ரிவால்??

ஒருபக்கம் அம்பானியை விமர்சித்துவிட்டு - இந்திய முதலாளிகளிடம் தன்னிலை விளக்கம் கொடுத்திருக்கிறார் கெஜ்ரிவால். முதலாளிகள் அமைப்பான சிஐஐ நடத்திய சந்திப்பில் அவர் கொடுத்த விளக்கத்தில் 'அரசாங்கம் தொழில் நடத்தக் கூடாது' என பொதுத்துறைகளை அரசு கைவிடும் நடவடிக்கை உட்பட பல தாராளமய பொருளாதார நடவடிக்கைகளை ஆதரித்துள்ளார்.

ஆம் ஆத்மியின் கொள்கைகள் என்ன? என்று பலதரப்பு கேள்வி எழுப்பியபோதும் வாய் திறக்காதவர்கள் - அம்பானி எதிர்ப்பால் தொழிலதிபர்களின் பகைமைக்கு ஆளாகிவிடக் கூடாது என்ற அவசரத்தில் இதைச் செய்துள்ளது வெளிப்படை.

ஒவ்வொரு, பட்ஜெட் உரை தயாரிப்பின்போதும் - பெரிய முதலாளிகளைச் சந்திப்பதும், கோரிக்கைகளைக் கேட்பதும் காங்கிரஸ், பாஜகவின் வழக்கம். 'ஏன் விவசாயிகளையும், தொழிலாளர்களையும் சந்திப்பதில்லை' என்ற கேள்வியை இடதுசாரிகள் முன்வைப்பார்கள்.

ஆனால், அரசு இதுவரையிலும் தன் நிதிநிலை அறிக்கை மீதான சாமானியர்களின் எதிர்பார்ப்பை கேட்டதில்லை. 'சாமானியர்களின்' கட்சியான ஆம் ஆத்மியும், தற்போது அதைத்தான் செய்திருக்கிறது.

உங்கள் பொருளாதாரக் கொள்கைகள் என்ன? என பலமுறை கேட்டும் விளக்கம் கொடுக்க முன்வராதவர்கள். தற்போது பெரிய நிறுவனங்களிடம் போய் விளக்கம் கொடுத்திருக்கின்றனர். கெஜ்ரிவாலின் விளக்கங்களில் பல அபத்தமானவை. அப்பட்டமாக, தொழிலதிபர்களின் மனதில் இடம்பிடிக்கும் விருப்பத்தை வெளிப்படுத்துபவை.

இந்த விருப்பத்தில் அவர்கள் வெற்றியடையலாம். ஆனால், அந்த வெற்றி, சாமானியர்களின் வெற்றியாக இருக்கப்போவதில்லை.

கெஜ்ரிவால் ராஜினாமாவும் - அம்பலமான கூட்டணியும்....

அரவிந் கெஜ்ரிவாலின் ராஜினாமா முடிவு சரியானதே.

இதுதான் நடக்குமென்பது நமக்கு முன்னமே தெரியும். மத்திய ஆட்சியில் காங்கிரஸ் - பாஜக அல்லாத சக்திகள் ஆட்சிக்கு வந்தபோதெல்லாம் - அவர்களை ஆட்சிக்கு குந்தகம் விளைவித்ததுடன், சரியான சமயத்தில் கவிழ்த்துவிடுவதிலும் காங்கிரஸ், பாஜக வெட்கமின்றி கைகோர்த்துள்ளனர்.

விவாதிக்கப்பட வேண்டிய முக்கியப் பிரச்சனைகளின்போதும், மக்கள் விரோத மசோதாக்கள் மக்களவையில் தாக்கல் செய்யப்படும்போதும் - வெற்றுக் கூச்சல்களினிடையே - ஜனநாயகத்தை குழிதோண்டிப் புதைக்கும் பணியிலும் இந்தக் கூட்டணி தொடர்ந்து செயல்படுகிறது. இந்தக் கூட்டை அம்பலப்படுத்தியது வரவேற்புக்கு உரியது.

