Sindhan.Blogspot

வாகை சூடிட ... வா தோழா ...!

2011-10-08T22:06:00.000-07:00

மூடத்தனங்களும், ஏழ்மையும், அறியாமையும் ஒருசேரக் குடிகொண்டிருக்கும் கிராமம் அது. கிராமம் முழுவதும் செங்கல் சூளை. சூளையை அமைத்துக் கொடுத்த சூத்திரதாரிக்கு இப்போ புத்தி பேதலிச்சிடுச்சு. ’நாம பார்த்து வாழ்ந்த காடு, சூளைக்காக வெட்டி வெட்டி இப்போ குருவிக்கும் கூடில்லாத செம்மண் புழுதியாகிப் போச்சேங்கற வருத்தத்துல...!’ அவர் அப்படியாயிட்டாரு. அவர் போனா என்னங்க, ஆண்டை இருக்காரு, அவரு குடுக்குற அட்வான்சு பணம் இருக்கு, காலமெல்லாம் அவருக்கே உழைச்சுக் கொட்டி பொழச்சுக்கலாம் என்ற நம்பிக்கையில் வாழ்ந்தாங்க அவங்க .... இப்படி அடிமைகளா வாழ்ந்த மக்களைத் தேடி, ஒரு ஆசிரியரும், ரேடியோ பெட்டியும் வருகிறது.

நவீன கருவிகளும், கல்வியும், மனசு நிறைந்த மனித நேயமும் கொண்ட ஒரு இளைஞனின் ஆளுமை, அந்த கிராம மக்களின் காலத்தையே புரட்டிப் போடுது. சுறுக்கமாச் சொன்னா, பண்ணையடிமை நிலையில் சிக்கித் தவிக்கிற மக்கள் எப்படி தங்கள் உழைப்பிற்கு கூலி கணக்கிட்டு வாங்கும் உரிமையை அடையறாங்கன்றதுதான் கதை.

இன்னமும் இந்தியாவின் ஏராளம் கிராமங்கள் இப்படி சுதந்திரமே பார்த்திராத கிராமங்களாய் இருக்கின்றனவே என்ற மனப்பாரமும், இந்த நிலையை மாற்றிட நாம் மனதுவைத்தால் முடியும் என்ற நம்பிக்கையையும் ஒருசேர விதைக்கிறது படம். இயக்குனர் சற்குணத்திற்கு பாராட்டுக்கள். படத்தின் உணர்வுகள் அனைத்தையும் சிந்தாமல் சிதராமல் வடித்திட்ட இசையமைப்பாளர் ஜிப்ரான், ஒளிப்பதிவாளர் ஓம் பிரகாஷ், கவிஞர் வைரமுத்து உள்ளிட்ட அனைத்து தொழில்நுட்பக் கலைஞர்களுக்கும் வாழ்த்துக்கள்.

படத்தில் முத்திரைபதிக்கும் இன்னொரு விசயம் என்றால் கதாநாயகி இனியா, ’இதுதான் தமிழ்நாட்டு அழகு’ இப்படி ஒரே வரியில சொல்லலாம். ஆனாலும் அதுமட்டும் போதாது, படத்துல வாரதுபோலவே, கண்டெடுத்தான் காட்டு கல்லுக்கு இணையா வேறெதுவும் நிக்காதுங்கறது எத்தனை உண்மையோ, அதைப் போலவே இந்த நாயகியின் படைப்பை மிஞ்சிட இன்னொரு படைப்பு அத்தனை சீக்கிரம் வெளிவந்திடாது.

இந்தப் படத்தைப் பார்த்து உங்களுக்குள் ஒரு கிளர்ச்சியும், பாலை வனத்தின் நடுவே ஏராளம் தண்ணீரைக் கண்ட தவிப்பும் ஏற்படுமானால், நாம் தோழர்களாகிவிட்டோம் என்றுதான் சொல்ல வேண்டும்.

படம் திரையரங்கிலேயே வாகை சூடும் என்று நம்பிக்கையோடு சொல்லலாம். தொலைக்காட்சிகளில் விளம்பர இடைவேளைக்கிடையே திரையிடப்படும். இருந்தாலும், கிராமங்களின் ஒவ்வொரு வீதிகளிலும், கல்லூரி இளைஞர்களின் மத்தியிலும் ஒரு இயக்கமாகவே எடுத்துச் செல்ல வேண்டும். கதை நடக்கும் களம் 1966களின் துவக்கம். சுதந்திரம் 1947இல் கிடைத்திட்டதா சொன்னாலும், அந்த கிராமத்திற்கு இந்தப் படம் முடியும் தருவாயில்தான் சுதந்திரமே சென்று சேர்கிறது.

இப்படி, இதுவரைக்கும் சுதந்திரமே சென்றடைந்திடாத கிராமங்கள் ஏராளம் இருக்கின்றன. உரிமைகளையே அடைந்திடாத மக்கள் கோடிக் கணக்கில் இருக்கிறார்கள். அங்கெல்லாம் வெளிச்சம் பற்ற வேண்டுமானால், இந்த நெருப்பு நமக்கு உதவிடும்.

அதுவே புரட்சி...

2011-09-20T07:49:00.001-07:00

விவசாயிகளும், தொழிலாளர்களும் - ஏகாதிபத்தியத்தின் முன்னும், பெரும் நிறுவனங்கள் முன்பும் மண்டியிடுவதை எதிர்த்துக் களம்காணும் உற்பத்தியாளர்களும் - சாதி அடிமைச் சிந்தனைக்கு எதிராகவும், மதவாத அயோக்கிய அரசியலை வீழ்த்திடவும் கிளர்ந்தெழும் மனிதர்களும் - சமத்துவ லட்சியத்திற்காக - விடுதலைக்காய் இணைந்திடும் பெண்டிரும் - தன் சொந்த நலன்களை உதறித் தள்ளி இணையும் இள மாந்தர்களும், கிளர்ச்சி செய்திட - எம் மேல் நின்று அதிகாரத்தை செலுத்திடும் எத்தகைய சக்தியும் நொருங்கி வீழும். அதுவே புரட்சி. அக்கணமே எழும்பிடும் மக்கள் தேசமாய் எம் இந்தியா.

குடும்பச் சிறையும் - சமூக மாற்றமும் ...

2011-06-26T02:08:00.001-07:00

மனைவியை விரல்களை மடக்கி, கையால் குத்திவிடலாம். பின்னர், பரிசுகள், அன்பளிப்புகள் வழங்கலாம். இவை மூலம் அவரை ஆற்றிவிட முடியாது.

தொழிலாளருக்கு அதிக கூலி, வேலைத் தளத்தில் சில சலுகைகள் கொடுக்கலாம். இவைகள் விடுதலை கொடுத்துவிடாது.

பெண்களும் தொழிலாளார்களும், தம்மை ஒடுக்குபவரின் ஆதிக்கத்தை முறியடிக்க வேண்டும். தம்மை அடக்குபவரின் இரும்புப் பிடியில் இருந்து விடுபட்டு, புதிய வாழ்வைக் கட்டியெழுப்ப வேண்டும்

- மைக்கேல் டி.ஜேட்ஸ்

(”குடும்பச் சிறையில்” என்ற நாவல் படித்துக் கொண்டிருக்கிறேன். அது இப்படியான வாசகத்துடன் துவங்குகிறது)

சமூக மாற்றத்திற்கு போராடும் நாம், முதலாளித்துவத்தின் சுரண்டலையும், நிலப்பிரபுத்துவ சாதி ஆதிக்கத்தையும் எந்த அளவு எதிர்க்கிறோமோ. அதை விடக் கடுமையான முறையில், ஆணாதிக்கத்தை அடித்து வீழ்த்த வேண்டும். ஏனென்றால், எதிரே நிற்கும் எதிரியை விட, உள்ளிருந்து தாக்கும் எதிரி கடுமையானவன்.

சே குவேரா ... உன் நினைவுகள் எழுதிய உறுதிமொழி

2011-06-14T03:50:00.000-07:00

அன்புள்ள செ குவேரா,

இது உன் பிறந்தநாள்

மட்டுமல்ல.

ஏகாதிபத்தியத்தின்

நுகத்தடியில்

அடிமைப்பட்டுக் கிடந்த

தேசங்களின்

எழுச்சியின் துவக்கப் புள்ளி.

இதோ உனது பாதையில்

ஆயிரமாயிரமாய்

இளைஞர்கள் புறப்படுகிறோம்.

அந்த ஏகாதிபத்திய

நரிகளின்

கோரைப் பற்களை எதிர்த்து,

ஒரு தலைமுறையாய் ....

தலைமுறையாய் எழுவோம்.

எங்கள் தேசங்களின்

தலைவிதியாய் எழுதப்பட்ட

சோகங்களுக்கு எதிராக ...

பட்டினிகளின் மேல்

பட்டுக் கம்பளம் விரித்திருக்கும்

ஆட்சியாளர்களை வீழ்த்துவோம்

மீண்டும் ஏந்துவோம்

எங்கள் எதிர்காலத்திற்கான

முழக்கங்களை

ஊழல் மலிந்த

தேசங்களின் வரலாற்றை

இளைய கரங்கள் திருத்தி எழுதும் ...

இந்தச் சிறையில் அமைதிகாண்பவர்கள் ...

2011-05-29T03:18:00.001-07:00

சிம்பிர்ஸ்க் நகர ஆலயத்தின் அருகில் அவர்கள் நடந்துகொண்டிருந்தார்கள். மடாலயத்தைப் பார்த்து தனது நண்பர் டி.எம்.ஆந்திரியேவிடம் விளாதிமிர் கூறினார்,
“மனிதர்கள் உயிருடன் தம்மை புதைத்துக் கொள்வது இங்குதான். இந்தச் சிறையில் அவர்கள் அமைதி காண்கிறார்கள் என்றால், அவர்களது நிலைமை எவ்வளவு பரிதாபத்திற்கு உரியது?” ....

(பேராசிரியர் அருணன் எழுதிய - ”லெனின் வாழ்வும் மரணமும்” புத்தகத்தில் இருந்து)

நமக்கு மின்வெட்டு: செல்போன் கம்பெனிகளுக்கு மானியம் !

2011-05-21T05:59:00.000-07:00

மின்வெட்டும் விலையேற்றமும் வாட்டுகிறது மக்களை:

செல்போன் கம்பெனிகளின்

ஜெனரேட்டர்களுக்கு மானியம்!

தமிழகத்தின் தொழிலும், விவசாயமும் கடும் பாதிப்பில் சிக்கியபோது திமுக தலைமையில் செயல்பட்டுவந்த அரசு, தொழில்களை மேம்படுத்த நடவடிக்கை எடுக்காமல் பன்னாட்டு நிறுவனங்களுக்கு மட்டும் தடையில்லா மின்சாரம் வழங்குவதாக புரிந்துணர்வு ஒப்பந்தங்கள் ஏற்படுத்தியது. இப்போது காங்கிரஸ் அரசோ, தன் பங்கிற்கு பெட்ரோல் விலையை உயர்த்தியதுடன், கேஸ், டீசல் விலையை உயர்த்திடவும் தயாராகியுள்ளது. அத்துடன், ஏழை மக்களுக்கு வழங்கப்படும் பல்வேறு மானியங்களைச் சுட்டிக்காட்டி, அவற்றை குறைக்கவேண்டும் எனவும் ஆட்சியாளர்கள் பேசிவருகின்றனர்.

ஏழை மக்களுக்கு அரசு உதவி கேட்டால் எட்டிக்காயாய்க் முகம் சுழிக்கும் மத்திய அரசு. தனியார் செல்போன் கம்பெனிகளுக்கு மட்டும் பின்வாசல் வழியாக உதவிகளை அள்ளி வழங்கிவருகிறது. அதுவும் ஏற்கனவே கொள்ளை லாபத்தில் இயங்கிவரும் இந்த நிறுவனங்கள் அரசு உதவியிலும் திளைத்துவருகின்றன.

இந்த உண்மை, கிரீன் பீஸ் என்ற தன்னார்வ அமைப்பு அரசிடம் வழங்கியுள்ள புகார் மனுவில் வெளிப்பட்டுள்ளது. அந்த புகாரில், “தனியார் செல்போன் நிறுவனங்களின் டவர்களுக்கு வைக்கப்படும் ஜெனரேட்டர்களில் பயன்படுத்தப்படும் டீசலுக்கு ரூ.7 முதல் ரூ.11 வரை மானியம் கிடைக்கிறது. இதனால் அவர்களுக்கு மட்டும் எரிபொருள் செலவு 21 சதவீதம் குறைகிறது.” என்று குறிப்பிட்டுள்ளனர். அதாவது அத்தியாவிசய உணவுப்பொருட்களை ஏற்றிச்செல்லும் வாகனங்களுக்கும், விவசாயத்திற்கும் மானிய விலை பெட்ரோலை அரசு வழங்குவதில்லை. தனியார் செல் நிறுவனங்கள் இந்த மானிய உதவியை முழுமையாக அனுபவிக்கின்றனர். 2010-2011 ஆண்டுகளில் 300 கோடி லிட்டர் டீசலை இந்த நிறுவனங்கள் பயன்படுத்தியுள்ளன.

இவ்வளவு டீசலை ஜெனரேட்டர்களுக்கு உபயோகித்தால், 5.6 டன் (5600 கிலோ) கார்பன் டை ஆக்சைடு காற்று மண்டலத்தில் கூடும். இது சுற்றுச்சூழலுக்கும் கடும் பாதிப்பு ஏற்படுத்தும். அத்துடன் சாதாரண மக்களுக்கு எந்த பயனையும் அளிக்கப்போவதில்லை. 15 ஆயிரத்து 200 கோடிக்கு டீசல் வாங்கும் அந்த நிறுவனங்களுக்கு 2 ஆயிரத்து 600 கோடி மானியமாக கொடுக்கப்படுகிறது. இந்த மானியத்தை பெறும் ரிலையன்சு உள்ளிட்ட சில செல்போன் நிறுவனங்கள், தாங்களே பெட்ரோலிய நிறுவனங்களை சொந்தமாகக் கொண்டிருப்பதன் மூலம் அதிக லாபத்தை அடைகின்றனர் எனவும் கூறப்படுகிறது. கோவை, திருப்பூர் போன்ற தொழில் நகரங்கள் மின்வெட்டால் கடும் பாதிப்பை சந்தித்துள்ளன. சிறு, குறுந்தொழில்கள் இதுவரைக்கும் ரூ.15 ஆயிரம் கோடி இழப்பை சந்தித்திருப்பதாக டேக்ட் என்ற அமைப்பு தெரிவித்துள்ளது. இது தொழிலாளர்களுக்கு வேலை இழப்பையும் ஏற்படுத்தியுள்ளது. அதேபோல பெட்ரோல் டீசல் விலையேற்றம், பேருந்துக் கட்டண உயர்வு, ஆட்டோ போக்குவரத்து கட்டண உயர்வு என்ற உடனடி விளைவுகளை ஏற்படுத்துவதுடன், அத்தியாவிசயப் பொருட்களின் விலையேற்றத்தையும் ஏற்படுத்துகிறது. ஆனால், இந்த விலையேற்றத்தை தவிர்க்கும் வகையில், பெட்ரோல் டீசல் மீது விதிக்கப்பட்டுள்ள வரியை குறைக்க மாட்டேன் என அரசு பிடிவாதம் பிடிப்பதும் குறிப்பிடத்தக்கது.

(ஆதாரம்: தி இந்து 19.05.2011)

ஊடகங்கள் கொன்றழித்த பட்டினிக் கூக்குரல்கள் !

2011-02-24T01:35:00.000-08:00

சுதந்திர இந்திய வரலாற்றில் முன் னெப்போதும் இல்லாத அளவிற்கு லட்சோப லட்சம் தொழிலாளர்கள் பங்கேற்ற மாபெரும் பேரணி தில்லி யில் புதனன்றுநடைபெற்றது. ஆனால், எகிப்து, லிபியா ஆர்ப்பாட்டங்களைப் பற்றி செய்திகள் வெளியிட்டு சிலாகிக்கும் பத்திரிக்கைகள் இந்த செய்தியை வெளியிடவே இல்லை.

இந்தியாவில் தலைநகரில் வேலைகொடு, உணவுகொடு என்ற கோரிக்கையுடன் லட்சக்கணக்கான பட்டினி மனிதர்கள் திரண்டு முழக்கமிட்டால் அது சும்மாவா? தொழிலாளிவர்க்கத்தின் குரல் வளையை உடைக்கும் விதமாக செய்தியை நீர்த்துப் போகச் செய்தும், படங்களை மட்டும் வெளியிட்டும் தேசிய பத்திரிக்கைகள் செய்திருக்கின்றார்கள். ஆனால் உண்மையில் அந்த பேரணியில் பிரம்மாண்டத்தை சர்வதேச ஊடகங்களின் புகைப்படங்களிலும் செய்திகளிலும் பார்க்கலாம்.

முகநூல் புகைப்படங்கள்

சொந்த நாட்டின் எழுச்சியை மறைக்கும் இந்த ஊடகங்களின் உள்நோக்கம் புரிபடுகிறது. பார்ப்போம், எத்தனை நாளைக்குநிலை இப்படித்தொடருமென்று.

உன்னத அரசியலின் ஒரு துளி ... !

2011-02-11T03:08:00.000-08:00

இ.எம்.எஸ். நம்பூதிரிபாட்: தேர்ந்தெடுக்கப்பட்ட பிரண்ட்லைன் கட்டுரைகள் என்ற புத்தகம் படித்துக் கொண்டிருக்கிறேன். விடுதலைப் போராளி நெல்சன் மண்டேலா பற்றிய கட்டுரையில், ”என் குடும்பத்தை விட மேலான இடத்தில் என் நாட்டு மக்களை வைப்பதை துவக்கத்த்தில் நான் தேர்வு செய்யவில்லை. ஆனால், நாட்டு மக்களுக்கு கடமையாற்ற முயலுகையில், ஒரு மகனாக, ஒரு சகோதரனாக, ஒரு தந்தையாக, ஒரு கணவனாக கடமையாற்றுவதிலிருந்து தடுக்கப்படுவதைக் கண்டேன்....

லட்சோபலட்சம் தென்னாப்பிரிக்க மக்கலுக்கு நான் ஆற்ற வேண்டிய கடமைக்காக நான் மிக நன்றாக அறிந்த நேசித்த என் குடும்ப மக்களின் வாழ்வைப் பலிகொடுக்க நேர்ந்தது. அது மிக எளிமையான விசயம்தான், இருந்தாலும் .... சிறு குழந்தை தன் தந்தையைக் கேட்கிறது “எங்களுடன் இருக்க உங்களால் ஏன் முடியாது?” அப்போது அந்த தந்தை வேதனை மிகுந்த அந்த சொற்களைக் கூறுகிறார், “உன்னைப் போலவே குழந்தைகள் இருக்கின்றன, ஏராளமான குழந்தைகள் ...”

படிக்கும்போது இப்படித்தான் தோன்றியது... மகத்தான மனிதர்கள் உறுவாக எத்தனை குடும்பங்களின் தியாகம் காரணமாய் அமைந்திருக்கிறது. தங்களின் சின்னச் சின்ன சந்தோசங்களைக் கொண்டு அவர்கள் மிகச்சிறந்த வருங்காலத்தை கட்டமைக்கிறார்கள். இன்றைக்கு அரசியலை தன் வழியாகத் தேர்ந்தெடுக்கும் இளைஞர்கள். அப்படியானதொரு லட்சிய வேட்கையை ஏந்திக்கொள்ள வேண்டும்.

பலூனில் ஏறிப் பயணிக்கலாமா?

2010-12-27T07:08:00.000-08:00

பலூனை ஊதி, காற்று வாயை அடைத்துப் பிடித்துக்கொண்டு, சட் டென விட்டால் பலூன் வீரிட்டுப் பறக்கும். சின்ன வயதில் எல்லோருமே இந்த விளையாட்டைச் செய்திருப்போம். அந்த பலூன் மீதி ஏறி பயணம் செய்ய முடிந்தால் ... எவ்வளவு நல்ல கற்பனை. இதைத்தான் சாத்தியமாக்கியிருக்கிறது விஞ்ஞானம்.

பெட்ரோல், டீசல் வாகனங்களின் மூலம் ஏற்படும் சுற்றுச்சூழல் பாதிப்புகள் மற்றும் புவி வெப்பமயமாதல் பிரச்சனைகளுக்கு மாற்றாக மின் சக்தி, உயிரி எரிபொருள் ஆகிய தொழில் நுட்பங்களின் வரிசையில் காற்றழுத்த தொழில்நுட்பமும் இடம் பிடித்துள்ளது. ஆரம்பப் பாய்ச்சலிலேயே முந்திக்கொண்டு செல்கிறது என்றும் சொல்லலாம்.