நேற்றையை தில்லி சட்டமன்ற நிகழ்வுகளை பார்க்கும் எவரும் - ஊழலுக்கு எதிரான எந்த விவாதத்தையும், உறுதியான நடவடிக்கையையும் கண்டு காங்கிரசும் பாஜகவும் எத்தனை அச்சமடைகிறார்கள் என்பதை கண்கூடாக பார்த்திருக்க முடியும்.

நிர்வாக அனுபவமற்ற, இன்னும் தங்களை முழுமையாக வெளிப்படுத்தியிராத புதிய சக்திகள் என்றாலும், ஆம் ஆத்மி இந்த சூழலில் சரியான முடிவையே எடுத்துள்ளது. அதிகாரிகள் - அரசியல்வாதிகள் - பெறு நிறுவனங்களின் கூட்டணியை முடிந்த அளவு அம்பலப்படுத்தியுள்ளனர்.

ஆம் ஆத்மி தொடர்பான விமர்சனங்கள் என்ன இருந்தாலும் - தில்லி மக்களுக்கு கிடைத்துள்ள ஒரு குறைந்தபட்ச வாய்ப்பு என்ற முறையில் அவர்கள் வரவேற்புக்கு உரியவர்கள். - அரசியலற்ற பொதுமக்களை களத்திற்கு இழுத்துவந்து, சில உண்மை அனுபவங்களைக் கொடுத்துள்ளனர்.

பத்திரிக்கையாளர் Gnani Sankaran சொல்வதைப் போல, 'ஆம் ஆத்மி என்பது ஒரு கருத்தாக்கம்'. அது நமக்கு கொடுத்துள்ள அனுபவங்கள் முக்கியமானவை.

#எல்லாவற்றையும்_மக்கள்_பார்க்க_வேண்டும்...

நேர்படப் பேசு - ஏன் ஒரு பக்க சார்பாகிறது?

தொலைக்காட்சி நிகழ்ச்சிகளில் அதிகம் விரும்பப் படும் ஒன்றாக இருக்கும் விவாத நிகழ்ச்சி நேர்படப் பேசு. ஆனால் கடந்த சில தினங்களாக 'நாற்பதின் நாடித் துடிப்பு' என அவர்கள் மேற்கொள்ளும் கருத்துக் கணிப்புகள் பரவலான விமர்சனத்திற்கு உள்ளாகின்றன.

தேர்தலுக்கான களமே தயாராகாத நிலையில் மேற்கொள்ளப்பட்ட கணிப்புகள் என்பதால் இப்பிரச்சனை இருக்கலாம் என்பது ஒரு பக்கம் இருக்க - மேற்கு மண்டம் குறித்த கணிப்புகள் வெளியானபோது மேலும் சில அபத்தங்கள் புரிபட்டன.
---

1) 'மேற்கு மண்டல மக்களால் அதிகம் விரும்பப் படும் அணியாக பாஜக அணி உள்ளது. ஆனால், அந்த அணியின் தலைவர் பிரதமராக மாட்டார்' என்ற கணிப்பு முடிவைப் பார்த்து அந்த விவாத அரங்கமே வியந்தது.

2) ஒன்றுக்கொன்று தொடர்பில்லாத வகையில் வந்த முடிவுகளை கணிப்பு நடத்திய நிறுவனம் மட்டுமே நம்பியது.

3) கொங்குநாடு மக்கள் தேசிய கட்சி ஒரு சாதியக் கட்சி அல்ல என்றும் அரசியல் முடிவுகளை தீர்மானிக்கும் வாக்குகள் தங்களிடம் இருப்பதாகவும் ஈஸ்வரன் தனது பிரச்சாரத்தை நடத்திக் கொண்டபோது பத்திரிக்கையாளர் உட்பட எல்லோரும் ஏற்றுக் கொண்டனர். (அவர்கள் மாநாட்டில் வன்கொடுமைத் தடுப்புச் சட்டத்துக்கு எதிராக தீர்மானங்கள் போடப்பட்டது குறித்தும். சென்ற தேர்தலில் திமுகவுடன் அணி அமைத்தும் கொமும வெற்றி பெற முடியாதது குறித்தும் யாரும் சுட்டிக்காட்டவில்லை.)

4) அதே போல அந்தந்த மண்டலங்களில் வசிக்கும் - அரசியல் பார்வையாளர்கள் மற்றும் கருத்தாளர்கள் தேர்வும் இல்லை.

5) இப்போதுள்ள எம்பி-யை மீண்டும் தேர்ந்தெடுப்பீர்களா என்ற கேள்விக்கு தொகுதி வாரியாகத்தான் பதில் கண்டரிய முடியும். (உதாரணமாக திருப்பூர் எம்.பி சிவசாமி அதிமுக கட்சியில் இருந்து ஒதுக்கி வைக்கப்பட்டுள்ளார். ஈரோடு மதிமுக எம்பி தற்போது அவர் இருந்த அணியில் இல்லை.) ஆனால் மண்டலம் முழுமைக்கும் ஒரே முடிவை வைத்துக் கொண்டிருந்தனர்.

6) பாஜகவுக்கு கோவை, திருப்பூரில் கட்சி உள்ளது. ஆனால் மண்டலம் முழுமைக்கும் 40 சதவீதத்திற்கும் அதிகமான ஆதரவு உள்ளதாகவும், ஆனால் வெற்றிபெறப் போவது அதிமுக என்றும் குழப்பமான முடிவுகள் முன்வைக்கப்பட்டன.

7) இவை எல்லாவற்றிற்கும் கருத்துக் கணிப்பை அறிவியல் பூர்வமாக நடத்தியதாகச் சொல்லிக் கொள்ளும் நிறுவனத்தின் தலைவர் - 'வலுவான மத்திய அரசு' வேண்டும் என்ற மக்களின் விருப்பத்தை நேரடியாக பாஜகவின் வாக்கு வங்கியாக மாற்றி பேசிக் கொண்டிருந்தார்.

Gunaa Gunasekaran உள்ளிட்டு, மேற்கு மண்டலத்தில் பணியாற்றிய செய்தியாளர்களுக்கு திமுகவுக்கு என்னதான் சரிவு ஏற்பட்டாலும், அது பாஜகவின் வாக்கு வங்கியாக மாறாது என்ற உண்மை தெரியும்.

கணிப்பு நடத்தியவர்கள் ஒரு நோக்கத்தோடு செய்ததால்தான், அது உண்மையை நெருங்கவில்லை என்றே தோன்றுகிறது. To: PuthiyaThalaimurai TV

அய்யா ராமதாசின் காதல் ...

செவிலியரோடு மருத்துவர் ராமதாசுக்கு பழக்கம் உள்ளதாக வெளியாகியுள்ள செய்தியை நாம் விமர்சனத்தோடு பார்க்க வேண்டியதில்லை. இந்த வயதில்தான் சரியான நட்பு கிடைத்திருக்கிறதென அவரின் மனம் உணர்ந்திருக்கலாம். அவருக்கான வாழ்க்கையை, தேர்ந்தெடுக்கும் உரிமை அவரவருக்கு இருக்கிறது.

சட்டப்படி இது தவறென்று கருதப்படலாம், எனவே அவரின் குடும்பத்தாருக்கு உரிய நீதியை அவர் வழங்க வேண்டும்.

சாதிய விசமப் பிரச்சாரத்துக்கு பலியாகி - காதல் திருமணங்களை எதிர்த்து துவேசம் கொண்டு - ஊரையே எரித்த தொண்டர்கள் - இப்போதாவது மன விருப்பத்தின் வலிமையை புரிந்துகொள்வார்கள் என நம்புவோம்.