தெற்கு பிரான்சைச் சேர்ந்த எம்டிஐ நிறுவத்ததினர் 10 ஆண்டுகளாகவே இதுகுறித்த ஆய்வுகளில் இறங்கிவந்தனர். கடந்த 2003 ஆம் ஆண்டு முதலே இவ்வகைக் கார்கள் குறித்து செய்திகள் வெளியாகின. இருப்பினும், இந்த ஆண்டுதான் இவ்வகைக் கார்கள் சந்தைக்கு வந்துள்ளன. இனிவரும் காலங்களில், சந்தையின் போக்கை மாற்றும் முக்கியத் தொழில்நுட்பமாக இது இருக்கும் என்று எதிர்பார்க்கப்படுகிறது. முதல் கட்டமாக அவர்கள் 3 பேர் மற்றும் 5 பேரை ஏற்றிச்செல்லும் வகையிலான கார்கள், ஒரு டிரக் மற்றும் வேன் என 5 வகையான வாகனங்களை வடிவமைத்துள்ளனர். இதில் 3 பேர் செல்லும் வகையிலான கார் பலரது கவனத்தையும் ஈர்த்துள்ளது.

எப்படி செயல்படுகிறது?

90m3 அளவு கம்ப்ரஸ் செயப்பட்ட காற்று அதற்கான பைபர் பலூன்களில் சேமிக்கப்படுகிறது. இந்தக் காற்று அரை வெப்பநிலை பட்டவுடன் சூடாகி விரிவடையும். அவ்வாறு அழுத்ததுடன் வெளியாகும் காற்று விரிவடந்து இஞ்சினில் பொருத்தப்பட்டுள்ள பிஸ்டனை அழுத்துகிறது. காற்றுப்பையை சூடேற்ற தனியாக எந்த தொழில்நுட்பமும் தேவையில்லை. அழுத்தப்பட்ட பிஸ்டன் சுழன்று,கார் முன்னோக்கிச் செல்கிறது.

மின்சாரம், உயிரி எரிபொருள் என மாற்று எரிபொருள் திட்டங்களைக் காட்டிலும் எளிதான மாற்று எஞ்சின் தொழில்நுட்பம் எளிதானதாகும். இதில், சுற்றுச்சூழல் பாதிப்புகள் மிகவும் குறைவு. மேலும், இந்தவகை எஞ்சின்களில் காற்று அடைப்பதற்கான கருவிகளை, ஏற்கனவே உள்ள பங்குகளிலேயே நிறுவ முடியும். அதற்கு அதிக முதலீடு தேவையில்லை.

சிறப்பம்சங்கள்:

3 பேர் பயணம் செய்யும் வடிவில் அமைக்கப்பட்டுள்ள காற்றழுத்தக் காருக்கு, மினி கேட் (Mini C.A.T) என்று பெயரிட்டுள்ளனர். இதன் பாகங்கள் கணினி கட்டுப்பாட்டு மையத்துடன் இணைக்கப்பட்டுள்ளன. எனவே, ஓட்டுனரின் குரலுக்கு ஏற்ப கட்டுப்படுதல், இணையதள இணைப்பு, செல்போன் இணைப்பு, ஜிபிஎஸ் எனப்படும் இருப்பிடம் குறித்த தகவல்கள், ஓட்டுனரின் தன்மையைப் புரிந்து செயல்படுதல், அவசரகால அமைப்பு மற்றும் டிவி, பாடல் உள்ளிட்ட நவீன பொழுதுபோக்கு அம்சங்கள் நிறைந்ததாக வடிவமைக்கப்பட்டுள்ளது. ஒவ்வொரு பாகமும் மைக்ரோ கண்ட்ரோலர்களால் இணைக்கப்பட்டுள்ளது. இதனால், விளக்குகள் உட்பட அனைத்தையும் கணினி மூலமே இயக்கலாம்.

இந்தக் காரை திறக்க, சாவி போடத் தேவையில்லை. அதற்கான குறியீட்டெண் கொண்ட அடையாளத்தை பாக்கெட்டில் பொருத்திக் கொண்டால் போதும், நம்மை அடையாளம் கண்டு தானே திறந்துகொள்ளும். இவ்வாறு மென்பொருள் சார்ந்த இதன் வடிவமைப்பு புதிய தலைமுறையை அதிகம் ஈர்க்கும்.

10 மடங்கு குறைந்த செலவு:

எத்தனையோ காரணங்கள் இருப்ப்பினும், இவ்வகைக் கார்களை நடுத்தர மக்கள் தேர்ந்தெடுக்க, அதான் குறைந்த எரிபொருள் மற்றும் பராமறிப்புச் செலவே காரணமாக அமையும் என்கின்றனர் இதன் வடிவமைப்பாளர்கள். இந்தக் காரில் பயணிக்க ,பெட்ரோலைக் காட்டிலும் 10 மடங்கு குறைந்த செலவே ஆகும். மின்சாரக் கார்களைக் காட்டிலும் இரண்டுமடங்கு அதிக மைலேஜ் கொடுப்பதாகவும் அமைந்துள்ளது. 60 கிமீ வேகத்துக்கு உள்ளாக பயணிக்கும் 80 சதவீதம் வாடிக்கையாளர்கள் இந்தக் காரை விரும்புவதாக தெரிவித்துள்ளனர். 100 ரூபாய்க்கு காற்றுப்பிடித்தால் 300 கிலோமீட்டர் பயணிக்கலாம். காற்றைத்தவிர, 50 ஆயிரக் கி.மீ பயணத்திற்கு ஒருமுறை உராய்வைத் தடுக்குப்பதர்கான எண்ணெய் மாற்ற வேண்டியிருக்கும். காற்றழுத்தமே எஞ்சினின் சூட்டை 0-15 டிகிரி அளவுக்கு குறைத்துவிடுவதால் குளிர்சாதனத்திற்கென தனியாக மின்சக்தி தேவைப்படாது.என அவர்கள் தெரிவிக்கின்றனர்.

மேலும், எம்டிஐ நிறுவனத்தினர் இந்தக் காருக்கு உலகம் முழுவது கிடைத்துள்ள வரவேற்பினால் உற்சாகமடைந்துள்ளனர். ”10 வருடங்கள் ஆராய்ச்சிக்குப் பின்னர் ஒரு சிறந்த தொழில்நுட்பத்தை உருவாக்கியுள்ளோம். தற்போது, உலகில் ஐரோப்பா, அமெரிக்கா மற்றும் ஆசிய நாடுகளில் 50 கம்பெனிகளுடன் ஒப்பந்தங்கள் ஏற்படுத்தப்பட்டுள்ளன” என்று அவர்கள் தெரிவிக்கின்றனர்.

இந்தியாவில் கிடைக்குமா?:

ஒவ்வொருவருடமும் சுமார் 3 ஆயிரம் கார்களை தயாரிக்க எம்டிஐ நிறுவனம் திட்டமிட்டுள்ளது. இந்தியாவில் காற்றழுத்தக் கார்கள் தயாரிப்பதற்கான உரிமத்தை டாடா குழுமத்தினர் பெற்றுள்ளனர். ”விலை குறைவானதாகவும், கையாள எளிதாகவும் சுற்றுச்சூழல் பாதுகாப்பானதாகவும் இருப்பதால், இந்தியச் சந்தைக்கு இவ்வகைக் கார்கள் ஏற்றதாக இருக்கும்” என்று அவர்கள் கருதுகின்றனர்.

பொதுத்துறை நிறுவனங்கள் தயாரித்தால், கார்களை ரூ.2 லட்சத்திற்கு சந்தையில் விட முடியும். இருப்பினும், இதன் உரிமத்தை தனியார் வைத்திருப்பதால், சந்தை விலை மேலும் கூடுதலாகலாம் என்பதுதான் வருத்தமளிக்கிறது.

கத்திரிக்கா விலையை குறைக்க என்ன செய்யலாம்?

2010-12-19T01:05:00.000-08:00

தலைப்பைப் பார்த்ததும் உங்களுக்கு இது ஏதோ நகைச்சுவைக் கட்டுரையாகப் படலாம். ஆனால், கத்திரிக்காய் உள்ளிட்ட காய்கறிப் பொருட்களின் விலை கடுமையாக உயர்ந்திருக்கும் நிலையில், காய்கறிகளின் விலையை கட்டுப்படுத்தும் முயற்சிகள் குறித்த சிந்தனை மிக அவசியமானதாக இருக்கிறது.

பொருளாதார நெருக்கடிகள் வரும்போது, பெருநிறுவனங்களுக்குச் சலுகைகளை வாரி வழங்கும் முதலாளித்துவ நாடுகள், ஏழை மக்களுக்கான மானிய உதவிகளை வெட்டுகின்றன. இங்கிலாந்து கூட தற்போது அத்தகைய திட்டங்களைத்தான் வகுத்து வருகிறது. இந்தியாவிலும், உரத்துக்கான மானியம் வெட்டப்பட்டபோது , அதற்கு எதிராக கேள்வியெழுப்பிய மக்களிடம் ஆட்சியாளர்கள் ”கையில் காசில்லையென பதில் சொல்லிப் பசப்பினார்கள். ஆனால், இத்தகைய சமயங்களில், சீனா, கியூபா போன்ற சோசலிச லட்சியத்தை நோக்கி நடைபோடும் நாடுகளின் செயல்பாடுகள் வித்யாசமாக உள்ளன.

குறிப்பாக, மேலே பேசிய காய்கறி விலை உயர்வுப் பிரச்சனைகள் தீர சீன உள்ளாட்சிகள் செயல்படுத்திவரும் திட்டங்கள் புதிய திசையைக் காட்டுபவையாக உள்ளன.

இதுகுறித்து விரிவானதொரு செய்தியை சீன வானொலி நிறுவனம் வெளியிட்டுள்ளது. காய்கறி விலைவாசி உயர்வையடுத்து சீன அரசு விலையை கட்டுப்படுத்துவதற்கான திட்டத்தை வெளியிட்டது. அதன்படி, வேளாண்பொருட்கள் வாணிபக் கழகங்களில் காய்கறி விலைக்கட்டுப்பாடு குறித்த கொள்கை அமலாக்கம் குறித்து விவாதித்துள்ளனர். அதனடிப்படையில், காய்கறிவிலைக் கண்காணிப்பு மற்றும் எச்சரிக்கை முறைமயத்தை ஏற்படுத்தியுள்ளனர். இக்குழுவின் நடவடிக்கைகளுக்குப் பின்னரும் காய்கறியின் விலை தொடர்ந்து 50 சதத்துக்கு மேல் அதிகரித்தால், அவசரநிலை சமாளிப்புக் கொள்கைகள் நடைமுறைப்படுத்தவும் முடிவுசெய்தனர். என்று குறிப்பிட்டுள்ளனர். இக்கொள்கைகளை அமல்படுத்தியதில் இந்த நிலையில் தற்போது அங்கு காய்கறிகளின் விலைகள் 30 முதல் 40 சதவீதம் வரை குறைந்துள்ளன. என்றும் அச்செய்தியில் தெரிவிக்கப்பட்டுள்ளது.
அவர்கள் எடுத்திருக்கும் நடவடிக்கைகள், ஆக்கப்பூர்வமானதாகவும், எந்தவகையிலும் மக்களின் பொருளாதாரத்தை ஏதேச்சதிகாரமாக தலையிடாதவையாகவும் உள்ளன. ஆன்சூய் மாநிலத்திலுள்ள ”ஷெ” மாவட்ட நிர்வாகம் காய்கறி பயிரிடுவதற்கான சிறப்பு நிதியை ஒதுக்கியுள்ளது. அந்த நிதியில் அவர்கள் காய்கறிப் பயிரிடும் நவீன கூடாரங்களை ஏற்படுத்தப்படுத்தியுள்ளனர். அந்தக் கூடாரங்கள் விவசாயிகளுக்கு வாடகைக்கு வழங்கப்பட்டுளன. இதன்மூலம் உற்பத்தியாகும் கூடுதலான காய்கறிகள் விநியோகத்தை உத்திரவாதப்படுத்தும் வகையில் யுன்னான், சிச்சுவான் மற்றும் ஹனான் ஆகிய மாநிலங்களுடனும் அவர்கள் ஒப்பந்தபோட்டுள்ளனர். விவசாய உற்பத்தியை ஊக்கப்படுத்துவதுடன், அப்பொருட்களுக்கான சந்தையையும் அவர்கள் ஏற்படுத்தித் தருவதன் மூலம் விலையேற்றப் பிரச்சனைக்கு தீர்வுகண்டுள்ளனர்.
ஹபெய், ஷென்துங், லியாவ்நிங் ஆகிய மாநிலங்களிலும் இதேபோன்ற தீவிர நடவடிக்கைகளின் மூலம் தானியங்கள், இறைச்சி, எண்ணெய் மற்றும் காய்கறி விலைகளை கட்டுப்படுத்தியுள்ளனர்.
அதே நேரத்தில், காய்கறி உற்பத்திக்கு பிற மாநிலங்களைச் சார்ந்திருக்கும் நிலையில் உள்ள லியாவ்நிங் மாநிலத்திற்குட்பட்ட தாலியென் நகராட்சி, உடனடி நடவடிக்கையாக சிறுவணிகர்கள் விலையைக் குறைத்து விற்கும் வகையில் ”மானியம்” வழங்கும் திட்டத்தை செயல்படுத்தியுள்ளனர். இந்த நடவடிக்கையினால், சிறுவணிகர்களுக்கு பாதிப்புக் குறைக்கப்பட்டுள்ளதுடன் மக்களுக்கும் குறைந்த விலையில் காய்கறிகள் கிடைத்துவருகிறது. இந்த நகரத்தின் காய்கறித்தேவையில் 30 சதவீதமே உள்ளூர் விளைச்சலாகும், இதனால், உள்ளூர் விவசாயிகளுக்கு பாதிப்பு ஏற்படுவதைத் தடுக்கும் வகையில் அவர்களுக்கான நிர்வாகக் கட்டணத்தையும் அரசு குறைத்துள்ளது. இந்த நடவடிக்கைகளால் தாலியென் நகரத்தில் சந்தை விநியோகம் 50 சதம் அதிகரித்துள்ளது. விலைவாசி 20 குறைந்துள்ளது.
அதேபோல, ஹனன் மாநிலத்தில் சங்க்சோ நகரத்தில் வேளாண் பொருட்கள் நேரடி வாணிபக் கழகத்தை ஏற்படுத்துவதற்கான தீவிர நடவடிக்கைகளில் இறங்கியுள்ளனர். அத்துடன் நியாயவிலைக் கடைகளையும் அவர்கள் ஏற்படுதிவருகின்றனர்.
இந்த நடவடிக்கைகளை அந்த நாட்டின் உள்ளாட்சி நிர்வாகங்கள், தங்கள் நிலைக்கு ஏற்ப நடைமுறைப்படுத்தியுள்ளனர். சீனா ஒரு சர்வாதிகார நாடு என்று முதலாளித்துவ ஊடகங்கள் பிரச்சாரத்தை பரப்பிவரும் நிலையில், சீன உள்ளாட்சிகளின் இத்தகையை நடவடிக்கைகள் குறித்த மேற்கண்டசெய்தி அந்த பிம்பத்தின் மீதும் அழுத்தமான கேள்வியை எழுப்புகிறது.

காய்கறி விலையைக் கட்டுப்படுத்துவதில், சீனாவின் உள்ளாட்சிகளே இத்தனை ஆரோக்யமான நடவடிக்கைகளை எடுக்க முடியுமானால், இந்திய அரசால் ஏன் அதைச் செய்ய முடியாது?.

பிற்சேர்க்கை: இந்தச் செய்தியை அடித்துக் கொண்டிருக்கும் சமயத்தில் “விதைப்பூண்டு” விலை மேட்டுப்பாளையம் மொத்த ஏலச் சந்தையிலேயே ரூ.350 வரை உயர்ந்துள்ளதாக செய்திவந்தது.

பத்திரிக்கையாளர்கள் கொலை: வீடியோ காட்சி .... (விக்கிலீக்ஸ்)

2010-12-09T22:49:00.000-08:00

இதுபற்றி வாசிக்க ... [1] [2] [3] [4]

இராக் போரின்போது, போர் விதிமுறைகள் அப்பட்டமாக மீறப்பட்டுள்ளன. குறிப்பாக, ரூய்ட்டர்ஸ் செய்தி நிறுவனத்தின் 2 செய்தியாளார்களை, அதிகாரிகள் உத்தரவின் பேரில் சுட்டு வீழ்த்திய காட்சி இணையத்தில் வெளியாகியுள்ளது. ஒரு ஹெலிகாப்டரில் இருந்து வீடியோ பதிவாகிறது. அப்போது பின்னணியில் ஒருவர் நிருபர்கள் இருக்கும் இடம் நோக்கி திரும்பச் சொல்கிறார். பின்னர், மேற்கண்ட இரண்டு பத்திரிக்கையாளர்களை அடையாளம் காட்டி பேசுகிறார். சில நிமிடங்களில் அங்கு நோக்கி சரமாரி குண்டு பொழிகிறது. 12க்கும் அதிகமானோர் அங்கே செத்து மடிகிறார்கள். (வீடியோ இங்கே)

ரூய்ட்டர்ஸ் செய்தி நிறுவனம், அமெரிக்க அரசிடம், “தகவலறியும் உரிமைச் சட்டத்தில்” இந்த வீடியோக்களைக் கேட்டுள்ளது. ஆனால், பெண்டகன் அதிகாரிகள் வீடியோவை தர மறுத்துவிட்டனர். தற்போது விக்கிலீக்ஸ் இந்த உண்மைகளை வெளிப்படுத்தியுள்ளது. அதில் வெளியாகியுள்ள 38 நிமிட வீடியோவில், கொலைகள் நேரலையாக பதிவாகியுள்ளன. இராக் போரின்போது சுமார் 140 பத்திரிக்கையாளர்கள் கொலையுண்டது இங்கே குறிப்பிடத்தக்கது.

சமாதானமும், அமைதியும், பட்டினியற்ற வாழ்க்கையும் கொண்ட ஜனநாயக சமூகத்திற்கு கனவு காணும் சாதாரண மக்களிடம், அமெரிக்காதான் ஜனநாயக நாடு, அமெரிக்காவின் நட்பு தேவை என்று இந்திய ஆட்சியாளர்கள் வாதிடும்போதும், பத்திரிக்கைகள் அவர்களுக்கு ஒத்தூதி ஒபாமாவை வரவேற்கும்போதும், மேற்கண்ட உண்மை நம்மை ஆத்திரப்படுத்துகிறது. விக்கிலீக்ஸ்க்குப் பின்னரேனும், இந்த நிலை மாற்றப்பட வேண்டும்.

கூடுதல் செய்தி: விக்கிலீக்ஸ் மீதான சைபர் தாக்குதல்களையடுத்து சுமார் 3 ஆயிரம் மிரர்களில் விக்கி லீக்ஸ் இடம்பெயர்க்கப்பட்டுள்ளது.

உலகளாவிய உரிமைக்குரல் - 3

2010-11-13T00:21:00.000-08:00

Download pdf : - Go to page: I 1 I I 2 I I 3 I

வரலாற்றின் வேர்பிடித்து வருங்காலத்தை

செப்பனிடுவோம் வரலாற்றிணை

புரிந்துகொள்வது சிக்கலான பணி

என்றாலும் கடந்தகாலத்தை கொண்டு

தற்கால சமுதாயத்தின் நிலையை

மாற்றும் எண்ணமுடையோர்

அப்பணியை முக்கியமானதாகக்

கருதிச் செய்யவேண்டியுள்ளது.

உலகின் முதல் கம்யூனிஸ்ட் சதிவழக்கு

வழக்கு, சதிவழக்கு அதைத்தகர்த்தெரிவதற்கான ஆதாரங்கள், சாட்சிகள் என்ற நீதிமன்ற வளாகத்தை கடந்து சமூக அவலங்களையும் மோதல்களையும் இந்த சிறிய புத்தகம் விவாதிக்கின்றது. மார்க்சும் எங்கல்சும் நூலகங்களிலும், ஆய்வுக்கூடங்களில் இருந்துகொண்டு மட்டும் பணியாற்றவில் லை களத்தில் அமைப்புகளை உருவாக்கிசெயல்பட்டது. தொழிலாளர் இயக்கத்தை பகிரங்க இயக்கமாகவும், வெகுமக்கள் இயக்கமாகவும் மாற்றியது.கம்யூனிஸ்ட் லீக்கில் உருவான இடதுஅதிதீவிர போக்கை வெற்றிகொண்டது வழக்குகளை பிரச்சாரமேடையாக மாற்றியது, சதிவழக்குகளை அம்பலப்படுத்தியது என்ற ஐந்து தளத்தில் இப்புத்தகத்தை உள்வாங்கிக்கொள்ளலாம்.