காதலிப்பது குற்றமில்லை. காதலித்த பெண்/ஆண் எந்த சாதியாக இருந்தாலும் திருமணம் செய்வது குற்றமில்லை. சுய மரியாதையுடன் வாழ்வது குற்றமில்லை.

மனைவி இருக்கும்போதே, மன விருப்பம் இன்னொருவரிடம் இருந்தால் - விவாகரத்து செய்யாமல் உறவு தொடர்வது சட்டப்படி குற்றம். ஆனால், இந்தக் குற்றத்துக்காகவும் கூட எந்த கிராமத்தையும் எரிக்க வேண்டியதில்லை.

‪#‎வாழ்த்துகள்‬!

திமுக ஆதரவாளர்கள்தான் பதில் சொல்ல வேண்டும் ...

திமுக - அழகிரியை தற்காலிகமாக நீக்கியிருக்கிறது. தற்காலிகம்தான் என்றாலும் இதுவொரு நல்ல முடிவு. காலதாமதமே என்றாலும், எடுக்க வேண்டிய முடிவு.

அதிகாரப் போட்டிக்காக த.கிருட்டிணன் கொலை செய்யப்பட்டபோதும், தினகரன் அலுவலகத்தில் 3 ஊழியர்கள் கருகிச் செத்தபோதும் அவர்களுக்கு இத்தகைய முடிவை எடுக்க வேண்டும் நெருக்குதல் ஏற்பட்டிருக்கவில்லை. மாறாக, அழகிரிக்கு கட்சிப் பொருப்புகள் கொடுத்து கவுரவிக்கப்பட்டன.

உரத்துரை மந்திரியாக அவர் இருந்தபோதுதான், உர மானியங்கள் வெட்டப்பட்டன. விவசாயிகளின் வயிற்றிலடிக்கும் இதுபோன்ற கொள்கை முடிவுகளை ஏன் எடுத்தோம்? என்ற விளக்கக் கூட சொல்லத் தெரியாத, நிர்வாகியாக இருந்தார். ஆனாலும், அவர் அமைச்சராக நீடித்தார்.

திருமங்கலம் பார்முலாவை மட்டும் நம்பிய அழகிரி, அரசியலை எத்தனை எளிமையான விளக்கத்திற்குள் கொண்டு சென்றார்? என்பதும் இடைத்தேர்தல்களில் ஒரு விதமாகவும், பொதுத்தேர்தலில் வேறொரு விதமாகவும் மக்கள் பதிலடி கொடுத்ததும் மறக்க முடியாது.

ஆனால் அப்போதெல்லாம், கோபம் கொள்ளாத திமுக இப்போது 'தற்காலிக நீக்கத்தை' அறிவித்திருப்பதும். அதுவே, குடும்ப அரசியலுக்கு முற்றுப்புள்ளியென அய்யா வீரமணி சான்றிதழ் கொடுத்திருப்பதும். இதுவெல்லாம் தேர்தல் கூட்டணிக்காக தேமுதிகவை தாஜா செய்யும் வேலை மட்டும்தானோ? என்ற ஊகத்துக்கு இட்டுச் செல்வதை தவிர்க்க முடியவில்லை.

ஆம் ஆத்மி - எல்லாவற்றையும் மக்கள் பார்க்கட்டும் ...

ஆம் ஆத்மி - விமர்சனத்திற்கு அப்பாற்பட்ட கட்சியல்ல. ஆனால் எந்த நடவடிக்கையை விமர்சிக்கிறோம் என்பதில், விமர்சகளின் சாயம் வெளிப்படுகிறது.

மின் கட்டணக் குறைப்பு, தண்ணீர் வியாபாரத்திற்கு கடிவாளம், அந்நிய மூலதனத்திற்கு அனுமதி மறுப்பு, ஊழல் எதிர்ப்பாளர்களை பாதுகாத்தல், வழிகாட்டுதல் போன்ற நடவடிக்கைகளை, ஆட்சியதிகாரத்திற்கு மிகவும் புதிய அந்தக் கட்சி செய்துள்ளதை வரவேற்க வேண்டும்.