ஒன்று, காரல்ம்ர்க்சும், ஏங்கல்சும் பாரிசில் தங்கி அங்கு ஐர்மானியிலிருந்த வந்து சிதறுண்டுகிடந்த தொழிலாளர்களை திரட்டிட முயற்சிஎடுத்தனர். அப்போது நீதியாளர் கழகம் என்ற அமைப்பு இருவரையும் தங்களது அமைப்பில் இணைய அழைத்தது.இதை ஏற்ற அவர்கள் இரகசிய அமைப்பை பகிரங்க அமைப்பாக்க வேண்டும் என்ற நிபந்தனையுடன் இணைந்து, அவ்வமைப்பை கம்யூனிஸ்ட் லீக் என்று பெயர் மாற்றி பகிரங்க அமைப்பாக்கினர். அதேநேரத்தில் ஐர்மனியில் வேட்டையாடப்பட்ட புரட்சிகர தொழிலாளர்கள் பாரிசிற்கு தப்பிவந்து வேலையின்றி நடைபாதை யிலும்,பூங்காக்களிலும்,தெருக்களிலும் முடங்கிக் கிடந்தனர். இவர்களை பாதுகாக்க மார்க்ஸும், எங்கல்சும் அகதிகள் குழு அமைத்து உதவிசெய்தனர்.

இரண்டு, பாரிசின் பலபகுதிகளில் மட்டுமல்ல ஐரோப்பாவிலும்கூட தொழிலாளர் குழுக்கள் ரகசியமாக மட்டுமே செயல்படுவது, சதிவேலைகள் மட்டுமே செயல்தளமாக இருந்ததை மாற்றி பகிரங்கமாக திட்டத்தின் அடிப்டையில் செயல்படும் இயக்கங்களாக உருவாக வழிவகுத்தனர். மூன்று, கம்யூனிஸ்ட் லீக் பகிரங்கமாக செயல்பட்டபோதே அவ்வமைப்பில் உடனடியாக கம்யூனிச புரட்சி நடத்த வேண்டும் என்ற எதார்த்தத்திற்கு புறம்பான அதிதீவிர போக்கை களைஎடுத்து லீக்கை காப்பாற்றினர்.

நான்காவதாக, கைதுகள் என்ற கட்டுரை எழுதியதற்காக மார்க்ஸ், எங்கல்ஸ், பதிப்பாசிரியர் கோர்ப் ஆகியோர்மீது தொடுக்கப்பட்ட வழக்கில் மார்க்ஸ் மூன்றுபேர்களுக்காகவும் வாதாடினார்.ஒவ்வொரு அதிகாரியும் தீங்கான நடவடிக்கை எடுப்பதை நீங்கள் அனுமதிக் கிறீர்கள்.அத்தீங்கை கண்டிப்ப வர்களை நீங்கள் தண்டிக்கிறீர்கள். தன் அண்டையிலுள்ள ஒடுக்கப்பட்டவர்களின் சார்பாக முன்வரவேண்டியது பத்திரிக்கை களின் கடமையாகும். ஜெர்மானியில் மார்ச் மாதம் நடைபெற்ற புரட்சி மேல்மட்ட சீர்திருத்தம் செய்துவிட்டு அடிமட்டத்தை அப்படியே வைத்துள்ளது......தற்போது பத்திரிக்கைகளின் முதல் கடமை நடப்பு அரசியல் அமைப்பின் அனைத்து அடித்தளங்களையும் தகர்த்தெரிய வேண்டும் என்பதாகும். என்று நீதிபதிகளுக்கு முன்னால் அக்கட்டுரையின் நியாயத்தையையும் பத்திரிக்கையின் சமூக கடமைகளையும் எடுத்துரைத்தார். நீதிமன்றத்தில் கூடியிருந்த தொழிலாளர்கள் வாழ்த்துக்களிடையே விடுதலை செய்யப்பட்டனர். மறுநாள் புரட்சிக்குத்தூண்டல் என்ற கட்டுரை எழுதியதற்காக மார்க்ஸ், ஷாப்பர், ஸ்னெய்டர் ஆகிய மூவர்மீதான வழக்கிலும் மார்க்ஸே வாதாடினார். புரட்சி என்பதை சட்டவடிவத்திற்குள் கட்டுப்படுத்திக்கொள்ள வேண்டும் என்ற உங்கள் கருத்தை ஏற்கமுடியாது என்றதுடன் சமூகம் என்பது சட்டத்தின் அடிப்படையில் அமைந்துள்ளது என்ற தங்களின் கருத்தை நிராகரிக்க வேண்டியுள்ளது என்று நீதிபதிகளை பார்த்து மார்க்ஸ் கூறினார். அத்துடன் சட்டம் அது குறிப்பிட்டகாலத்தில் நிலவும் பொருள்உற்பத்தி முறையிலிருந்து தோன்றுகின்றது. ஆகவே புரட்சி என்பது பழைய சட்டமேல்கட்டுமானத்தை அழிக்கும் ஜீவாதார கடமையை கொண்டுள்ளது என்று வாதங்களை முன்வைத்தார்.மன்னன் எதிர்ப்புரட்சி செய்தால் ஒருபுரட்சியின் மூலம் மக்கள் அதற்கு பதில்தரும் உரிமையை பெற்றுள்ளனர் என்றார். வழக்கிலிருந்து விடுதலைப்பெற்றனர். சட்டம் பற்றிய நீதிபதிகளின் கருத்துமுதல்வாத கருத்துக்களை தகர்த்து பொருள்முதல்வாதக் கருத்துக்களை நிலைநாட்டினார். அன்று நீதிமன்றத்தை மார்க்ஸ் மிகப்பெரும பிரச்சார மேடையாக மாற்றினார். வரலாறு நெடுகிலும் கம்யூனிஸ்ட்டுகள் இந்தப்பாதையை பயன்படுத்தினர். ஐந்தாவதாக, மார்க்ஸ், எங்கல்ஸ் மற்றும் பலர் விடுவிக்கப்பட்டாலும் அவர்களது பேச்சுக்களும், எழுத்துக்களும் கம்யூனிஸ்ட் லீக்கின் பணிகளும் பிரெஷ்யாவில் புரட்சியை கொண்டு வந்துவிடும் என்று பிரெஷ்ய அரசு அஞ்சியது. எனவே லீக் உறுப்பினர்கள் பத்துபேர்கள் மீது புரட்சிநடத்தமுயற்சித்ததாக சதிவழக்கை புனைந்து கைதுசெய்தது. மார்க்ஸ், எங்கல்ஸ் இருவரையும் இவ்வழக்கில் இணைக்க முயற்சி செய்தது. இவர்கள் இருவரும் லண்டனிலிருந்துகொண்டு பிரெஷ்யாவின் கோலோனில் நடைபெற்ற சதிவழக்கை முறியடிக்க பணியாற்றினர். இந்த வழக்கிற்கு தேவையான ஆதாரங்களை திரட்டி அவற்றை பலநகல்கள் (பலபேர்களை வைத்து எழுதவேண்டிய பணி) எடுத்து ரகசியமாக கோலோன் நகருக்கு அனுப்பிவைக்க வேணடிய பெரும்பணியை செய்தார்.இதற்காக தனது வீட்டையே அலுவலமாக்கினார். இந்த சதிவழக்கை பயன்படுத்தி டைம்ஸ் பத்திரிக்கை உட்பட பிரபலமான பத்திரிக்கைகள் கம்யூனிஸ்டுகள் மீது அவதூறுகளை அள்ளி வீசியது.கொளுத்துப்போன பிச்சைக்காரர்கள் கூட்டம் சதிகாரர்கள், கொள்ளைக்காரர்கள் என்று எழுதியது.இந்த பிரச்சாரத்தை முறியடிக்கும் வேலையையும் மார்க்ஸ்,எங்கல்ஸ் இருவரும் செய்தனர். பிரதானமாக மார்க்ஸ் தனது குடும்ப வருமானத்திற்காக எழதவேண்டிவைகளை நிறுத்திவிட்டு வழக்கிற்கான பணியில் இறங்கினார். கடந்த பலவாரங்களாக குடும்பத்தின் சாப்பாட்டிற்காக பாடுபடவேண்டியதற்கு பதிலாக அரசாங்கத்தின் நடவடிக்கையிலிருந்து கட்சியை பாதுகாக்கவேண்டிய வேலையை செய்ய வேண்டி இருந்தது என்று தனது நணபருக்கு எழுதினார். இதனால் குடும்பம் வறுமைக்கு ஆட்பட்டது. செருப்பில்லாததாலும், மேலேஉடுத்திக் கொள்ள உடை இல்லாததாலும வெளியேபோகமுடியாமல் வீட்டிலேயே முடங்கிகிடக்கிறேன் என்று தனது நண்பனுக்கு எதினார். வழக்கு நடைபெற்றபோது அவரது


கட்டுரையாளார்.ஏ.பாக்கியம்

கால்சட்டையும், காலணியும், கோட்டும் அடகு கடைக்கு சென்றிருந்தது.வெள்ளைத்தாள் வாங்குவதற்கே நிதிபற்றாக் குறையாக இருந்தது. மார்க்ஸ் மற்றும் அவர் குடும்பத்தின் வறுமைக்கிடையிலான உழைப்பாலும், அவர்களின் வழிவந்தவர்கள் தியாகத்திலும், அவர்கள் சிந்திய உதிரத்திலும், இழந்த வாழ்க்கையின் மேலேதான் நமது உரிமைகளும், சலுகைகளும் கிடைக்கப்பெற்றுள்ளது என்ற உணர்வு புத்தகத்தை படிக்கும்போது ஏற்படுகிறது. மேற்கண்ட ஆறு புத்தகங்களும் உலகின் முக்கிய வரலாற்று நிகழ்வுகளை நம்கண்முன் நிறுத்துகின்றது, சுமார் முன்னூறு ஆண்டு வரலாற்றின் ஆணிவேரை நோக்கி நம்மை அழைத்துச்செல்கின்றது. மாவோ சொன்னாரே உலகவரலாற்றை உருவாக்கும் உந்துசக்தி மக்கள்தான். மக்கள் மட்டுமேதான் என்றாரே அந்தவார்த்தைகளை இப்புத்தகத்த் படிப்பதன் மூலம் உணரமுடியும்.எனவே வரலாற்றின் வேர்பிடித்து வருங்காலத்தை செப்பனிடுவோம் வரலாற்றிணை புரிந்துகொள்வது சிக்கலான பணி என்றாலும் கடந்தகாலத்தை கொண்டு தற்கால சமுதாயத்தின் நிலையை மாற்றும் எண்ணமுடையோர் அப்பணியை முக்கியமானதாகக் கருதிச் செய்யவேண்டியுள்ளது.

உலகளாவிய உரிமைக்குரல் - 2

2010-11-13T00:09:00.000-08:00

Download pdf : - Go to page: I 1 I I 2 I I 3 I

பிரஞ்சு புரட்சியை சித்தரிக்கும் ஓவியம்

இரண்டாவதாக, இந்த மூன்றுபுத்தகங்களிலும் நிலபிரபுத்துவத்தின் கொடுமைகள் மனதை நெருடும் வகையில் விளக்கப்பட்டுள்ளது. மன்னர்களையும் மகாராஜாக்களையும் துதிபாடி மக்களாட்சியின் மகத்துவர்களாக சிததரிக்க முயலும் இந்தக் காலத்தில் நிலபிரபுத்துவத்தின் கோரமுகங்களை நினைகூர்வது நமது கடமை.

பிரஞ்சுப்புரட்சி புத்தகத்தில், நீதிபதிகளுக்கு பகிரங்கமாக விலை நிர்ணயிக்கப்பட்டது. 400 வகையான சட்டங்கள, சட்டத்திற்கு மேலே ஆளும் வர்க்கம் இருந்தது. அனைத்து சட்டங்களும் மூன்றாவது எஸ்டேட் என்று அழைக்கப்பட்ட 92 சதமான மக்கள் மீதான அடக்குமுறைக்கே பயன்பட்டது. சிறிய குற்றங்கள் அல்ல தவறுகளுக்குகூட சக்கரத்தை ஏற்றி எலும்பை முறிப்பது, கையை நறுக்குவது, காதுகளை அறுப்பது, என கொடிய தண்டனைகள் சாதாரணமாக நிறைவேற்றப் பட்டது.

தவளைகள் கத்துவதால் நிலபிரபுக்களின் தூக்கம் கெடுகிறது.விவசாயிகள் இரவெல்லாம் தவளைகளை விரட்டிட வேண்டும். மீறி தவளைசத்தம் கேட்டால் விவசாயிகள் காது அறுக்கப்படும். கடும் தண்டனைக்கு உள்ளாவார்கள். பட்டினியில் மடிந்து கொண்டிருந்த மக்கள் ஊர்வலமாக சென்று உணவுகேட்டபோதுஇதோஇங்கே இருக்கிற புல்லைத் திண்ணுங்கள் என்று கூறிய நிலபிரபுத்துவ அதிகாரிகள். இந்தியாவில் கூட உச்சநீதிமன்றம் தீர்ப்பளித்தாலும், எலி திண்ணாலும் திண்ணட்டும, அழுகி வீணாகினாலும் ஆகட்டும் ஏழைகளுக்கு உணவளிப்பது என் வேலை அல்ல என்று மன்மோகன் சிங் அடம்பிடித்தது லூயி மனனனை நமக்கு நினைவூட்டுகிறது,

இங்கிலாந்தில் கிராமங்களில் கோட்டை போன்ற இடங்களை உருவாக்கி விவசாயிகளை அதற்குள் வசிக்கவும் கட்டாயப்படுத்தினர்.வேலைசெய்யும் இடத்தை உருவாக்கி ஆண்கள் பெண்கள் குழந்தைகள் என தனித்தனியாக பிரித்து கல்உடைத்தல், எலும்புகளை பொடியாக்குதல், போன்ற கடின வேலைகளை கொடுத்தனர். கால்வயிறு உணவளிததனர். பட்டினி தாளாமல் அவர்கள் எலும்புளில் இருந்த மஜ்ஜைகளை நக்கித்தின்றனர். பட்டினியால் மடிந்தனர். ரஷ்யப்புரட்சி புத்தகத்தில் அடிமைகள் மற்றும் சார்மன்னனின் அடக்குமுறைகள் தொழிற்கூடத் திலும் கல்லூரிகளிலும் எப்படி இருந்தது என்பது விளக்கப்பட்டுள்ளது. தூக்குமேடைகள், நாடுகடத்தல் என்பது சாதாரணமாக நிறை வேற்றப்பட்டுள்ளது.

அயர்லாந்து விடுதலைப்போராட்ட புத்தகத்தில் நிலபிரபுத்துவ கொடுமைகளை சகிக்கமுடியாத வகையில் உள்ளது.அவர்கள் காட்டை அழித்து உருவாக்கிய விளைநிலங்களை சிதைத்தனர்.காடுகளையும் மேய்ச்சல் நிலங்களையும் கைப்பற்றி அம்மக்களை விரட்டினர். கம்பளி தொழிலுக்காக 96 லட்சம் ஆடுகளுக்காக 11 லட்சம் அயர்லாந்து மக்களை விரட்டியடித்த கொடுமைகளை மார்க்ஸ் அம்பலப்படுத்தியுள்ளார். கொடூர சுரண்டலால் பஞ்சம். பஞ்சத்தால் 20 சதம் மக்கள் மரணம்.

மூன்றாவதாக, முதலாளித்துவத்திற்கு முந்தைய சமூக அமைப்பில் மேல்கட்டுமானமாக இருந்த மதம் பொருளாதார சுரண்டலின் கருவியாக செயல்பட்டது என மார்க்ஸ் கூறியுள்ளார்.இதற்குரிய பலதகவல்களை இப்புத்தகங்களில் ஆசிரியர் கொடுத்துள்ளார். பிரஞ்சுபுரட்சி புத்தகத்தில் மதக்குருக்கள் முதலாவது எஸ்டேட் என்ற முதல் நிலையில் இருந்தன்ர்.இவர்கள் ஆடம்பர வாழ்வில் திளைத்தனர். சர்ச்சின் வருமானம் முழுவதும் ஆர்ச்பிஷப்களுக்கும், பிஷப்களுக்குமே சென்றது.இத்துடன் இவர்களின் அனைத்து சொத்துக்களுக்கும் லூயிமன்னன் வரிவிலக்கு அளித்திருந்தான்.ஒரு ஆர்ச்பிஷப்பின் வருமானம் மூன்று லட்சம் டாலர். இருநூறுபேர்கள் உண்ணும் உணவுக்கூடம்.நூற்றி எண்பது குதிரைகள் என தனிராஜியமே நடத்தினர். சர்ச்கள் தனியாக விவசாயிகளிடம் வரிவசூல் நடத்தினர், சுங்கச்சாவடிகள் அமைத்து வணிகர்களிடம் வரிவசூலித்த னர்.தனி நீதிமன்றங்கள் தர்பார்கள் நடத்தினர் என்றால் மதத்தின் பங்கை பொருளாதார சுரண்டலில் அறியமுடியும்.

இங்கிலாந்தில் மடாலயங்கள் ஒவ்வொரு பாதிரியாரின் ஆளுகைக்கு உட்பட்ட பகுதியாக பிரிக்கப்பட்டிருந்தது.இது பேரிஷ் என்று அழைக்கப்பட்டது. இற்றின்கீழ் நிலங்கள் இதர சொத்துக்களும் இருந்தன. இவைதவிர வேலைசெய்யும் இடம் என்ற குழந்தைகளையும் பெண்களையும் கசக்கிபிழியும் இடமும் இவர்களுக்கு கீழ் செயல்பட்டது.இந்த பேரிஷ் என்ற பகுதியில் கிடைக்கும் வருமானத்தை மூன்றில் ஒருபகுதி ஏழைமக்களுக்காக செலவு செய்யப்பட வேண்டும் என்ற விதிமுறைகள்கூட அப்பட்டமாக மீறப்பட்டன.

நான்காவதாக, அறிவுஜீவிகள் மற்றும் கலை இலக்கிய படைப்புகள் பங்கு இப்புத்தகத்தில் குறிப்பிடப்பட வேண்டிய ஒன்று. பிரெஞ்சு புரட்சியில் ரூசோ, மாண்டஸ்க்கியு, வால்டர், தீதரோ சிந்தனைகள் எடுத்தாளப்பட்டுள்ளன. வால்டர் மற்றும் தீதரோ இருவருக்ககுமான வேறுபாடுகள் குறிப்பிட்டுள்ள முறைகள் அதாவது சொல்லவந்த பொருளோடு இணைந்தே செல்வது முக்கியத்துவம் பெறுகிறது. வால்டேர் மதபீடங்களை கடுமையாக சாடினார். ஆனால் மதத்தின் இருத்தலை நியாயப்படுத்தினார்.தீதரோ மதபீடங்களையும், மதத்தையும் சாடியதுடன் பொருள்முதல்வாத சிந்தனைகளுக்குமுக்கியத்துவம் கொடுத்தார்.எனவேதான் இவரின் கலைக்களஞ்சியத்தை மன்னன் தீயிட்டுக் கொளுத்தினான். இந்த அளவிற்கு இல்லை என்றாலும் ரஷ்யப்புரட்சி புத்தகத்திலும் அறிவிஜீவிகளின் பங்கு குறிப்பிடப்பட்டுள்ளது. சாசனஇயக்கத்தில் இவர்களின் பங்கை ஓரளவு குறிப்பிட்டிருந்தால் உதவியாக இருந்திருக்கும்.

இம்மூன்று புத்தகங்களிலும் கையாளப்பட்ட விஷயங்கள் மாறுபட்டகாலம், இடம், வர்க்க நலன்கள் என்று இருந்தாலும், சாதாரண மற்றும் தீவிரவாசகர்களுக்கு ஏற்ற வகையில் விளக்கப்பட்டுள்ளது. அதேபோன்று நிலபிரபுத்துவத்தின் கொடுமைகள் மூன்றிலும் படம்பிடித்துகாட்டப் பட்டுள்ளது ரஷ்யப்புரட்சி புத்தகத்தில் மக்களை சுரண்டியதில் மதத்தின் பங்கு போதுமாக அளவு இடம்பெறவில்லை.கூடுதலாக,வந்திருக்கலாம். நரோதினிய தோற்றச்சூழலை சரியாகவே சுட்டியிருக்கும் நிலையில் அதன் தாக்கம் ரஷ்யசமூகத்தில் ஏற்படுத்திய விளைவுகள் இன்னும் அழுத்தமாக இருந்திருக்க வேண்டும் என கருதுகிறேன்.

அயர்லாந்து-பாலஸ்தீனம்

பூர்வீகம் முதல் புத்தகம் எழுதப்படும் காலம்வரை முக்கியநிகழ்வுகள்,பார்வைகள்,கருத்துக்கள் முன்வைக்கப்படுகிறது. அயர்லாந்து இங்கிலாந்தினால் ஆக்கிரமிக்கப்பட்டது. பாலஸ்தீனம் இங்கிலாந்தி னால் ஏமாற்றப்பட்டது

நான் உலகத்தால் ஏமாற்றப்பட்டு வருகிறேன்,

நான் கடவுளால் ஏமாற்றப்பட்டு வருகிறேன்,

நான் வரலாற்றால் ஏமாற்றப்பட்டு வருகிறேன்,

என்ற கவிதை பாலஸ்தீனம் பற்றி இன்றைய காட்சிகளுக்கும் சாட்சியாக விளங்குகின்றது. அயர்லாந்து என்ற நாட்டை இங்கிலாந்து தன்நாட்டுடன் இணைத்துக் கொண்டது.இன்றும் ஒருபகுதியை இணைத்தே வைத்துள்ளது. ஆனால் பாலஸ்தீனத்தில் இஸ்ரேல் என்ற புதிய நாட்டை உருவாக்கியது. இவை எதிரும் புதிருமாக தோன்றலாம் ஏகாதிபத்தியத்தின் கொள்கை இதுதான். இயற்கையை, உழப்பை, ரத்தத்தை, சரீரத்தை சுரண்டுவது என தனது நலனுக்கு எது உகந்தோ அதுதான் சட்டம்.அதுதான் நீதி. அயர்லாந்து இங்கிலாந்தின் முதல் காலனி நாடு என்று எங்கல்ஸ் கூறினார்.இங்கிலாந்தின் நிரபிரபுத்துவம்அயர்லாந்தை பொருளாதார ரீதியாக சுரண்டியது. தொழில்வளர்ச்சிக்கும், முதலாளித்துவ மூலதன திரட்சிக்கும் அது உதவியதால் முதலாளித்துவம் பயன்படுத்தியது. அயர்லாந்து பற்றி காரல்மார்க்ஸ், ஏங்கல்ஸ் ஆகிய இருவரின் கருத்துக்கள் மிகமுக்கியமானது ஆகும். எந்த ஒருநாட்டின் தொழிலாளி வர்க்கமும் தன் நாட்டின் ஆளும் வர்க்கம் பிற நாடுகளை அடிமைப்படுத்துவதற்கு ஆதரவளிக்க கூடாது என்று கூறினர். அயர்லாந்தை அடிமைப்படுத்துவதன் மூலமாக இங்கிலாந்தின் பிற்போக்காளர்கள் பலமடைந்ததுடன் அதைப்பேணி காத்தும் வருகின்றனர் என்று கூறினார். ஏங்கல்சின் மனைவி மேரிபர்ன்ஸ் அயர்லாந்துக் காரர்.இவர் இப்பிரச்சனையில் மிகுந்த ஆவர்வம் செலுத்தியதாலும்,இவர் இறந்த பிறகு ஏங்கல்ஸ் திருமணம் செய்துகொண்ட இவரது தங்கை லிஸ்ஸியும் இப்பிரச்சனையில் ஆர்வம் செலுத்தியதால் ஏங்கல்ஸுக்கு இப்பிரச்சனையை புரிந்துகொள்வது எளிதாக இருந்தது. ஜரிஷ் என்ற தேசிய இனத்தை அடிமையாக்கி சமூகஒடுக்கு முறைக்கு உள்ளாக்கியது இங்கிலாந்து. அதே நேரத்தில் உருவாகிவந்த அரபுதேசிய ஒற்றுமையை நசுக்கிடயூதஇனத்தை மூர்க்கத்தனமாக பயன்படுத்தியது. நாகரீகம் தெரியாத அயர்லாந்து மக்களுக்கு நாகரீகத்தை கற்றுத்தருகிறோம் என்று கூறினர்.இதையே இந்தியாவிற்கும் கூறியதை நாம் மறக்க முடியாது. இதையேதான் பாலஸ்தீனத் திற்கும் கூறினர்.ஏகாதிபத்திய சூறையாடலுக்கு அவர்கள் சூட்டிக்கொண்ட பெயர் நாகரீகம். ஏகாதிபத்தியவாதிகள் பிரித்தாளும் சூழ்ச்சியின் பிதாமகன்கள்.பாலஸ்தீனத்தில் யூதத்தையும் இஸ்லாத்தையும் மோதவிட்டனர். லெபனானில் கிறிஸ்த்துவத்தையும் இஸ்லாத்தையும், இந்தியாவில் இந்து முஸ்லீமையும் மோத விட்டனர். அயர்லாந்திலோ கிறிஸ்துவமதப்பிரிவுகளில் உள்ள கத்தோலிக்கர்களையும் பிராட்டஸ்டன்ட்களையும் மோத விட்டனர். அயர்லாந்தில் பட்டினியாலும், படுகொலைகளாலும் இருபதுசதம் மக்களை வேட்டையாடினர் .பாலஸ்தீனத்திலோ முதல் பத்தாண்டுகளில் (1921-31)மட்டும் ஜம்பதாயிரம் மக்களை கூட்டம் கூட்டமாக கொன்று குவித்தனர். இன்றுவரை இது பலலட்சங்களை தாண்டி மக்கள் தொகை சரிபாதியாக குறைந்து விட்டது. இந்த இருநாட்டின் விடுதலைப்போராட்டங்களும் பன்முகத்தன்மை கொணடதாக இருக்கிறது. இன்றுவரை இந்த போராட்டங்கள் உயிர்த்துடிப்போடும், உத்வேகம் குன்றாமலும் நடைபெற்று வருகின்றது. இந்த இருநாட்டின் விடுதலைப்போராட்டமும் நான்கு முக்கிய வடிவங்களில் நடைபெற்று வருகின்றது.வெகுமக்கள் பங்கேற்கும் இயக்கமாகவும், ஆயுதம் தாங்கிய எழுச்சியாகவும், உண்ணாவிரதம் இருந்து உயிர்நீக்கும் போராட்டமாகவும், சிலநேரங்களில் தனிநபர் பயங்கரவாத மாகவும் நடைபெற்று வருகின்றது. இப்போராட்டங்கள் பலநாடுகளின் விடுதலைப்போராட்டங்களுக்கு உந்துசக்தியாகவும் இருந்துள்ளது. தாகூர், பாரதியார், அரவிந்தகோஷ், சரோஜினிநாயுடு ஆகியோர் இப்போராட்டங் களை தங்களது கவிதைகளில் வடித்தனர். வியட்நாம் புரட்சித்தலைவர் ஹோ-சி-மின் அயர்லாந்து போராட்டத்தால் ஆகர்ஷ்சிக்கப்பட்டவர்களில் ஒருவர். காந்தி, நேரு இருவரும் பாலஸ்தீன மக்களின் போராட்டத்தை வலுவாக ஆதரித்தனர்.குறிப்பாக காந்தி அம்மக்களின் போராட்ட முறைகள் தனது கொள்கைக்கு மாறானதாக இருந்தாலும் அதை ஏன் ஆதரிக்கிறார் என்ற விளக்கம் புத்தகத்தில் இடம் பெற்றுள்ளது மிக முக்கயமான பகுதியாகும். பாலஸ்தீன மக்களின் போராட்டத்தினூடே இந்திய அரசின் கொள்கையில் என்ன மாற்றம் நிகழ்ந்துள்ளது என்பதையும் அறியமுடிகிறது.

1947-ல் அமைக்கப்பபட்ட சிறப்புக்குழுவால் பாலஸ் தீனம் இருநாடுகளாக பிரிக்க வேண்டும் என்ற பரிந்துரையை இந்தியா கடுமையாக எதிர்த்தது. 1949-ல் இஸ்ரேல் நாடு ஐக்கிய நாடுகள் சபையில் இணைவதை இந்தியா கடுமையாக ஆட்சேபித்தது. ஏகாதிபத்தியம் தனது குணத்தை மாற்றிக்கொள்ளவில்லை. மேலும் கோரமுகம் எடுத்துள்ளது. இஸ்ரேல் இன்றும் மூர்க்கத்தனமாக தனது தாக்குதலை நடத்துகின்றது.இந்தியா இன்று போராடும் மக்களை கைவிட்டு இஸ்ரேல் நாட்ட் தனது அச்சு நாடாக்கி ஏகாதிபத்தியத்திடம் மண்டியிட்டுவிட்டது. ஆனால் பாலஸ்தீன மக்களோ குண்டுமழைகளுக்கும். வெடிச்சத்தங்களுக்கும் துப்பாக்கி ரவைகளுக்கும்நடுவிலிருந்தும், வீடுகளின் இடிபாடுகளுக்கு அடியிலிருந்தும் மீண்டும் மீண்டும் ஆவேசத்துடன் எழுந்து வருகின்றனர். அயர்லாந்து மக்கள் இங்கிலாந்து வசமுள்ள பகுதியை விடுவிக்க போராடி வருகின்றனர். இவை இரணடும் புத்தகம் அல்ல. நிகழ்காலத்தின் போராட்ட களம். இக்களத்தில் இறங்க வேண்டும், சினமும், சீற்றமும் கொள்ள வேண்டும். மாற்றத்திற்கான மார்க்கம் புரிபடும.

உலகளாவிய உரிமைக்குரல் - 1

2010-11-13T00:04:00.000-08:00

Download pdf : - Go to page: I 1 I I 2 I I 3 I

என்.ராமகிருஷ்ணன் எழுதிய,

மகத்தான பிரெஞ்சு புரட்சி,

ரஷ்ய புரட்சி புதிய தரிசனம்,

சாசன இயக்கம்,

உலகின் முதல் கம்யூனிஸ்ட் சதி வழக்கு,

அயர்லாந்து எண்ணூறு ஆண்டுகள் விடுதலைப்போர்,

நீதிக்காக போராடும் பாலஸ்தீன மக்கள்

ஆகிய ஆறு நூல்களை முன்வைத்து

நடைபெற்ற தமுஎகச தென்சென்னை

மாவட்ட ஆய்வரங்கில் சமர்ப்பித்தது

கடவுள்களால் கடந்த காலத்தை அழிக்க முடியாது. அத்தகைய வலிமை அவர்களுக்கு கிடையாது என்று ஆப்பிரிக்க அறிஞன் அகதான் கூறினான். வரலாறு அந்த அளவிற்கு சக்தி வாய்ந்தது என்பதை உணர்த்துவதுதான் இந்த கருத்தின் அர்த்தமாகும். வெற்றி பெற்ற மன்னர்கள்.தலைவர்கள் கடந்தகால வரலாற்றை அழித்துவிட்டு தங்களது வசதிக்கேற்ற வரலாற்றை எழுதுவர். இந்தவித அழிப்புக்கு எதிரான தொடர்ந்து வரலாற்றினை பாதுகாக்கும் போராட்டமும் நடந்து கொண்டுதான் இருக்கிறது. அந்த வரிசையிலேயே மேற்கண்ட புத்தகங்களையும் ஆசிரியர் படைத்துள்ளார். வரலாறு என்றால் மன்னர்கள், தளபதிகள், தலைவர்களின் சாதனைகள் என்ற கருத்துமுதல்வாத சித்தாந்தங்கள் இன்றும் ஆதிக்கம் செலுத்துகிறது. ஆளும் வர்க்கமும் இதையே நிலைநாட்ட விரும்புகிறது. ஆசிரியர் மேற்கண்ட புத்தகங்களில் மக்களின் வரலாற்றை, அக்கால பொருள் உற்பத்தி முறையின் பின்னணியோடு விளக்கியுள்ளார். இது நாள் வரையிலான வரலாறுகள் அனைத்தும் வர்க்கப்போராட்டங்களின் வரலாறே என்ற மார்க்சிய பார்வையுடன் கூடிய பதிகவுளை நிலைநிறுத்தியுள்ளார்.

முதலாளித்துவ வர்க்கத்தினர் அனைத்தையும் ஒரு விற்பனைக்கான சரக்காக மாற்றி வருகின்றனர். வரலாற்றை எழுதுவது என்பதையும் அவ்வாறே செய்து விடுகின்றனர் என்று ஏங்கெல்ஸ் எழுதினார். இந்தியாவில் இன்றைய ஆட்சி அதிகாரத்தை பிடிக்கவும், தக்க வைக்கவும் நடைபெறும் அரசியல் வியாபார சந்தையில் வரலாற்று வணிகம் அமோகமாக விலைபோகின்றது. வரலாற்றின் வடுக்கள் வலிமையானது மட்டுமல்ல எதிர்கால திசையை தீர்மானிக்க கூடியதுமாகும் என்பதை நாம் உணர்ந்து கொள்ள வேண்டும்.

கடந்த காலத்தை அறிந்த கொள்ளாமல் எதிர்கால பாதையின் இலக்கை எந்த ஒரு இயக்கமும் தீர்மானிக்க முடியாது. வரலாற்றை அணுகும் முறை, ஆய்வு செய்யும் முறை, பயன்படுத்தும் முறை முக்கியமான ஒன்றாகும். அதைவிட வரலாறு யாரால் எழுதப்படுகின்றது? யாருக்காக எழுதப்படுகின்றது என்பது பிரதான கேள்வி? வெற்றி பெற்றவர்களாலும், உயர்குடி மக்களாலும், அரசு சார்ந்த வரலாறுகளும்தான் இன்று அதிகமாக போதிக்கப்படுகின்றது. வெற்றி கொண்டவர்களே சரித்திரம் எழுதும் சம்பிரதாயத்தை உடைத்தெறிவதற்காக இந்த என் மக்களின் கதை உதவிடும் என்று நம்புகிறேன் என்று அலெக்ஸ்ஹேலி ஏழு தலைமுறைகள் நாவலின் கடைசிவரியில் முடித்தான்.

இங்கே ராமகிருஷ்ணன் எழுதியுள்ள மேற்கண்ட நூல்கள் அடித்தட்டு மக்களை முன்வைத்தே பேசப்படுகின்றது. வரலாற்றாளன் நிகழ்வுகளை பதிவு செய்வான். கலைஞன் உண்மைகளை தேடுவான் என்ற கூற்றுக்கேற்ப இராமகிருஷ்ணன் வரலாற்றாளனாகவும், கலைஞனாகவும் இப்புத்தகத்தின் வழியே காணப்படுகின்றார்.நிகழ்வுகளையும் பதிவுசெய்கிறார் புள்ளிவிபரங்களையும் பதிசெய்கிறார். அதற்கு பின்னால் உள்ள வர்க்க நலன்களையும் அம்பலப்படுததுகிறார்.

மேற்கண்ட ஆறு தலைப்புகளில் பல புத்தகங்களும், ஆய்வுகளும் வெளிவந்துள்ளது. ஆனால், இந்நூல்கள் புதிய வாசகனும் புரிந்து கொள்ளும் வகையில் எளிமையாகவும் தேவையான அளவு விஷயதானங்களையும், வாசிப்பு தன்மை குன்றாமல் கொடுத்துள்ளார்.

வரலாற்று நூலுக்கு காலவரையரை மிகமுக்கியமானது.காரணம் காலமும்,அக்காலத்தில் ஏற்படும் மாற்றமும் நாம் அறியஉள்ள விஷயங்களை துல்லியமாக் நமக்கு வழங்குகின்றன. பிரெஞ்சுபுரட்சி, ரஷ்யபுரட்சி, சாசன இயக்கம், முதல் கம்யூனிஸ்ட் சதி வழக்கு ஆகிய நான்கு நூலுக்கும் அதற்குரிய காலத்தை அதற்குரிய பின்னனியோடு வரையறுத்துள்ளார். மற்ற இருநூல்களான அயர்லாந்து, பாலஸ்தீனம் ஆகிய போராட்டங்கள் அம்மக்களின் இருப்பிடம், உருவாக்கம் ஆகியவைகளே கேள்விக்கு உள்ளாக்கப்படுவதால், அவர்களின் பூர்வீகத்திலிருந்து காலவரையரையை நிர்ணயித்துள்ளது குறிப்பிடத்தக்கது.

மேற்கண்ட புத்தகங்களில் வர்க்க நிலைபாட்டை மட்டுமல்ல வர்க்க செயல்பாட்டை அதன் போக்கிலேயே தெளிவாக கொண்டுவந்துள்ளது சிறப்பம்சாகும். காரணம், பிரஞ்சுப்புரட்சி, சாசனஇயக்கம் ஆகியவற்றில் உருவாகிவரும் பாட்டாளி வர்க்கத்தின் இருப்பையும், செயல்பாட் டையும், நிலபிரபுத்துவ, முதலாளித்துவ மோதல்களுக்கிடையில் முழ்கிவிடாமல், புத்தகத்தில் நிலைநாட்டியுள்ளார். குறிப்பாக பிரெஞ்சு புரட்சியில் தலைகீழ் மாற்றங்கள், திருப்பங்கள் தேசிய சட்டமன்றம் துவங்கி நெப்போலியன் ஆட்சிக்குவரும் போது இயங்கிய டைரக்டரி வரை உள்ள செயல்பாடுகள் எந்த வர்க்க நலன் சார்ந்தது என்பதை வெளிக்கொணர்ந்து புரிய வைப்பது அவ்வளவு எளிதானது அல்ல. புத்தகம் அதை எளிமையாகவே செய்துள்ளது.

மேற்கண்ட மூன்று புத்தகங்களும் வெவ்வேறுநாட்டில் வெவ்வேறு காலத்தில் ஒன்றன்பின் ஒன்றாக நடைபெற்றது.பிரஞ்சுப்புரட்சி முதலாளித்துவ சகாப்தத்தை துவக்கிவைத்தது.ரஷ்யப்புரட்சி சோசலிச சகாப்தத்தை துவக்கிவைத்தது.சாசன இயக்கத்தில் முதலாளிகள் நலன்உள்ளடங்கி இருந்தாலும் தொழிலாளர் உரிமைக்கான முதல் இயக்கமாக இருந்தது என்பதை புத்தகத்தை வாசிக்கும்போது புரிந்து கொள்ளலாம்.எனினும் தனித்தனியாக எடுத்துக்கொண்டு ஒவ்வொன்றையும் நீண்ட கட்டுரையாக மாற்றுவதைவிட புத்தகத்தில் கையாண்டுள்ள சில விஷயங்களை முன்னிறுத்தலாம் என்று கருதுகிறேன்.

பிரெஞ்சுப் புரட்சி-ரஷ்யப் புரட்சி- சாசன இயக்கம். மேற்கண்ட மூன்று புத்தகங்களும் வெவ்வேறுநாட்டில் வெவ்வேறு காலத்தில் ஒன்றன்பின் ஒன்றாக நடைபெற்றது.பிரஞ்சுப்புரட்சி முதலாளித்துவ சகாப்தத்தை துவக்கிவைத்தது.ரஷ்யப்புரட்சி சோசலிச சகாப்தத்தை துவக்கிவைத்தது.சாசன இயக்கத்தில் முதலாளிகள் நலன்உள்ளடங்கி இருந்தாலும் தொழிலாளர் உரிமைக்கான முதல் இயக்கமாக இருந்தது என்பதை புத்தகத்தை வாசிக்கும்போது புரிந்து கொள்ளலாம்.எனினும் தனித்தனியாக எடுத்துக்கொண்டு ஒவ்வொன்றையும் நீண்ட கட்டுரையாக மாற்றுவதைவிட புத்தகத்தில் கையாண்டுள்ள சில விஷயங்களை முன்னிறுத்தலாம் என்று கருதுகிறேன்.

முதலாவதாக படைப்பு சராசரி வாசகர்களை ஈர்க்க வேண்டும். அதே நேரம் தீவிரவாசகர்கள் அனுபவிக்கவும் அதில் இடங்கள் அமைந்திருக்க வேண்டும் என்று உம்பட்டோ எக்கோ வின் கூற்றுக்கு ஏற்ப புத்தகங்களின் பல பகுதிகள் அமைந்துள்ளது. தீவிரவாசகர்களுக்கு முழுமையாக தீனிபோடவில்லை என்றாலும் அவர்களுக்கான இடங்களும் உள்ளது.காரணம் புத்தகம் சராசரி வாசகனை சென்றடைய வேண்டும் என்ற நோக்கம் முன்வைக்கப்பட்டதால் இவ்வாறு அமைந்துள்ளது. வரலாற்றை அறிந்தவர்களுக்கு மட்டுமல்ல புதியவர்களுக்கும் புரியக்கூடிய வகையில் எழுதப்பட்டுள்ளது.

இந்த மூன்று புத்தகங்களிலும் காலவரிசைப்படி நிகழ்வுகளை முன்வைத்திருப்பதும், கடினவார்த்தைகளை தவிர்த்திருப்பதும் எளிய வாசிப்புக்கும் புரிதலுக்கும் உதவுகிறது. உதாரணமாக அன்றைய பிரெஞ்சுநாட்டு சமுகத்தை புரிந்துகொள்ள, மதகுருக்கள் முதல் எஸ்டேட், நிலபிரபுக்கள் இரண்டாவது எஸ்டேட், மக்கள் மூன்றாவது எஸ்டேட் என்று புள்ளிவிவரங்களுடன் விபரித்திருப்பதை குறிப்பிடலாம். ரஷ்ய புரட்சி புத்தகத்தில் எளிமையாக புரிந்துகொள்ளும் வகையில் கீழ்கண்ட விஷயத்தை முன்வைக்கலாம். சார்மன்னன் காலத்தில் தொழிலாளர்கள் நிலையை குறிக்கும் வகையில் உங்கள் அறையில் எத்தனை பேர் என்ற கேள்வியுடனான தலைப்புகள். இதில் 12 பேர்கள் என்று பதில் வரும். எப்படிப்பட்ட அறை? 12 பேர்களும் ஒரே நேரத்தில் படுக்கமுடியாமல் முறைவைத்து படுப்பது, கரியும், அழுக்கும் நிறைந்த சுவர்கள், வியர்வை நாற்றம் வீசும் அறை! என்ற வர்ணனை. புத்தகத்தின் கடைசி அத்தியாயத்தில் புரட்சிக்கு பிறகு உங்கள் அறையில் எத்தனை பேர் என்றால், நான், எனது மனைவி, குழந்தைகள் என்ற பதிலுடன் புத்தகம் முடிவது சராசரி வாசகனுக்காக. இதே போன்று சாகனஇயக்கம் புத்தகத்தில் இங்கிலாந்தின் தொழிற்புரட்சியின் கோரச்சுரண்டலை விளக்கிட தொண்ணூறு ஆண்டுகளில் ஒன்பது தலைமுறைகளை விழுங்கப்பட்டு விட்டன என்ற பீல்டனின் வார்த்தைகள் எளிமையானது மட்டுமல்ல வலிமையானதும் கூட.