ஆனால், மக்களுக்கு சுமை குறைப்பதை ஊடகங்கள் சாடியதும், சில அமைச்சர்கள் - ஊடகங்களுக்கு பணிந்து போயினர். தனக்கு இதுதான் கொள்கை என்று திடமாகச் சொல்லாத அவர்களின் இந்தப் போக்கு சரியானதில்லை.

ஹரியானா மாநிலத்தில் விவசாயிகள் மத்தியிலும் களம் காண நினைப்பது தவறில்லை. அதற்காக 'சாதிப் பஞ்சாயத்துகள்' சரியாக நடக்கின்றன என்ற ரீதியில் கருத்து சொல்வது சந்தர்ப்பவாதமே அன்றி அறிவுடைமை அல்ல.

அடுத்தது - இன்றைக்கு தில்லி காவல்துறை கண்டித்து கெஜ்ரிவால் தர்ணாவில் இறங்கியுள்ளது. இந்திய ஜனநாயகத்தில் மாநிலங்களுக்கு அதிக அதிகாரம் வழங்க மறுப்பது மத்திய ஆட்சியாளர்களின் தவறான போக்காகும். தில்லி அரசின் கையில் காவல்துறை இல்லை என்ற நிலை சரியில்லை. இதற்கு எதிரான போராடுவது கூட்டாட்சிக்கு அவசியமானது.

ஆனால், எந்த வழக்கும் பதியாமல், நள்ளிரவில் திடீர் சோதனை, அமைச்சர் சொல்லிவிட்டார் என்பதற்காக யாரையும் விசாரிப்பதென்பது, ஜனநாயகத்தை வலுப்படுத்தும் நடைமுறை அல்ல. மேலும், கருப்பர்கள், ஆப்ரிக்கர்கள் என்றாலே போதை வியாபாரிகள் என்கிற பொதுப்புத்திக்கு ஆட்படுவதெல்லாம், ஏற்க முடியாதது.

தத்தி தத்தி நடக்கும் ஆம் ஆத்மியில் நேர்மையாளர்களும் இருக்கிறார்கள், சந்தர்ப்பவாதிகளும் உள்ளனர். நல்ல விமர்சனங்கள், பக்குவப்படுத்தலாம். பாஜகவோ, காங்கிரசோ அந்த நோக்கத்தில் தங்கள் விமர்சனங்களை முன்வைப்பதில்லை.

# எல்லாவற்றையும் மக்கள் பார்க்கட்டும் ...

ஆம் ஆத்மியின் பயணத்தில், இது ஒரு சருக்கல் ...

மிஸ்ட் கால் குடுத்தாலே போதும், மெம்பர் ஆகிடலாம் என்பதை விட அரசியலை யாராவது கேலி செய்துவிட முடியுமா??

ஆம் ஆத்மி புதிய கட்சி, அரசியலில் புதுமைகளை செய்ய நினைக்கின்றனர். ஆனால், இப்படிப் போய், பழைய குட்டையில் மூழ்கிவிட்டு, என்ன புதுமையை படைக்க முடியும்??

இப்போது செயல்படும் கட்சிகளை உற்று கவனித்தால், அவற்றின் உறுப்பினர்கள் 'ரசிகர்' பட்டாளமாக மாற்றப்பட்டிருப்பது தெரியும். கட்சியின் தலைவர்கள் மீதான விருப்பத்தை தவிர எதையும் தங்கள் அரசியலாக அறிந்திருக்காத உறுப்பினர்கள் இருப்பதால்தான், கட்சிகள் எத்தகைய துரோகத்தையும் துணிந்து செய்கின்றன.