அதே நேரத்தில் ரஷ்ய சமூகத்தில் பெரும் தாக்கம் ஏற்படுத்திய நரோதியம் தோன்றுவதற்காக பொருளாதார சமூகக்ரணிகளை ஆழமாகவும், சுருக்கமாகவும் (பக்.14) பதிய வைத்துள்ளதும், ரஷ்யபாராளுமன்ற (டூமா) தேர்தலில் போல்ஷ்விக் கட்சி பங்கேற்காமைக்கு காரணமான தந்திரங்க ளையும் விளக்கியுள்ளார்.(பக்.71) ரஷ்ய புரட்சியின்முக்கியமான தந்திரோஉபாயங்களை தவறாமல் ரத்தினச்சுருக்கமா விளக்கியுள்ளார். உதாரணமாக ரஷ்யாவில் அன்றிருந்த புரட்சிகரமான சக்திகளில் பலபிரிவுகள்,பல போக்குகள் இருந்ததால் ஆயத தாக்குதலை திட்டமிட்டு நடத்துவதில் பல சிரமங்கள் இருந்தது. எடுத்த முடிவுகள் வெளிவந்த முறைகள் புரட்சிக்கு குந்தகம் விளைவிக்கும் என்பதை உணர்ந்த லெனின் ஒரு நிமிடம் தாமதிக்காமல்,இன்றே இப்போதே, இந்த நிமிடமே தாக்குலை தொடங்குங்கள் என்ற அறைகூவல், எந்தஅளவு வெற்றிக்கு வித்திட்டது என்பதை புத்தகம் தெளிவாக தேவையான வகையில் விளக்கியுள்ள முறைகள், தீவிர வாசகர்களும் அனுபவிக்கும் வகையில் அமைந்திருக்கிறது.

இதேபோன்று பிரஞ்சுப்புரட்சியில் முதலாளித்துவம் அதிகாரத்தை கைப்பறிய பிறகு நடந்த தேசிய சட்டமன்றம், அரசியல் நிர்ணய சபை,தேசியபடை, ஜாக்கோபின்கள் கழகம் அதில் உருவான பிரிவுகள் அனைத்தும் ஆழமான வகையில் விளக்கப்பட்டுள்ளது. அன்னியநாடுகள் படையெடுத்த போது தேசிய படைகள் புரட்சிபாடல்களை பாடி அணிதிரட்டியது, போதியபாதுகாப்பு உடைகளின்றியே தொழிலாளர்கள் யுத்தத்தில் பங்கேற்றது மட்டுமல்ல பாரீஸ் தொழிலாளர்கள் மாதம் 650 துப்பாக்கிகளை உற்பத்திசெய்த நிலையைமாற்றி மாதம் 16000 துப்பாக்கிகளையும்,20000 கிலோ வெடிமருந்துகளையும் தயாரித்துகொடுத்து வெற்றிவாகைசூடினர். தொழிலாளி வர்க்கத்தையும், விவசாயிகளையும் முதலாளிவர்க்கம் எப்படி தனது வெற்றிக்கு பயன்படுத்தி விட்டு. அவர்களை கழுத்தை அறுத்து ரத்தவெள்ளத்தில் மூழ்கடித்தது என்ற பதிவு முக்கியமானது. இதேவகையில், சாசன இயக்கத்திற்கு முன்பாக நடைபெற்ற அனை வருக்கும் வாக்குரிமை என்ற இயக்கம் தீவிரதன்மை வாய்ந்த தொழிலாளர்களின் தலைமைக்கு சென்றுவிடக்கூடாது என்பதற்காக அதிலிருந்த முதலாளிகள் பலபிரித்தாளும் காரியங்களை கையாண்டனர்.1832-க்குபிறகு தொழிலாளி வர்க்கம் தலைமையில் சாசன இயக்கம் அரசியல் இயக்கமாக வீறுகொண்டு எழுந்தபோது அவற்றை அடக்கியமுறையும் தொழிற்சங்கத்தை தடைசெய்து தணடித்தது,அதற்குத் தலைமை தாங்கியவர்களை விலைபேசிய தன்மைகளும், மூலதனத்தை தோலுரித்துக் காட்டுகிறது. சாசன இயக்கத்தில் தலைதூக்கிய தார்மீககட்சியினர், பலப்பிரயோக கட்சியினர், ஜனநாயகப் பிரிவினரின் போக்குகள் இயக்கத்தின் உள்முரண்பாடுகளை புரிந்துகொள்ள உதவுகிறது. மார்க்சும், எங்கல்சும் சாசன இயக்கத்தில் தொடர்பை ஏற்படுத்தி இடதுசாரி பிரிவினருடன் இணைந்து செயல்பட்டனர்.முதலாளித்துவ வர்க்கம் காலனி நாடுகளில் அடித்த கொள்ளையால், தகுதிவாய்ந்த ஆங்கிலேயே தொழிலாளி வர்க்கத்தின் நிலையை உயரச் செய்தது. ஒரு பகுதி தொழிலாளர்களை வசதியானவர்களாக மாற்றியது. இதனாலும், ஒரு உறுதிமிக்க பாட்டாளி வர்க்க ஆட்சி இல்லாததாலும் சாசன இயக்கம் பின்னடைவை சந்தித்தது என்று மார்க்ஸ் கூறினார். இன்றும்கூட ஆளும் வர்க்கம் இதுபோன்ற தந்திரங்களை கையாள்வதை நாம் உணர வேண்டும்.சாசனஇயக்கம் தனிமைப்பட்டபோது சாசன கோரிக்கைகளுக்ககாக நடத்தும் அரசியல் போராட்டத்தை தொழிலாளி வர்க்கத்தின் அன்றாட பொருளாதார போராட்டங்களுடன் ஒன்றிணைப்பது அவசியம் என்று மார்க்ஸ், எங்கல்ஸ் என இருவரும் கருத்து தெரிவித்தனர். இங்கிலாந்து நாடானது சாசனஇயக்கம் என்ற முதலாவது பரந்துபட்ட உண்மையான வெகுஜன மற்றும் திட்டவட்டமான அரசியலைக் கொண்ட பாட்டாளிவர்க்க புரட்சிகர இயக்கத்தை உலகிற்கு அளித்துள்ளது என்று லெனின் மதிப்பீடு செய்தார். சாசனஇயக்கம் என்ற புத்தகத்தில் மேற்கண்ட அம்சங்கள் தீவிரவாசகர்களுக்கும் பயனுள்ளதாகும்.

புத்த சமண மதங்களின் தோற்றமும் - எதிர்ப்பும் ...

2010-11-06T20:32:00.000-07:00

எஸ்.ஏ.பெருமாள்

தமிழகத்தில் ஆரம்பக் காலத்தில் பண்டமாற்றில் ஈடுபட்டு வந்தவர்கள் நாளடைவில் வணிக வர்க்கமாய் உயர்ந்தனர். வளர்ச்சிப் போக்கில் தமிழகத்தில் வணிகர்கள் உள்நாட்டில் மட்டுமின்றி வெளிநாடுக ளோடும் வணிகம் செய்தனர்.

வணிகம் பெருகப் பெருக துறைமுகங்கள், நகரங்கள் உருவாகி வளர்ந்தன. வணிகர்கள் செல்வத்தில் திளைத்தனர்.

“கலம் தந்த பொற்பரிசம்” என்றும்

“யவனர் தந்த வினைமாண் நன்கலம் பொன் னொடு வந்து கறியொடு பெயரும்”

என்று புறப்பாடல்கள் கூறுகின்றன. வணிகர்கள் செல்வத்தில் திளைத்ததால் “மன்னர் பின்னோர்” ஆகி அரசருக்கு நிகராயினர். போடி நாயக்கனூரிலும், சென்னை மாம்பலத்திலும் கிடைத்துள்ள பொன் நாணயங்கள் மீன் இலச் சினையோடு உள்ளன. இவற்றைப் பாண்டிய நாட்டு வணிகர்கள் வெளியிட்டிருக்கலாம் என்று கூறப்படுகிறது. வணிகர் தம் பெருமை களை சிலப்பதிகாரமும் மதுரைக்காஞ்சியும் செப்புகின்றன.

தங்கள் வளர்ச்சிக்குத் துணை நின்ற சமணத்துறவிகளுக்கு மடங்கள், பள்ளிகள், குகைகள், குடவரைகள் உருவாக்க வணிகர் கள் உதவினர். செல்வ வளம் பெற்று, சமூகச் செல்வாக்குப் பெற்ற வணிகர்களைப் பின்பற் றிப் பொதுமக்களும் சமணத்தைத் தழுவினர். இதனால் அரசர்களும் சமணத்தைத் தழுவி டும் நிர்ப்பந்தம் ஏற்பட்டது. வணிகர்கள் உற் பத்தியில் நேரடியாய் ஈடுபடாதவர்களாவர். வேளாளரே நிலவுடமையாளராய் உற்பத்தி யைக் கையில் வைத்திருந்தனர். இவ்வேளாண் பெருமக்களின் வீடுகளில் உணவு தானியங் கள் மலைபோல் சேமித்து வைக்கப்பட்டிருந் தன. நிலக்கிழார்களான வேளாளரில் அரசர் களுக்கு ஆதரவாகப் படைதிரட்டி ஆள் அனுப்பி உதவினர். “படை வேண்டுழி படை யுதவியும் - வினை வேண்டுழி வினையுதவி யும் செய்ததாய்” புறப்பாடல் கூறுகிறது.

கடவுளை மறுத்த சமயங்களான புத்த, சமண சமயங்களை வளர்த்ததில் வணிகர் கள் பங்கு மகத்தானது. நாட்டுப்புறத்தெய்வங் களுக்கு ஏராளமான சிலைகள் வைக்கப் பட்டு, ஒவ்வொரு சிலையின் பேராலும் பூசா ரிகள் ஆடு, மாடுகளைப் பொதுமக்களிடம் பலியாய் கேட்டனர். இந்தக் கொடும் சுரண் டலிலிருந்து மீள மக்கள் புத்த, சமண சமயங் களில் கூட்டம் கூட்டமாய் சேர்ந்தனர். வணி கர்களின் தயவில் புத்த மடாலயங்களும் நிறு வப்பட்டன. நாகையில் பெரும் புத்த விகார் நிறுவப்பட்டிருந்தது.

சமூகத்தில் வணிகர்கள் ஒரு வர்க்கமாய் உருவெடுத்தனர். வணிக வர்க்கத்திற்கும் நிலப்பிரபுத்துவத்திற்கும் இடையே முரண்பாடுகள் வளர்ந்தன. இந்த இரு பெரும் பிரிவுகளும் தமது நலன் கருதி ஒருமித்தும் சென்றன; மோதவும் செய்தன. உற்பத்தியில் ஈடுபட்ட வேளாளரும், அந்த உற்பத்திப் பொருட்களைப் பரிமாற்றம் செய்த வணிகர்களும் சமூகத்தில் அருகருகேதான் வாழ்கின்றனர். இரு பிரிவினருக்குமே அரசனிடத்தில் செல்வாக்கு உண்டு. இருவரும் தமது முரண்பாடு களை வெவ்வேறு விதங்களில் வெளிப்படுத்தினர். இந்த முரண்களையும் மோதல்களையும் சிலப்பதிகாரம் பிரதிபலிக்கிறது.

பொதுவாக ஆளும் வர்க்கங்களின் கருத்துக்களையே மதங்கள் கூறி வந்துள்ளன. மனிதகுல வரலாற்றில் முரண்பட்ட இரு வர்க்கங்கள் சேர்ந்தே வாழ்கின்றன. ஒன்றோ டொன்று போராடுகின்றன. முரண்பாடு முற்றும் போது அது பகை வடிவமாய் வெளிப்படு கிறது. ஒரு காலத்தில் பாங்கறிந்து பட்டிமண் டபம் ஏறித் தங்கள் கருத்து முரண்பாடுகளை தீர்த்துக் கொண்டனர். முரண்பாடு பகையான தும் “அனல் வாதங்களும் புனல் வாதங்களும் எழுந்தன. அதில் தீர்க்க முடியாது போய் “கழு வேற்றங்களில்” முடிந்தது.

இதுவரை உற்பத்திப் பொருட்கள் மீது மட் டுமே ஆதிக்கம் செலுத்தி வந்த வணிக வர்க் கம், உற்பத்திச் சாதனமான நிலங்களையே பறித்து மதபீடங்களுக்கு வழங்கியது. வேளா ளர்களின் நிலங்களை மதப் போர்வையில் பறிக்கும் போது பகை முரண்பாடு முற்றுகிறது.

தங்கள் நிலங்களை மீண்டும் மீட்டு, உற்பத்தியில் தாங்கள் இழந்த கட்டுப்பாட்டை நிலை நிறுத்தும் முயற்சியில் வேளாளர்கள் இறங்கினர். சமண மதப் பிடிக்குள் இருந்த அரசர்களையும் குறுநில மன்னர்களையும் தங்கள் செல்வாக்கின் கீழ் கொண்டு வர வேண்டும் என்ற அரசியல் அவசியத்தையும் அவர்கள் உணர்ந்தனர். எனவே கருத்துலகிலும் தங்கள் போராட்டத்தை நடத்த களமிறங்கினர்.

பொருளாதார அடித்தளத்தில் மேலிருந்த மேற்கட்டுமான இலக்கியம், மொழி, இசை, தத்துவம், மதம் போன்ற பல அம்சங்களில் வணிகர்களுக்கு எதிரான போராட்டமே சம ணத்திற்கு எதிரான போராட்டங்களாய் மாறின. வணிக வர்க்கத்துக்கு எதிரான நிலப்பிரபுத்து வத்தின் பொருளாதாரக் குரோதம் சமண சம யத்திற்கு எதிரான போராட்டமாய் உருவெடுத் தது. அடித்தளம் மேற்கட்டுமானத்தைத் தகர்த்துப் புத்துருவாக்கம் செய்தது எனலாம்.

சமணம், கடவுளை மறுத்தது. பந்தங்களி லிருந்து விடுபட்டு மோட்சமடைந்த உயிரே கடவுளாகும். உயிர்களைக் கடவுள் படைக்க வில்லை. உயிர்கள் தமது சொந்த முயற்சி யாலே மோட்சம் எய்த முடியும். இதுவே உயி ரின் இயல்பாகும் என்பதே கடவுள்- உயிர் குறித்த சமணக் கோட்பாடாகும். இதை சைவம் கடுமையாய் எதிர்க்கிறது. இறைவன் உயிர்களுக்காகவே உலகைப் படைத்தான். உயிர்களின் கர்மத்தைப் பக்குவப்படுத்தி அறியாமை, ஆணவமயத்தைப் போக்குகி றான். ஆக்கல், காத்தல், அழித்தல் ஆகிய முத் தொழில்களும் உயிர்களின் பொருட்டு இறை வனால் நிகழ்த்தப்படுகின்றன என்றது சைவம்.

சிலர் உயர் குடியாய் வணிகராய் வாழ்வதற் கும், பெரும்பாலோர் கூரைக்குடியாய் ஏழ்மை யில் வாழ்வதற்கும் அவர்தம் வினைப்பயனே காரணம் என்று சமணம் கூறியது. ஏழ்மை யில் வாழ்தல் வினைப்பயன் என்று கூறி அவர்களைச் செயலற்றவர்களாக்கியது. சிலப் பதிகாரம் கூட ஆள்வினையை விடச் சூழ்வி னையே வலிமையானது என்று கூறுகிறது. சமணர் என்று கருதப்படும் திருவள்ளுவர் கூட வினைக் கோட்பாட்டை வலியுறுத்து கிறார். இதற்கு எதிர்க் கோட்பாட்டை நிறுத்த வேண்டிய அவசியம் சைவத்துக்கு ஏற்பட் டது. மக்களைச் செயலிழக்கச் செய்யும் வினைக் கோட்பாட்டினை அடிப்படையில் தகர்ப்பது தங்களுடைய வர்க்க நலனுக்கும் எதிரானது என்று சைவர்கள் கருதினர். இத னால் வினையை எதிர்க்காது, அவர்கள் வினையின் முதன்மைத்தன்மையை மட்டும் எதிர்க்கின்றனர். வினைக்கும் மேலாய் இறை வனை நிறுத்தினர். வினையின் வெம்மைத் தன்மையை நீக்கி இறைவனின் கருணைத் தன்மையை வைத்தனர். இறைவனை வணங்கினால் வினைகள் அகலும் என்று பிரச்சாரம் செய்தனர்.

பக்தி இயக்கம் கண்ட நாயன்மார் தமிழ் மொழிக்கு ஏற்றம் கண்டனர். தத்துவவாதிகள் எல்லாக்காலங்களிலும் மொழியை ஒரு சிறந்த கருவியாய் பயன்படுத்தியுள்ளனர். அதேபோல் நாயன்மாரும் தமிழின் புகழைப் பாடியே தமது தத்துவங்களைக் கூறினர். மொழி செவிவழியோடி, கண் வழிகண்டு மனிதரின் மனத்தை நிறைக்கிறது. தமிழைப் புகழ்ந்து அவர்கள் அதற்குத் தெய்வத்தன்மை கொடுத்தனர். தமிழையே தாய்த் தெய்வமாக் கினர். “மறையிலங்கும் தமிழ்” என்றும், “தவம் மல்கு தமிழ்” என்றும் பாடிப் புகழ்ந்தனர். இதன் மூலம் சமணரின் வடமொழி, பிராகிருத மொழிகளை எதிர்த்து நின்றனர். தமிழை ஏற்றிப் போற்றி மக்களை உணர்ச்சி வெள்ளத் தில் ஆழ்த்தினர்.

தமிழையும் புலமையையும் கடவுளாக்கி யது போல் கடவுளையே புலவராகவும் தமிழ் மேதையாகவும் ஆக்கினர். இதை சிவனுக் கும் நக்கீரனுக்கும் நடந்த சொற்போரினால் அறியலாம். சமண சமயத்தின் தர்க்கவியல் அணுகுமுறையான எரிந்த கட்சி, எரியாத கட்சிப் பட்டிமண்டபங்களைச் சைவரும் தொடரவேண்டிய அவசியம் இருந்தது. இது ஏற்கனவே இருந்த தமிழர் சிந்தனை மரபைப் பின்பற்றியதாகும்.

போராட்டங்கள் நடைபெறும் போது அவற் றின் ஏற்ற இறக்க திசைவழிக்கேற்ப கருத்துக் களும் மாறுதல் அடையும். கி.பி. ஏழாம் நூற் றாண்டில் உருவான சங்கம் அதற்குப் பின்பு வந்த சமண சமய எதிர்ப்பாளர்களால் ஊட்டி வளர்க்கப்பட்டது. நூற்றாண்டுகளில் கால மாறுதலுக்கேற்ற கருத்துக்களும் வளர்க்கப் பட்டன. கி.பி.8ம் நூற்றாண்டைச் சேர்ந்த ஆண்டாள், திருமங்கையாழ்வார் போன்ற வைணவக்கவிஞர்களாலும் , கி.பி 9ம் நூற் றாண்டில் மாணிக்க வாசகராலும் வளர்க்கப் பட்டது.

பொன்னையும் பொருளையும் குவித்து பண்ட மாற்றில் மட்டுமே ஈடுபட்டு, உற்பத்தி யையும் தங்கள் கட்டுப்பாட்டில் வைத்திருந்த வணிக வர்க்கம் வீழ்ச்சியடைந்தது. வேளா ளர் வர்க்கம் வெற்றி பெற்று உற்பத்தியையும் பங்கீட்டையும் தானே செய்தது. பொருளியல் ஆதிக்கம் வேளாளர் கைக்கு வந்தது. சமயப் போர்வையில் வணிகர்கள் கைப்பற்றிய நிலங் களை வேளாளர்கள் பரந்த மக்கள் சக்தியைத் திரட்டி மோதி வெற்றி பெற்று மீட்டுக்கொண்ட னர். ஒரு காலத்தில் கோலோச்சிய சமண, பவுத்த சமயங்கள் அடியோடு வேரறுக்கப்பட்டு சைவமும், வைணவமும் தமிழகத்தில் தழைத்தன.

பவுத்த ஆலயங்கள் வைணவக் கோவில் களாய் மாற்றப்பட்டன. புத்தரின் அனந்த சயனச் சிலைகள், பள்ளிகொண்ட பெருமாளாக்கப்பட்டது. அதே போல் சமணக் கோவில்களும் பள்ளிகளும் சிவ, முருகக் கோவில்களாய் மாற்றப்பட்டன. பவுத்த, சமணத் திருவிழாக்கள் வைதீக மதத்தால் புதுப்பிக்கப்பட்டுக் கொண்டாடப்பட்டது. அதில் ஒன்று தான் தீபாவளியாகும்.

2010-09-28T19:58:00.000-07:00

தலைமேல் கத்தியாய்

எதிர்காலம் இருப்பதாய்க்

கத்திக் கொண்டிருக்கிறேன்

மறியலுக்கு வாவெனக்

கூவி அழைக்கிறேன்

சபித்தபடி நீயோ

விலகி நடக்கிறாய்

இதயத்தின் கூக்குரல்

இறைச்சலாய்ப் படுகிறது

கேவலம் எனச் சொல்லி

கேலி பேசுகிறாய்

வார்த்தைகளின் ஆழம்

புரியாதபோது

ஆர்பாட்டங்களும்,

போராட்டங்களும்

கசக்கின்றன உனக்கு

மூன்றாவது சந்தின் மூளையில்

இன்று கட்டியிருக்கும்

தட்டியிலே

எந்தத் தலைவனின் படமுமில்லை

அவை அறிவித்து நிற்கின்றன

உனக்கான கோரிக்கையையும் ...

ஆளும் வர்கங்களின்

குண்டாந்தடிகளில்

பட்டுதெரிக்கும்

இரத்தத் துளிகள்

உரக்கப் பேசுகின்றன

உன் நல் வாழ்வுக்காகவும் ...

எதிர் வரிசையில் நின்று

நீஎக்காளமிட்டாலும்

தொழிலாளி வர்க்கத் தோழனே

நான் உனக்காகவும்

தியாகம் புரிகிறேன்

ஏனென்றால்

பசிமிகுந்து

ஒருபருக்கையும் இல்லாத போது

உன் குழந்தையும்

கண்ணீர் விட்டழுகும் ...

மகிழ்ப்பா ...

2010-09-24T06:51:00.000-07:00

ஒற்றை முத்தத்தில்
உயிரின் அழுக்குகளைக் கரைத்து
சுத்தமாக்கும் மந்திரம்
என் மகளுக்கே
வாய்த்திருக்கிறது ...

ஒரு படமும், பிரதமரும் ... [பீப்ளி லைவ்]

2010-09-21T04:50:00.000-07:00

”பீப்ளி [லைவ்]” என்று ஒருபடம் வெளியாகியிருக்கிறது. இந்திநடிகர் அமீர்கான் தயாரித்துள்ள அந்தப்படத்தை இயக்கியவரின் பெயர் அனுசா ரிஸ்வி. மேலும் ஒரு செய்தி சொல்கிறேன், அந்தப்படத்தை இந்தியாவின் பிரதமர் மன்மோகன் சிங் தனது வீட்டில் சிறப்புக் காட்சியாகப் பார்த்து மகிழ்ந்தார். ஆம், இந்தியாவின் கிராமங்களில் எரிந்துகொண்டிருக்கும் பிரச்சனைகளைப் பேசும் அந்தப் படத்தைப் பார்த்து அவர் ’மகிழ்ந்தார்’. அப்படித்தான் பத்திரிக்கைகள் சொல்கின்றன. அதன் பின்னர், செய்தியாளர்களிடம் பேசிய அவர், “அரசியல்வாதிகளுக்கும், பத்திரிக்கையாளர்களுக்கும் இந்தப்படம் ஒரு பாடம்” என்று சொல்லியிருக்கின்றார்.

நாட்டின் பிரதமரே பாடமாக எடுத்துகொள்ளும் படமா? அதில் அப்படி என்னதான் இருக்கிறது. பீப்ளி என்ற ஒரு இந்திய கிராமத்தில், நெருக்கடியில் தவிக்கும் விவசாயிகள் பற்றிப் பேசுகிறது கதை. கடந்த பாஜக ஆட்சிக்காலத்தில், விவசாயிகள் தொடர்ந்து தற்கொலைக்கு ஆளான விதர்பா மாவட்டத்தில் பிரதமர் நேரில் சென்று பார்வையிட்டார். ஆனால், அதன் பிறகும் தற்கொலைகள் குறைந்தபாடில்லை. மேற்கண்ட படம் அந்த உண்மையை நினைவுபடுத்தாமலில்லை.

யார் தற்கொலை செய்துகொள்வது என விவசாயிகள் விவாதிக்கும் காட்சி ...

வங்கிக் கடனில் மூழ்கும் நிலத்தை மீட்பதற்காக விவசாயி ஒருவர் தற்கொலை செய்துகொள்ள முடிவெடுக்கிறார். தற்கொலை செய்தால் அரசிடமிருந்து ரூ.1 லட்சம் நட்ட ஈடு கிடைக்கும். அந்தப்பணத்தில் தன் குடும்பம் நிலத்தை மீட்கும் என்பது அவரது திட்டம். இதை அறிந்த செய்தி தொலைக்காட்சிகள் அந்த கிராமத்திற்குப் படையெடுக்கின்றன. விவசாயி சாவாரா? இல்லையா? என்பது தொடர்ந்து செய்தியாகிறது. அதனைத்தொடர்ந்து நடக்கும் ஒவ்வொரு விசயங்களிலும், சுயநல ஆளும் வர்க்கங்கள், அவர்களுக்கு ஒத்து ஊதும் மீடியா வியாபாரிகளின் முகத்திரைகள் கிழிபடுகின்றன.

இப்படத்தை பிரதமரே பார்த்தது, ஒரு நல்ல துவக்கம் போலத்தான் தெரிந்தது. அது நடந்தது, ஆக.29 இல். 5 நாட்கள் பின்னர் செய்தியாளர்களைச் சந்தித்த பிரதமர், அரசு `குடோன்'களில் மக்கிக்கொண்டிருக்கும் உணவு தானியங்களை, ஏழை மக்களுக்கு இலவசமாக வழங்க வேண்டுமென்ற உச்சநீதிமன்ற உத்தரவு குறித்து திருவாய் மலர்ந்தார்.

”நாட்டின் மக்கள் தொகையில் ஏறத்தாழ 37 சதவீதம் பேர், வறுமை கோட்டிற்கு கீழாக வறுமை நிலையில் உள்ளனர். அப்படி இருக்கும்போது, வீணாகும் உணவு தானியங்களை அனைத்து ஏழை மக்களுக்கும் எப்படி இலவசமாக வழங்க முடியும்?” என்று கேட்டார் அவர். மேலும், “ஏழைகளுக்கு இலவசமாக அரிசி, கோதுமையை வழங்கினால் அது விவசாயிகளை மன ரீதியில் பாதித்துவிடும். இதனால் விளைச்சலைப் பெருக்க வேண்டும் என்ற எண்ணத்தையே அவர்கள் கைவிட்டுவிடுவர். கையிருப்பு ஒன்றும் இல்லாமலிருந்தால் பிறகு விநியோகிக்க ஏதுமில்லாத சூழல் ஏற்பட்டுவிடும்.” என்றார். இறுதியாக, “அரசின் கொள்கை முடிவுகளில் நீதிமன்றம் தலையிடக் கூடாது” என்ற தன் உள்ளக் குமுறலை வெளிப்படுத்தினார்.

” பீப்ளி லைவ்” படத்தில் ஒரு சிறிய கிளைக்கதை, அதே கிராமத்தில் இன்னொரு விவசாயி, கிணறு வெட்டிக்கொண்டிருப்பார். எழும்பும் தோழுமாக காணப்படும் அவர் விடாப்பிடியாக இதைச் செய்துவருவார். அவரை கவனித்த உள்ளூர் பத்திரிக்கையாளர் ஒருவர், என்ன செய்கிறீர்கள் என்று கேட்பார். “எனது நிலம் கடனில் மூழ்கிவிட்டது. கிணறு வெட்டினால்தான் விவசாயத்தை தொடர முடியும். கடனையும் அடைக்கமுடியும். நானே செய்துவருகிறேன்” என்றுவிட்டு தனது வேலையைத் தொடர்வார். ஆனால், பரிதாபமாக பட்டிக்கொடுமையின் காரணமாக அவர் தான் வெட்டிய குழியிலேயே செத்து மடிவார்.

ஒருபக்கம் மலைபோல உணவுப்பொருட்கள் தேங்கிக்கிடக்கையிலே மறுபக்கம் மக்கள் பட்டினியால் செத்து மடியவேண்டும். இதுதான் பிரதமரின் கொள்கை முடிவு போலும்?. ஏனென்றால், மேற்சொன்ன காட்சியை சிறப்புக் காட்சியாகப் பார்த்த அவர், ஏழைகளுக்கு இலவசமாக அரிசி வழங்குவதுதான் விவசாயிகளுக்கு பாதிப்பு ஏற்படுத்துகிறது என்கிறாரெனில் அவர் தெரியாமல் சொல்லியிருக்க முடியாது இல்லையா?.

தற்கொலைகளும் பட்டினிச்சாவுகளும் எதிர்பாராமல் நிகழ்ந்துகொண்டிருப்பவை அல்ல. நரசிம்மராவ் துவங்கி வாஜ்பாய், மன்மோகன் சிங் அரசுகள் வரை, விடப்பிடியாக அமல்படுத்தப்பட்டுவரும் உலகமயமாக்கல் - தாராளமயமாக்கல் பொருளாதாரக் கொள்கைகள் அரங்கேற்றும் படுபாதக கொலைகள் அவை. ஆனால் தற்கொலைகளை மனைதை உலுக்கும் வகையில் செய்தியாக்கும் ஊடகங்கள் அவற்றின் உண்மைப் பின்னணியை திட்டமிட்டே மறைக்கிறார்கள். இதனால் ஆளும் வர்கங்கள் எந்தவித குருகுருப்பும் இல்லாமல் தாங்கள் செய்ய விரும்புவதை அரங்கேற்றிக் கொண்டிருக்கின்றன.

அந்தப் படத்தின், இன்னொரு காட்சியில் உள்ளூர் பத்திரிக்கையாளரும், ஆங்கிலத் தொலைக்காட்சி நிருபரும் பேசிக்கொள்வார்கள்.

“நீங்கள் ஏன் தற்கொலை செய்பவரை மட்டும் செய்தியாகத் தருகிறீர்கள்?”

”ஏனென்றால், ஒரு விவசாயி தற்கொலை செய்துகொள்ளுவது மிக மோசமான நிகழ்வில்லையா?. அப்படிப்பட்ட தற்கொலையை நேரலை செய்வது அதிர்ச்சியளிப்பது இல்லையா?”

“எங்கள் ஊரில் இன்னும் எத்தனையோ விவசாயிகள் உயிருடன் இருக்கிறார்களே. அவர்களைக் காட்டலாமே”

”அவர்களை எப்படி செய்தியாக்க முடியும். ஒரு செய்தியை துவங்கினால், கடைசி வரைக்கும் காட்ட வேண்டும். பாதியிலேயே வேறு செய்தியைக் காட்டச் சொல்கிறாயா?”

“ஏன்?”

“ஏனென்றால், பார்வையாளர்கள் இந்த செய்தியைத்தான் மிகவும் விரும்புவதாக ஆய்வுகள் காட்டுகின்றன”

“இதனால், நெருக்கடியில் இருக்கும் விவசாயிகளுக்கு ஏதாவது தீர்வு கிடைக்குமா?”

“அது நமது வேலை இல்லை. நீ விரும்புவதைச் செய்யவேண்டுமானால். அதற்கான இடத்தில் நீ இருக்க வேண்டும்”

இவ்வாறு அந்த வாக்குவாதம் முடியும்.

நம் நாட்டில் சுமார் 80 செய்தி அலைவரிசைகள் இருக்கின்றன. இவர்களுக்கு ஏதாவது ஒரு செய்தி பரபரப்பாக தேவைப்படுகிறது. உற்று நோக்கினால், ஒரு விசயத்தில் பரபரப்பு இருக்கும் மட்டும் ஒரு செய்தியைத் தொடர்வதும். அதுவே இன்னொரு பரபரப்பு கிடைக்கும்போது, அதற்கு தாவிவிடுவதுமாக இருக்கிறது. ஏனென்றால், பிரச்சனைகளைத் தீர்ப்பது அவர்களின் நோக்கம் இல்லை. பரபரப்பாக எதையேனும் ஒளிபரப்பி மக்களைப் பார்க்கச்செய்யவேண்டும் அவ்வளவுதான்.

விலைவாசி உயர்வு, பெட்ரோல் டீசல் விலையை உயர்வு என்றால் ஊடகங்கள் அதிர்ச்சியுடன் செய்தி சொல்கின்றன. அதைத் தொடர்ந்து மக்கள் போராட்டங்கள் மூலம் எதிர்த்தால் ”போராட்டம் பிசுபிசுத்தது” என திரும்பத் திரும்பச் சொல்கிறார்கள்.

எனவே ”பீப்ளி லைவ்” என்ற ஒரு படம் எடுப்பதால், அதனை இந்த நாட்டு மக்கள் பார்த்துவிடுவதால். ஊடகங்கள் பாராட்டுவதால். எந்த பாதிப்பும் ஏற்படப்போவதில்லைதான். ஆனால், இது ஒரு அக்கினிக் குஞ்சு. இப்படியொரு படத்தைக் கொடுத்ததற்காக இயக்குனருக்கும், அந்தக் குழுவிற்கும் நாம் பாராட்டைத் தெரிவிப்போம்.

இது குடியானவர்களுக்கு ஒரு புதிய வெளிச்சத்தைக் கொடுக்கிறது. ஆளும் வர்க்கத்தின் உள்நோக்கங்களை வெட்டவெளிச்சமாக்குகிறது. அவர்களின் இயல்பான வாழ்க்கையினூடே பயணித்து சரியான எதிரிகளை அடையாளம் காட்டுகிறது. ஆனால், படத்தைப் பார்ப்பதும், உச்சுக்கொட்டி ரசிப்பதும் என்ன மாற்றத்தை ஏற்படுத்திவிடப்போகிறது?. எனவே திரைப்படத்தைத் தாண்டிய கடமைகள் நமக்குள் இருக்கின்றன. வரலாற்றின் பக்கங்களில் ஏராளம் நீரோக்கள் பிடில் வாசித்திருக்கிறார்கள்.

மக்களை எரிக்கும் நெருப்பு ஜூவாலைகள் உழைக்கும் வர்கத்தின், மாணவர், இளைஞர்கள், மாதர் அமைப்புகளின் ஒன்றுபட்ட போராட்டங்கள்தான் அனைதிருக்கின்றன. எனவே, சரியான மாற்றுக் கொள்கைகளுக்குத் துணை நிற்போம். அதற்கான அரசியலை முன்னெடுப்போம்.

தொடரும் சோகம்: 65 நாட்களில் 85 பேர் தற்கொலை !

2010-09-11T09:54:00.000-07:00

இரா.சிந்தன்

திருப்பூர் மாவட்டத்தில் கடந்த ஜூலை மாதம் முதலான கடைசி 65 நாட்களில் 85 பேர் தற்கொலை செய்துகொண்டுள்ளனர். நாட்டிற்கு பெருமளவில் அந்நியச் செலாவணியை ஈட்டித்தரும் முக்கிய நகரில் இவ்வாறு தொடர் தற்கொலைகள் ஏன் நிகழ்கின்றன?

திருப்பூரில் சராசரியாக மாதம் 40 முதல் 50 பேர் வரை தற்கொலை செய்துகொள்வதாக ஏற்கனவே செய்திகள் வெளியாகின. இதனையடுத்து அரசு நிர்வாகத்தினர் தற்கொலைத் தடுப்புக்குழு ஒன்றை அமைத்தனர். அவசர அவசரமாக அமைக்கப்பட்ட அந்தக் குழுவின் தொழிற்சங்கப் பிரதிநிதிகள் கவனமாக தவிர்க்கப்பட்டனர். இதுபற்றி பத்திரிக்கைகளில் விளம்பரமாக செய்திதான் வெளியானது. ஆனால் தற்கொலைகள் குறைந்தபாடில்லை.

காவல் துறை குறிப்பின் படி, கடந்த ஜூலை, ஆகஸ்ட் மற்றும் செப்டம்பர் மாதங்களில் (பதிவுகள் கிடைக்காத 9 நாட்கள் தவிர) 65 நாட்களில் 85 பேர் தற்கொலை செய்துகொண்டனர். அதா வது ஒரு நாளில் ஒன்றுக்கும் அதிக மான தற்கொலைகள் நடந்துள்ளன. பெரும்பாலும் திருப்பூர் மாநகரம் மற்றும் நகரம் சார்ந்த நல்லூர், அவினாசி, பெருமாநல்லூர், பல்லடம் ஆகிய பகுதிகளில் 3 இல் சுமார் 2 பங்கு (58) தற்கொலைகள் நடைபெற்றுள்ளன. கிராமப்புறங்களில் 27 பேர் தற்கொலை செய்துகொண்டுள்ளனர். நகரப்பகுதி களில் அதிகமான தற்கொலைகள் மாந கரத்திற்கு உள்ளேயும், கிராமங்களி லேயே மிக அதிகமாக உடுமலை சுற்று வட்டாரம் மற்றும் மடத்துக்குளம் பகுதி களிலும் நடந்துள்ளன.

ஆண்கள் அதிகம்:
ஆண்களே மிக அதிக அளவில் தற்கொலை செய்துகொண்டுள்ளதும் அந்த விபரங்களில் தெரிய வருகிறது. ஆண்கள் 50 பேரும், பெண்கள் 35 பேரும் இவ்வாறு உயிரை மாய்த்துக் கொண்டுள்ளனர். இருபாலரிலும் இளம் வயதில் (18 - 45 வயதிற்குள் 58 பேர்) தற்கொலை அதிகமாக நடைபெறு கிறது. முதுமை நெருங்க நெருங்க ஆண்கள் தற்கொலை அதிகரிக்கிறது.

இக்காலகட்டத்தில் 18 வயதுக்கும் குறைவான சிறுவர் சிறுமி யரும் 6 பேர் தற்கொலை செய்துகொண் டுள்ளனர். இதற்கு பள்ளிப்படிப்பின் மீதான பயமும், மாதவிடாய் மீதான குழப்பமும் காரணங்களாக இருந்துள் ளது குறிப்பிடத்தக்கது.

வேலையின்மையே பிரதான காரணம்:

தற்கொலைக்கான காரணங்களை ஆராய்ந்தபோது, வேலையின்மையும், அதனால் வாங்கும் சக்தி குறைந்ததும் பிரதான காரணமாக உள்ளது. அதற்கு அடுத்தபடியாக தீராத வியாதியால் அதிகரிக்கும் மருத்துவச் செலவுகளும், குடும்ப சண்டைகளால் ஏற்படும் பிரிவும் குறிப்பிடப்பட்டுள்ளன. கந்துவட்டிக் கொடுமையும் கணிசமான பகுதி யினரின் மரணத்திற்கு காரணமாக அமைந்துள்ளது.

சமூக காரணங்களான, கலாச்சார சீர்கேடு, காதல் திருமணத்தை அங்கீக ரிக்காதது, முதுமையில் தனிமை ஆகிய காரணங்களும் குறிப்பிடத்தக்கவை. காவல் துறையினர் குறிப்புகளில் வயிற்று வலியை மையப்படுத்தியே பெரும்பாலான தற்கொலைகள் பார்க்கப்பட்டுள்ளன. இதை கவனிக்கையில் சட்டத்திற்கு தகுந்தார் போல வழக்குகள் திரிக்கப்படுகின்றனவோ என்ற சந்தேகமும் எழு கிறது.

தேவை உடனடி கவனம்:
தற்கொலைகளைத் தடுக்க முடியாதா? என்ற கேள்விகளுடன் நாம் மருத் துவர்களை அணுகியபோது, “திருப்பூரில் நிலையான வேலை, ஆரோக்கியமான பொழுதுபோக்கு, அமைதி யான வாழ்க்கை ஆகிய மூன்றும் கேள் விக்குறியாகியுள்ளன. இதனால் வாழ்க் கை மீதான பிடிப்பும், நம்பிக்கையும் இழக்கும் தொழிலாளர்கள் இப்படியாக தற்கொலை எண்ணங்களில் சிக்குகின் றனர். தற்கொலைக்கான காரணங் களை அகற்றுவதே அதற்கான சரியான தீர்வாக அமையும் என்றனர்.”