ஆம் ஆத்மியும் உறுப்பினருக்கான அடிப்படைத் தகுதிகளையெல்லாம் நீக்கிவிட்டு, மிஸ்ட் கால் கொடுங்கள், எஸ்.எம்.எஸ் அனுப்புங்கள் என்று சொல்லத் தொடங்கியுள்ளனர். கெஜ்ரிவால் ரசிகர்கள், அல்லது அரசியலற்ற ஏராளமானோரை இது ஈர்க்கலாம். ஆனால், இதனால் ஒரு அரசியல் மாற்றை ஏற்படுத்த முடியுமா??

ஒரு மெய்யான மாற்று அரசியல் - அரசியல் உணர்வுபெற்ற இளைஞர் பட்டாளத்தால் முன்னெடுக்கப்பட வேண்டும். அதற்கு உறுதியான கொள்கைப் பரப்புரையே இப்போதைய அவசியமாகும்.

ஒரு அரசியல் கட்சிக்கான அடிப்படை கொள்கை, கொள்கை உணர்ந்த உறுப்பினர்கள், உறுப்பினர்களுக்கென தகுதி, அவர்களின் பணி, அர்ப்பணிப்புக்கு ஏற்ற வகையில் பதவிகள், கட்சியின் முடிவுகளை எடுப்பதிலும், அவற்றை விமர்சிப்பதிலும் உரிமைகள் என்ற அடிப்படையில் ஒரு கட்சியின் உறுப்பினர் சேர்ப்பு இருப்பதுதான், ஒரு கட்சியை ஜனநாயகத் தன்மையோடும், கொள்கையிலிருந்து மாறாமலும் நீடிக்கச் செய்யும்.

# ஆம் ஆத்மியின் பயணத்தில், இது ஒரு சருக்கலாகும் ...

திமுகவினரின் 'நம்பிக்கை' ...

திமுக தென்மண்டல அமைப்புச் செயலாளர் அழகிரியின் பேட்டியும், அதைத்தொடர்ந்து நடக்கும் உட்கட்சிப் பூசல்களும் மையமான செய்தியாகின்றன.

அழகிரியின் பேட்டியை உற்று கவனித்தால் அவரிடம் எந்த அரசியல் லட்சியமும் இல்லை என்பது வெளிப்படையாகவே தெரியும். அவரைப் போன்றவர்கள், திமுக தலைவரின் மகன் என்பதாலேயே அதிகார மையங்களாக உருவெடுத்தது, ஏதோ கட்சித் தலைவரின் பலவீனம் மட்டுமல்ல.

சில பத்தாண்டுகளுக்கு முன்பு வரை தமிழகத்தில் சமூக சீர்திருத்த விருப்பம் கொண்டிருந்த பகுத்தறிவாளர்களின் உறுதியான ஆதரவை திமுக பெற்றிருந்தது. ஆனால், அந்தத் தளம் சிதைவைச் சந்தித்துவருகிறது. இதுவெல்லாம் ஏதோ சில நாட்களில், சில ஆண்டுகளில் நடைபெற்றவை அல்ல.

எந்த ஒரு அரசியல் இயக்கமும், லட்சக்கணக்கானோரின் லட்சியங்களுக்கு, உயிர் வடிவம் கொடுத்தே உயர்ந்தோங்குகிறது. அப்படித்தான் திமுகவும் தன் வெற்றிகளைப் பரித்தது. இப்போது, அப்படிப்பட்ட முழக்கங்கள் அவர்களிடம் மிச்சமிருக்கிறதா? அந்தக் கனலை அணையாமல் காக்கிறார்களா? என்பது மையமான கேள்வி.

இப்போது ஏற்பட்டுவரும் சரிவிலிருந்தும், அரசியல் ராஜ தந்திரத்தால் இயக்கத்தின் தலைவர்கள் திமுகவை மீட்டு எடுப்பார்கள் என்று அதன் ஆதரவாளர்கள் நம்புகிறார்கள். அவர்கள் நம்பட்டும்.

ஒன்று நிச்சயம் ... வெற்று நம்பிக்கைகள், பகுத்தறிவல்ல.