சிஐடியு பனியன் தொழிலாளர் சங்கத்தின் மாவட்டச் செயலாளர் சி.மூர்த்தியிடம் கேட்டபோது, “ அரசின் மோசமான பொருளாதாரக் கொள்கைகளால் தொழிலாளர்களின் வாங்கும் சக்தி குறைந்துள்ளது. அதே சமயம் விலை வாசி கடுமையாக அதிகரித்துள்ளது. சட் டப்படியான சலுகைகள் அமலாவதில் லை, வேலைக்கலாச்சாரம், சமூகப் பாது காப்பு ஆகியவை இல்லை. எனவே தொழிலுக்கு எந்த விதமான நெருக்கடி வந்தாலும் தொழிலாளர்களே நேரடியாக பாதிக்கப்படுகின்றனர். இதனால் அவர் கள் எளிதில் விரக்தி மனப்பான்மைக்கு ஆளாகின்றனர். ” என்றார்.

”இது திருப்பூர் நகரத்தில் உள்ள நிலைமை மட்டுமல்ல. இதைப் போலவே, சேலம் மாவட்டம் ஓமலூர் வட்டத்திலுள்ள செம்மாண்ட பட்டி கிராமத்தில் நெசவுத்தொழிலாளர் குடும்பத்தைச் சார்ந்த 5 பேர் வேலை யில்லாததால் வறுமை காரணமாக தற்கொலை செய்து கொண்டார்கள் என்ற செய்தி பத்திரிகையில் வெளியானது. வயதான தந்தை, தாய் மற்றும் மருமகள், எட்டுவயது பேரன், 2 வயது பேத்தி ஆகியோர் தற்கொலை செய்து கொண்ட சோக நிகழ்ச்சி சில மாதங்களுக்கு முன்பு நடந்துள்ளது. மாநிலம் முழுவதும் நகர்ப்புற, கிராமப்புற ஏழைகள் இத்தகைய அவல நிலைமையில்தான் வாழ்ந்து வருகிறார்கள்.

இத்தகைய நிலைமை திடீரென்று ஒரு நாளில் உருவாகிவிட வில்லை. கடந்த 20 ஆண்டு காலமாக அகில இந் திய அளவில் மத்திய அரசு கடைப் பிடித்து வரும் தாராளமயப் பொருளாதாரக் கொள்கைதான் மக்களை தற்கொலை யை நோக்கி தள்ளுகிறது. ”

- ஜி.ராமகிருஷ்ணன். மாநிலச் செயலாளர் சி.பி.ஐ. (எம்)

மரணங்களின் கதறல், ஆளும் வர்கத்தின் காதுகளை எட்டுமா?

துளிப்பா - இரா.சிந்தன்

2010-08-27T04:36:00.000-07:00

எதிர்பாராமல் பொழியும்
மழையைப் போன்றது,
எதிர்பாராமல் கிடைத்த
அன்பு

நனைவதை யாரும்
தடுக்க முடியாது...

சுதந்திர தின சிந்தனைக்கு ....

2010-08-14T09:56:00.000-07:00

சுயநலமிகளின்கையில் இந்த நாடு சிக்கிக் கொண்டிருப்பதால் .. வாழ வழி தெரியாமல் சுமார் 2 லட்சம் விவசாயிகள் தற்கொலை செய்துகொண்டிருக்கிறார்கள். 80 சதம் பெண்கள் சரியான ஊட்டச்சத்து கிடைக்காமல் இரத்த சோகை நோயால் பாதிக்கப்பட்டிருக்கிறார்கள். இந்த கொடுமைகளுக்கெல்லாம் உச்சமாக, ஒரு வருடத்தில் 2 லட்சம் குழந்தைகள் அதுவும் 5 வயதுக்கு உட்பட்டோரை பட்டினிக்கு பலிகொடுத்துக் கொண்டிருக்கிறோம்.

பொதுச்சொத்துக்கள் தனியாருக்கு விற்கப்படும் அதே நேரத்தில், இந்திய உணவுக்கழகத்தில் தேங்கிக்கிடக்கும் 6 லட்சம் டன் உணவு தானியங்கள் ஏழைகளுக்கு எடுத்து வழங்க திராணியற்றிருக்கிறது அரசு. இத்தனை கொடுமைகளை எதிர்க்க திராணியற்று இருப்பது இந்திய இளைஞர்களுக்கு பெருமையா?.

இரவில் வாங்கினோம்

இரவு விடியாது

சுயநலப் பேய்களை

சுட்டுப் பொசுக்கிடும்

சூரியக் கண்கள்

திறக்காத வரையில் ...

அரசியல் Vs அரசியல்

2010-08-12T09:51:00.001-07:00

மனிதர்களை விலை பேசுவதற்காக நமது நாட்டின் அரசியல்வாதிகள் பல நூறு கோடி ரூபாய்களை இறைக்கத் தயாராய் இருக்கிறார்கள். அதே நேரத்தில், மற்றொரு புறம் கொத்துக் கொத்தாய் உணவுக்கும், உடைக்கும் இருப்பிடத்திற்கும் அல்லாடும் ஏழை மக்கள் கொத்துக் கொத்தாய் செத்து மடிகிறார்கள். இன்றுவரையிலும், இந்த நாட்டின் தலைமை பெருந்தன்மையானவர்களிடம் இருந்ததில்லை. மாறாக பொதுவாழ்க்கையின் எச்சங்களே ஆட்சி பீடத்தில் அமர்ந்திருக்கிறார்கள்.

மக்கள் விடியலுக்கான சரியான அரசியல் இன்னும் பெரும்பாலான மக்களைச் சென்றடையவில்லை. இதையெல்லாம் நாம் குறிப்பிடுவது. ஆம், அரசியல் ஒரு சாக்கட எனும் நடுத்தர வர்கத்தின் மனநிலைக்கு ஒத்து ஊதுவதற்காக அல்ல. அந்த சாக்கடையைச் சுத்தம் செய்யாமல், மனித சமூக முன்னேற்றம் சாத்தியமில்லை என்பதை சுட்டிக் காட்டுவதற்காக

சதுர் வர்ணம் ...

2010-07-06T08:01:00.000-07:00

”உயரத்தில்
மலைமேல் வாழ்வது
என் தவறில்லை ..”
ஆம் நீ சொல்வது உண்மையானால்
அது நியாயம் தான் ...

ஆனால்
தன்னையொத்த மனிதரை,
குழந்தைகளை, எம் பெண்டிரை
பள்ளத்தில் தள்ளி விட்டானே
உன் பாட்டன் ...
அவன் செயல்தான் என்னை
ஆத்திரம் கொள்ளச் செய்கிறது...

அநீதியிழைக்கப்பட்டவர்களுக்கு

கைகொடுக்கக் கேட்கிறேன்
அழுக்காகுமென பாசாங்கு பேசுகிறாய்...

மழை நிற்காமல் பெய்கிறது
வீதியெல்லாம் வெள்ளக்காடு
உனக்கு குடையும்
அவனுக்கு படகும் கொடுக்கச் சொல்கிறேன்
அநீதி என்று ஆர்ப்பரித்துக் கதருகிறாய் ...

சந்ததிகளாய் அவர்கள்
பள்ளத்தில்
அவர்களின் குடிசைகள்
வெள்ளத்தில்

”அவனுக்கு அவனிடம்
எனக்கு என் இடம் ...
யாரையும், யாரும் ஆக்கிரமிக்க வேண்டாம்”
குரூரத்துடன் நீ அமைதி பேசுகிறாய்

கீழே, கீழேஅழுந்தித் தள்ளுகிறாய்
உன்னையும், உன் வீட்டையும்
சுமக்கிறார்கள் ஒரு பகுதியினர்
அதற்கும் கீழே, சுவர் தடுப்பு
அடிமூட்டையாய் நசுங்கிய
மக்கள் தலைமேல் அந்த மலையைச் சுமக்கிறார்கள்...

எங்கள் நியாயம் சத்தமாய் ஒலிக்கிறது...
”உயரத்தில்
மழைமேல் வாழ்வது
உன் உரிமை ...
நீ எம் தலை மேல் அல்லவா குந்தியிருக்கிறாய்?”

”அமைதி நீடிக்கிறது”
மேலிருந்து ஆசிர்வதிக்கிறார் கடவுள்
உன் வழியாக

கீழிருந்து கர்ஜிக்கிறது காலம்
என் வழியாக
”கடந்த காலத்தின்
மயானம் உயிர்த்தெழுகிறது”

விழிப்படைதல் ...

2010-07-04T00:29:00.001-07:00

என் பாட்டன் பாரதி
எழுதிய கவிதைகளை
இளம் தமிழன்
தாமதமாய்த் தான்
புரிந்துகொண்டான் ... !

அதற்குள் துவங்கியிருந்தது
இரண்டாம் சுதந்திரப் போர் ...

இதோ
நான்
கவி எழுதத்
துவங்குகிறேன் !

நேர்வு...

2010-07-03T21:19:00.001-07:00

என் கிருக்கல்களைக்
கவிதைகளாகவும்
என் கவிதைகளை
காவியங்களாகவும்
தரம் உயர்த்தும் வல்லமை -உன்
குறுஞ்சிரிப்பில் அடங்கியுள்ளது !

கர்வம் கொள்ளாதே

கரிச்சுரங்கத்திலிருந்து
கசியும் வைரங்களைப் பிரிப்பதுபோல்
உதட்டோரத்தில்
புன்னகையை உதிர்த்தெடுக்கும்
ஆற்றல் - என்
கவிதைகளில் தான் வெளிப்படுகிறது.

கை நீட்டியவுடன் கல்விக்கடன் பெறுவது எப்படி?

2010-06-21T20:42:00.000-07:00

வங்கிகள் கூறும் 8 ஆலோசனைகள்

”கல்விக்கடன் கிடைப்பது குதிரைக் கொம்பாக இருக்கிறது” என்று மாணவர்கள் புலம்புகிறார்கள். மந்திரிகளோ இந்த அரசு பல்லாயிரம் கோடிகள் கல்விக்கடனாகத் தர தயாராக இருக்கிறது என்று தம்பட்டமடிக்கிறார்கள். அட என்னதான் பிரச்சனை? என்று சில வங்கி நிர்வாகிகளைச் சந்தித்துக் கேட்டோம். அவர்கள் அள்ளிக்கொட்டிய முத்த்தான யோசனைகள் வாசகர்களுக்காக தரப்படுகின்றன. (அடைப்புக் குறிகளுக்குள், சந்தேகங்களும் அதற்கான பதில்களும்)

ஆலோசனை 1:

மாணவர்கள் முதலில் கல்லூரியில் சேர்ந்த பிறகே கடனுக்கு விண்ணப்பிக்க வேண்டும். நல்ல மதிப்பெண் பெற்று, தேர்வானவர்களுக்கு முன்னுரிமை அளிக்கப்படும். (கல்லூரியில் சேர்ந்த பிறகு கல்விக்கடன் கிடைக்கலைனா என்ன செய்யிறது?. ”அது உங்க தனிப்பட்ட பிரச்சனை”)

ஆலோசனை 2:

கடன் கேட்கும் பலரும் ஏழை மாணவர்களாக இருக்கின்றனர். பலருக்கு கடன் கொடுப்பதற்காக ஒதுக்கப்பட்ட வங்கிகளில் கணக்கு இருப்பதில்லை. (வேற வங்கியில கணக்கு இருந்தா?. அங்கயே நீங்க விண்ணப்பிக்கலாம் ஆனா தரமாட்டோம்) எனவே, கணக்கை துவங்கி, சில மாதங்கள் உங்களை நாங்கள் கண்காணித்த பின்னர் கடனுக்கு விண்ணப்பிக்க முயற்சிக்க வேண்டும். (இதுக்கு பலநாளாகுமே?. அதுதான எங்களுக்கும் வேணும்)

ஆலோசனை 3:

கடனைத் திருப்பிச் செலுத்துவதை உத்திரவாதப் படுத்தும் வகையில் வருமானச் சான்றிதழ் பெற்று வந்தால் வங்கி மேலாளர்களுக்கு நம்பிக்கை அதிகமாகும். குறைந்த சம்பளம் பெறுவதாக சான்றிதழ் கொடுப்பவர்களுக்கு கடன் கிடைக்க வாய்ப்பு குறைவு. (இது எதுக்கு குடுக்கணும்? ”அட, கடன திருப்பி குடுக்க உத்திரவாதம் வேணாமா? சுலபமா கடன் கிடைச்சா நிறைய பேர் வந்துருவாங்க சார்)

ஆலோசனை 4:

சொந்தமாக நிலம் இருந்தால் அதற்கான ஒரிஜினல் பத்திரம் அல்லது வேறு ஏதாவது மதிப்பு மிக்க சொத்துக்களை தயார் செய்துகொள்ள வேண்டும். பெற்றோர் எத்தேனும் தொழில் நடத்துபவராகவோ, நிறுவன அதிபராகவோ இருந்தால் கடன் கிடைப்பது எளிது. (அப்ப ஏழைகளுக்கு கடன் குடுக்க மாட்டீங்களா? ”ஹீ ஹீ ... கல்விக்கடன் ஏழை மாணவர்களுக்குதான், ஆனா பிசினஸ் முக்கியம் இல்லையா)

ஆலோசனை 5:

கல்லூரிகள் கேட்கும் நன்கொடை கடனாக தரப்பட மாட்டாது. குறைந்தபட்ச கட்டணத்தை மட்டும் எழுதி விண்ணப்பிக்க வேண்டும். (இத கல்லூரிகள் கிட்ட தான சொல்லனும்? ஒருவேளை அதிக கட்டணம் வசூலிக்கிற கல்லூரிகள் மேல நடவடிக்கைக்கு பரிந்துரைப்பீங்களா? நோ நோ ... அது டிபார்ட்மெண்ட் வேற. நாங்க கடன் தொகை குறைக்க சாக்கு மட்டும்தான் சொல்லுவோம்)

ஆலோசனை 6:

மாவட்ட நிர்வாகம், முன்னோடி வங்கிகளின் வழிகாட்டுதலின் பேரில்தான் நாங்கள் செயல்படுகிறோம். எனவே மாணவர்கள் நேரடியாக வங்கிகளுக்கு வருவதைவிட, முதலில் மாவட்ட நிர்வாகம், முன்னோடி வங்கிக்கு சென்று மனுக் கொடுத்த பின்னர் எங்களிடம் வரவேண்டும். (முதல்லயே உங்க கிட்ட வந்தா?. நாங்களே உங்களை அங்கெல்லாம் அனுப்பி, அதுக்கும் சலிக்காம நீங்க வந்தா அடுத்த ஆலோசனை குடுப்போம்)

ஆலோசனை 7:

மதிப்பு மிக்க சொத்துக்களின் ஒரிஜினல் பத்திரத்தை பிணையாக கொடுத்தால் கடன் கிடைப்பது எளிது. (இதுக்குபேரு கல்விக்கடனா? ... நாங்க உங்கள கல்விக்கடன் வாங்கச் சொன்னோமா?)

ஆலோசனை 8:

ஒரிஜினல் டிசி, மதிப்பெண் பட்டியல் ஆகியவற்றை கொடுப்பது கட்டாயம். (முதல் ஆலோசனைல கல்லூரில சேர்ந்த பின்னர்தான் விண்ணப்பிக்கனும்னு சொன்னீங்க, ஒரிஜினல் சான்றிதழ்களை குடுத்தா தான கல்லூரியில சேர முடியும்? ஆமா அதுதான் முதல்ல ... அப்ப தான சார் அலைக்களிக்க முடியும்? என்று கேட்காமல் கேட்டார்கள் அவர்கள்.)

இதெல்லாம் மத்திய அரசின் வழிகாட்டுதல்களில் இல்லையே? என்று கேட்டால், “மத்திய அரசு வழிகாட்டுதல்கள் மட்டும்தான் தந்திருக்கிறது. இதற்கென எந்த ஒதுக்கீடும் செய்யவில்லை. வங்கிகள் தங்கள் பணத்தில் கடன் கொடுக்க வேண்டும். எனவே நாங்கள் கேட்பதை நீங்கள் கொடுத்தாகவேண்டும்” என்று வெடிக்கிறார்கள் அவர்கள். பெரிய முதலாளிகள் வாங்கிய பலாயிரம் கோடிகள் வராக்கடனாக தள்ளுபடி செய்ய்யபடுகிறது. ஏழை மாணவர்களையோ, அற்ப காரணங்களுக்காக கால் கடுக்க நடக்கச் செய்கிறது.

”விழித்திடு தோழா, நமை வதைக்கும் பொய் விதிகளைத் திருத்திட வேண்டும்.”

அழகியல் ...

2010-06-17T14:41:00.001-07:00

வானத்தின் அடியில்
ஒழுகாததொரு கூரையும்

கம்பிகளூடே உலகம்
காட்டுகிற ஜன்னலும்

”லைலா” புயல்
கரை கடப்பதை
நேரடி செய்தியாக்கும்
தொலைக்காட்சியும்

அம்மா கொடுத்த
சூடான காபியும்...

குடிசை வாசிகளை,
வீடற்றவர்களை,
சாலையோரத்தின்
அனாதைச் சிறுவர்களை,
கடலுக்குள் தொலைந்த
மீனவத் தோழர்களை
அப்போதைக்கு மறக்க முடிகிற
சொற்ப நினைவாற்றலும்
இருப்பதால்

மழையை ரசிக்க
வாய்க்கிறது நமக்கு ...

எல்லாம் நல்லபடியாக நடக்கிறது !

2010-06-12T09:17:00.000-07:00

எல்லாம் நல்லபடியாக நடக்கிறது.

மக்கள் பட்டினியால் செத்துக் கொண்டிருக்கிறார்கள் !

புத்தக அறிமுகம்
”உணவு நெருக்கடி: வளர்ந்த நாடுகளின் புதிய சுரண்டல்”

ஆசிரியர்: ஏ.பாக்கியம்
விலை: ரூ.10
வெளியீடு: பாரதி புத்தகாலையம்.

கட்டுரையின் தலைப்பு என்னால் தேர்ந்தெடுக்கப்பட்டதல்ல.

ஐக்கிய முற்போக்கு கூட்டணி(II) அரசின் முதலாண்டு நிறைவடைந்ததையடுத்து பத்திரிக்கையாளர்களின் கேள்விக்கு பதில் சொன்ன பிதமர் இவ்வாறு குறிப்பிட்டார்.

“இந்தியாவின் பொருளாதார வளர்ச்சி 8.5 சதவீதமாக இருக்கும். இதை 10 சதவீதமாக அதிகரித்து சாதனை புரிவோம். விலைவாசி தொடர்ந்து உயர்ந்து வருவது கவலையளிக்கிறது. பணவீக்கம் அதிகமாக இருக்கிறது. இதை கட்டுப்படுத்தி சாதாரண மக்களை பாதிக்காமல் இருக்க நடவடிக்கை எடுக்கப்பட்டுள்ளது.”

அதுவே ரத்தினச் சுறுக்கமாக தலைப்பாக அமைந்துவிட்டது.

கடந்த 5 வருடங்களில் அரிசி உள்ளிட்ட முக்கிய தானியங்கள் 150 சதம் விலையேறியுள்ளன. தானிய வகைகள் சராசரியாக 75 சதம் விலையேறியுள்ளன. இது உணவுப்பொருட்களின் விலைப்பட்டியல் தயாரிக்கப்பட்ட 1845 ஆம் ஆண்டிலிருந்து கடந்த 165 ஆண்டுகளில் கண்டிராத ஒன்று. ஆனால், இது ஆட்சியாளர்கள் வியாக்கியானம் செய்வதைப் போல எதிர்பாராமல் எழுந்த அபாயமல்ல. அதன் பின்னால் ஒரு அரசியல் இருக்கிறது. திட்டமிட்டு ஏற்படுத்தப்பட்ட அந்த அரசியல் குறித்து ஏ.பாக்கியம் எழுதிய ”உணவு நெருக்கடி - வளர்ந்த நாடுகளின் புதிய சுரண்டல்” , எனும் சிறிய பிரசுரம் பேசுகிறது.

இன்று ஏற்பட்டுள்ள உணவு நெருக்கடி, தேவைக்கு குறைவான உற்பத்தியால் ஏற்பட்டதல்ல. உதாரணமாக கடந்த 50 ஆண்டுகளில் மக்கள் தொகை 2.6 மடங்கு அதிகரித்துள்ளது. உணவு தானிய உற்பதியோ 3.3 மடங்கு உயர்ந்துள்ளது. ஆக தேவைக்கும் கூடுதலான உற்பதி ஏற்பட்டுள்ள இந்தக் காலத்தில்தான் வரலாறு காணாத நெருக்கடியும் ஏற்பட்டுள்ளது. இதற்கு குறிப்பாக 3 காரணங்களை இப்புத்தகம் முன்வைக்கிறது.

1.சுதந்திரச் சந்தை (உலகமயம்)

2. யூகவணிகம்,

3.உயிரியல் எரிசக்தி.

உலகமயமாக்கல் உலக நாடுகளின் சந்தைகளை பெரும் நிறுவனங்களின் லாப வேட்டைக்காக திறந்துவிட்டது. இதன்மூலம், உணவுதானிய சந்தைக்குள்ளும் பெரும் நிறுவனங்கள் கால்பதித்தன. அவர்கள் பெருமளவில் தானியங்களை வாங்கி அவற்றை அதிக லாபம் கிடைக்கும் சந்தையில் விற்கத் துவங்கினார்கள். இந்த நடவடிக்கையால், ஒரு நாடு முதலில் தனது ஏற்றுமதியை முடித்து பின்னர் மீதமிருந்தால் தங்கள் உணவுக்காக வைத்துக்கொள்ளலாம் என்ற நிலை ஏற்பட்டது. அதாவது உணவு என்னிடமே இருந்தாலும், அது விற்று லாபம் பார்ப்பதே என் வேலை.

இவ்வாறு விவசாய உற்பத்தி வணிகமானதால், பட்டினிச் சாவுகளும் அதிகரிக்கின்றன. அதே சமயம் விவசாயிகளும் உற்பதியாளர்கள் என்ற அடையாளத்தை இழந்து, பெரும் நிறுவனங்களைச் சார்ந்து வாழும் நிலைக்கு தள்ளபட்டுள்ளனர். அதாவது, இந்தியா, அடிமைப்பட்டுக் கிடந்த காலத்தில் நிலைக்கே தள்ளப்படுவதாக நூலாசிரியர் அதிர்ச்சியளிக்கும் புள்ளிவிபரங்கள் மூலம் விளக்குகிறார்.

அதே போல, மிக முக்கியமான ஆபத்தாக, பொருள் விளைவதற்கு முன்பாகவே அதனைக் கொள்முதல் செய்து, செயற்கையான தட்டுப்பாட்டை உறுவாக்கி, அதன் மூலம் விலையேற்றம் செய்யும் நவீன பதுக்கல் முறையான ”முன்பேர வர்தக”த்தை அவர் குறிப்பிடுகிறார். இவ்வாறான வணிகர்களுக்கு, யூக பேரம் மூலம் 2007 ஆம் ஆண்டில் மட்டும் ரூ.4 லட்சத்து 48 ஆயிரத்து 788 கோடி லாபம் கிடைத்திருக்கிறது. அதாவது, அவ்வளவு பணம் சாதாரண ஏழை, நடுத்தர மக்கள் சட்டைப்பையிலிருந்து திருடப்பட்டிருக்கிறது. இது ஒவ்வொராண்டும் அதிகரிக்கிறது. (இவ்விடத்தில், 2007 ஆம் ஆண்டு கோதுமை, பருப்பு மற்றும் சர்கரை ஆகிய பொருட்கள் மீது யூக பேர வாணிகத்தை தடை செய்தபோது, அப்பொருட்களின் விலை 20 சதம் குறைந்ததும் கவனிக்கத்தக்கது.)

மேலும், முக்கியமான மற்றொரு காரணம் உயிரியல் எரிசக்தி: எரிசக்தி துறையில் தங்கள் ஆதிக்கத்தை நீடிக்கச் செய்வதற்காக, அமெரிக்காவும், ஐரோப்பிய கூட்டமைப்புநாடுகளும் பையோ டீசல் தயாரிப்பை ஊக்குவிக்கின்றன. அமெரிக்காவில், கடந்த 2008 ஆம் ஆண்டு விளைந்த சோளத்தில் 30 சதம் உயிரியல் எரிசக்தி தயாரிப்புக்காக ஒதுக்கப்பட்டது. இந்தத் திட்டத்திற்காக அந்த நாடுகள் தங்கள் நிலத்தையும், மனித உழைப்பையும், வளத்தையும் மட்டும் பயன்படுத்துவதில்லை. வாய்ப்புள்ள எல்லா நாடுகளிலும், ஆயிரக்கணக்கான ஏக்கர் நிலங்களை அவை வளைத்துப்போட்டுள்ளன. இத்திட்டம் முழு மூச்சுடன் செயல்படுத்தப்பட்டால், உலகின் பல நாடுகளின் விவசாய நிலங்கள் பணக்கார நாடுகளின் வாகனங்களின் பசியைத் தீர்ப்பதர்கானதாக மாற்றப்படும்.

உணவு தானியங்கள் எப்போதெல்லாம் வணிகமயமாகின்றனவோ, அப்போதெல்லாம் பட்டினிச் சாவுகள் அதிகரித்திருக்கின்றன என்பதுதான் இப்புத்தகம் நம் முன்பாக வைத்திருக்கும் எச்சரிக்கை.

மேற்குறிப்பிட்ட உணவு நெருக்கடி ஜப்பான், தென் கொரியா, சீனா போன்ற நாடுகளை பாதிக்கவில்லை. இதற்கு முக்கியமான காரணம், அவர்கள் தேவைக்கு தன்னிரைவான உற்பத்தியை உத்திரவாதப்படுத்தியிருக்கிறார்கள். சேமிப்பு போகவே ஏற்றுமதி செய்வோம் என உறுதியாக இருக்கிறார்கள். சர்வதேச வணிக ஒப்பந்தங்களின் போது உணவுப் பாதுகாப்பை பாதிக்காத வகையில் மிக கவனமாக அமைத்துக் கொள்கின்றனர்.

ஆனால், இந்தியா மேற்சொன்ன பாதுகாப்பை ஏற்படுத்த தவறிவிட்டது. கங்கிரசும், பாஜகவும் போட்டிபோட்டுக் கொண்டு பன்னாட்டு நிறுவனங்களுக்கும், யூக வணிகத்திற்கும் கதவு திறந்து விட்டுள்ளார்கள். அதுமட்டுமின்றி மக்களை மேலும் இக்கட்டில் தள்ளும் வகையில், விலையேற்றத்திற்கன பல்வேறு ஏற்பாடுகளைச் செய்துவருகின்றனர்.

”உணவுப் பாதுகாப்புச் சட்டம்” என்பதை நீங்கள் கேள்விப்பட்டிருப்பீர்கள். அது ஒரு ஏமாற்று வேலை என்பதை இப்பிரசுரம் தெளிவாக முன்வைக்கிறது. உண்மையிலேயே உணவுப் பொருட்களின் விலை குறைய வேண்டுமானால், என்ன செய்யவேண்டும் எனவும் விளக்குகிறது.

வறுமைக்கோடு என்பதை துள்ளியமாக கணக்கிட வேண்டும்.
எல்லா மக்களுக்குமான பொது வினியோகத்தை பலப்படுத்த வேண்டும்.
விவசாயம் மற்றும் ஆராய்ச்சிக்கான பொது முதலீட்டை அதிகப்படுத்த வேண்டும்.
விளைபொருட்களை கொள்முதல் செய்வது, இடுபொருட்களை வழங்குவது, விளை நிலங்களைப் பாதுகாப்பது, கூட்டுறவு கடன் வசதியை ஏற்படுத்துவது என விவாசாயிகளைப் பாதுகாக்கும் நடவடிக்கைகளுக்கு முதலிடம் தருவதும் மிக அவசியம்.
அத்துடன், உடனடியாக யூக வணிகத்தை தடை செய்வது மிக அடிப்படையான தேவையாகும்.

மேற்சொன்ன பரிந்துரைகள் மிக அத்தியாவிசயமானவை.

இத்தனையும் சொல்லுவதுடன் இப்பிரசுரம் முடிந்துவிடவில்லை.

”செய்திகளைப் படித்தவர்கள் செயலில் இரங்க வேண்டும், மகத்தான மக்கள் எழுச்சியே மாற்றத்தை சாதிக்கும்.” என்கிறார் ஆசிரியர். ஆம், “செயல்” .. அதுவே நாம் பேசுவதற்கான சிறந்த மொழி.

செல்போன் டவர்களால் புற்றுநோய் அபாயம் !

2010-06-01T19:25:00.000-07:00

பாதுகாப்பு விதிமுறைகளை பின்பற்றாமல், பொதுமக்கள் கூடும் இடங்கள் மற்றும் குடியிருப்பு பகுதிகளில் வைக்கப்படும் செல்போன் டவர்கள் புற்றுநோய் அபாயத்தை அதிகரித்திருப்பதாக ”டெஹெல்கா” செய்திநிறுவனம் தெரிவித்துள்ளது. தலைநகர் டெல்லியை மையமாக வைத்து டெஹெல்கா மற்றும் கோஜெண்ட் (Cogent eMr Solutions limited) எனப்படும் தனியார் நிறுவனமும் நடத்திய ஆய்வில் இந்த அதிர்ச்சிதரும் தகவல் வெளியாகியுள்ளது.

இந்தியாவில் தொலைதொடர்புத் துறையின் அதிவேக வளர்ச்சி பெற்றுள்ளது. புதிய புதிய நிறுவனங்கள் இத்துறையில் கால்பதித்து தங்கள் சேவையைத் துவக்கியுள்ளன. அவர்கள் புதிய சந்தையைப் பிடிப்பதிலும், ஏற்கனவே பிடித்துள்ள சந்தையை தக்கவைப்பதிலும், மிகுந்த அக்கரை காட்டுகின்றனர். இதன்காரணமாக, செல்போன் டவர்களின் எண்ணிக்கை பல மடங்கு அதிகரித்துள்ளது. உதாரணமாக டெல்லியில் 2006 ஆம் ஆண்டில் 1700 செல்போன் டவர்கள் இருந்தன. தற்போது அது சுமார் 6 ஆயிரமாக உயர்ந்திருக்கிறது.

டெல்லியில் 138 சதம் மக்கள் செல்போன் பயன்படுத்துகிறார்கள். அதாவது ஒருத்தருக்கு 1 போன் என்ற நிலை மாறி பலர் 2 செல்போன் இணைப்புகளை பயன்படுத்தி வருகின்றனர்.

இதில் சென்னை மாநகரம் டெல்லியை மிஞ்சியுள்ளது. சென்னையில் 143 சதம் பேர் செல்போன் பயன்படுத்துகிறார்கள். அதற்கு அடுத்த இடத்தில் டெல்லியும், அதனைத் தொடர்ந்து மும்பையில் 112 சதமும் கொல்கத்தாவில் 102 சதமும் செல்போன் பயன்பாடு உள்ளது.

கூடுதல் லாபத்தைக் கொண்டாடும் தொலைத்தொடர்பு நிறுவனங்கள், பாதுகாப்பு விதிகளை ஓரமாக ஒதுக்கி வைத்துள்ளனர். இதனால் காரணமாக மக்கள் அதிகம் கூடும் இடங்களிலும், குடியிருப்பு பகுதிகளிலும் வைக்கப்படும் உயரம் குறைந்த டவர்கள் இந்திய நகரங்களுக்கு கடுமையான அச்சுறுத்தலை ஏற்படுத்தியுள்ளன.

செல்போன் டவர்களில் இருந்து இஎம்ஆர் எனப்படும் மின் காந்த அலைகள் வெளியாகின்றன. இந்த அலைகள் நம்மீது உடனடியாக விளைவை ஏற்படுத்துவதில்லை. மனிதர்களின் மரபணுக்கள் (டிஎன்ஏ) மீது தாக்குதலை தொடுப்பதில்லை. ஆனால் புகையிலையைப் போல, மனித உடலில் புகுந்து பாதிப்பை ஏற்படுத்துகின்றன.

ஒருவர் தொடர்ந்து 3 வருடங்கள் இக்கதிர்களால் பாதிக்கப்பட்டால் அவருக்கு தூக்கமின்மை, உடல் சோர்வு ஏற்படும். 4 முதல் 5 வருடங்களில் இந்த பாதிப்பு பார்வைக் கோளாராகவும், உடல் வலி, தோல் வியாதியாக வெளிப்படும். 5 முதல் 10 வருடங்களில் இதயக் கோளாறு ஏற்படலாம். 10 வருடங்களைத் தொடும்போது அது மூளைக் கட்டி எனப்படும் பிரைன் டியுமர் ஆகவோ, அல்லது கான்சர் சார்ந்த உயிர் குடிக்கும் வியாதியாக மாறுகிறது.

நாம் சாதாரணமாக உபயோகிக்கும், செல்போன், ப்ளூடூத், மின் அடுப்பு (மைக்ரோ வேவ் ஓவன்), தொலைக்காட்சிப் பெட்டி, குளிர் சாதனப் பெட்டி உள்ள மின் சாதனங்கள் அனைத்துமே சிறிய அளவில் மின்காந்த அலைகளை வெளியிடுகின்றன. ஆனால், பாதுகாப்பு எல்லைக்குள் கதிர்வீச்சின் அளவு இருக்கும்போது பெரிய பாதிப்பை ஏற்படுத்துவதில்லை. அப்படியே பாதித்தாலும், பொருட்களின் உரிமையாளர், அவரது குடும்பத்தாரை அது பாதிக்கும். ஆனால் பொது இடங்களில் வைக்கப்படும் செல்போன் டவர்கள், பொதுமக்கள் மீது கடும் விளைவுகளை ஏற்படுத்துகின்றன.

குறைந்த உயரத்தில் வைக்கப்படும் செல்போன் டவர்களில் இருந்து வெளியாகும் மின்காந்த அலைகள், அருகிலுள்ள சுவர்களில் எதிரொலிக்கின்றன. மக்களின் மீது நேரடி விளைவை ஏற்படுத்துகின்றன.

ICNIRP எனப்படும் சர்வதேச அமைப்பு வெளியிட்ட 1996 ஆம் ஆண்டு வெளியிட்ட சுகாதார ஆய்வறிக்கையில் ஒரு சதுர மீட்டரில் 600 மில்லி வாட் அளவு கதிர்வீச்சு இருக்கும்வரை சாதாரண மக்களுக்கு பாதிப்பு ஏற்படாது என்று தெரிவித்துள்ளது. இதையே இந்திய தொலை தொடர்பு அமைப்பும் ஏற்றுகொண்டுள்ளது. ஆனால் ஏட்டளவில் ஏற்றுக் கொண்டிருப்பதால் யாருக்கு பயன்?.

டெல்லியை மையமாக வைத்து நடத்தப்பட்ட டெஹெல்கா ஆய்வில்: 40 சதம் இடங்கள் அதிகபட்சம் ஆபத்தான பகுதிகளாக கண்டறியப்பட்டுள்ளன. அதாவது பாதுகாப்பான 600 மி.வா அளவை விட பல மடங்கு கதிர்வீச்சுடைய பகுதிகள். 31 சதம் பகுதிகள் பாதுகாப்பற்ற பகுதிகள். (2 - 6 மடங்கு அதிக கதிர்வீச்சு) 9 இடங்கள் 600 மி.வா.வை விட சற்று கூடுதல் கதிர்வீச்சு கொண்டிருந்தன. அதாவது பரிசோதிக்கப்பட்ட 100 முக்கிய மையங்களில் 20 சதம் மட்டுமே கதிர்வீச்சு ஆபத்து கட்டுக்குள் இருந்தது. (to see the table click here >>>> IIIIIIII ) காமன் வெல்த் விளையாட்டு போட்டிகள் நடைபெறவுள்ள யமுனா விளையாட்டு அரங்கம் உட்பட முக்கியமான பல பகுதிகள் பாதுகாப்பற்ற பகுதிகளாக இருந்தன.

டெல்லியைக்காட்டிலும், சென்னையில் இந்த பாதிப்பு கூடுதலாக இருக்கும். இந்தியாவின் ஒவ்வொரு நகரமும் மேற்கண்ட் அச்சுறுத்தலுக்கு ஆளாகியுள்ளன. ICNIRP இன் கட்டுப்பாட்டு விதிகளை பல நாடுகள் சரியாக கடைப்பிடிக்கின்றன. அமெரிக்கா, இங்கிலாந்து, கனடா உள்ளிட்ட நாடுகள் மக்கள் குடியிருக்கும் பகுதிகளில் செல்போன் டவர்கள் அமைக்க அனுமதிப்பதில்லை. அத்துடன் டவரின் உயரம் 150 அடிக்கு குறையாமல் பார்த்துக் கொள்கின்றனர். சைனாவில் கதிர்வீச்சின் அளவு 600 மி.வா க்கு அதிகரிக்காமல் கட்டுப்படுத்தபட்டுள்ளது. எனவே, இது முடியாத ஒன்றல்ல. இந்தியாவும் செல்போன் டவர்களுக்கென விதிகளை வகுத்து, அவற்றை உறுதியாக அமல்படுத்த வேண்டியது அவசியம்.

புதிய வசதிகளையும், புதிய கண்டுபிடிப்புகளையும் நாம் விரும்புகிறோம். ஆனால், மக்களை பாதிக்காத வகையில் அவை அமைந்திருக்க வேண்டும். மூளைக் கட்டியுடன் அவதிப்பட வைக்கும் வளர்ச்சியை யார் விரும்புவார்?

”பிறப்பொக்கும் எல்லா உயிர்க்கும் ...”

2010-05-30T02:29:00.000-07:00

தமிழ்ச் செம்மொழி மாநாட்டின் பிரகடனம் இது. மாநாட்டின் வேலைகள் வேக, வேகமாக நடந்துவருகின்றன. ஆனாலும், பிறப்பொக்கும்.. என்ற மன நிலையை தமிழரிடையே பரப்பும் வகையில் அவை செல்வதாகத் தெரியவில்லை. இதே நேரத்தில் கடந்த 3 ஆண்டுகளாக தமிழகத்தில் அதிர்வலைகளை ஏற்படுத்திவரும் தீண்டாமை ஒழிப்பு முன்னணியின் மாநாடு மாநாடு புதுக்கோட்டையில் நடைபெற்றது. தொழிற்சங்க அமைப்புகள், ஜனநாயக வாலிபர், மாதர் மாநவர் அமைப்புகளுடம் தலித் விடுதலைக்காக இயங்கும் அமைப்புகள் பலவற்றை ஒன்றிணைத்து உருவாக்கப்பட்டது இவ்வமைப்பு..

கடந்த 3 ஆண்டுகளில்...

அருந்ததிய மக்களுக்கு கல்வி மற்றும் வேலை வாய்ப்பில் 3 சதவீத உள் இட ஒதுக்கீட்டை சட்டப்படியாக பெற்றுத்தந்தது. அதனை அமல்படுத்துமாறு அரசை போராட்டங்கள் மூலம் தொடர்ந்து நிர்பந்திப்பது.
தலித் மக்கள் மீது இந்த சமுதாயம் திணிக்கும் கேவலமான அடக்கு முறைகளையும், அதன் அடையாளங்களையும் எதிர்ப்பது.
கடவுள் வாழும் புனித தலங்களாக பெயரிடப்பட்ட கோவில்களிலும், பிணமெரிக்கும் சுடுகாட்டிலும் இன்ன பலவிடங்களிலும் கடைப்பிடிக்கப்படும் சமத்துவமற்ற நிலைக்கு எதிரான மக்கள் போராட்டங்களை முன்னெடுப்பது என அவ்வமைப்பு குறிப்பிடத்தக்க போராட்டங்களை நிகழ்த்திக் காட்டியிருக்கிறது.

தலித் மக்கள் வாழ்க்கைத்தரத்தை மேம்படுத்துதல், சமூக நீதியை நிலைநாட்டுதல், உழைக்கும் வர்கத்திற்குள்ளான ஒற்றுமையை கட்டியெழுப்புதல் ... என மூன்று தளங்களில் அவர்கள் செயல்பட்டிருக்கிறார்கள்.

தமிழகத்தின் டீக்கடை பெஞ்சுகளின் விவாதத்திற்கான பொருளாக, கருணாநிதியும், ஜெயலலிதாவும், சினிமா பிரபலங்களும், தனிப்பட்ட தலைவர்களும் அவர்களின் வாழ்க்கையும், சினிமா கிசுகிசுவும், கிரிக்கட்டும் இக்கும் இக்காலத்தில் உத்தப்புரத்தையும், செட்டிபுலத்தையும் மைய விவாதப் பொருளாக்கியது அவர்கள் செய்த சாதனையே.

ஆனால், இந்த மாநாடு குறித்த செய்திகளை பல பத்திரிக்கைகளும் செய்தி ஊடகங்களும் வெளியிடவேயில்லை. முதல்வரின் புதல்வர்கள் தும்மினால் கூட செய்தியாக்கும் இன்றைய ஊடகங்களுக்கு, இதுவெல்லாம் செய்தியாவதில்லை.

”பிறப்பொக்கும் எல்லா உயிர்க்கும்” என்ற வள்ளுவன் குறளின் முதல் அடி, நம் தமிழர் வாழ்க்கை உரைக்கும் செய்தியெனில் ... புகழ்பெற்ற வரலாற்றுச் சின்னமான சிதம்பரம் நடராஜர் கோவிலில், நந்தனார் நடந்துசென்ற பாதையைக் கூட சுவர் வைத்து மறைத்திருக்கும் அவலத்தை என்னவென்பது?. இதுபோன்ற சின்னங்களை மாற்றியமைப்பது, முற்போக்கான தமிழகளின் வரலாற்றுக் கடமையில்லையா?

இதோ அவர்கள் தம் முதல் மாநாட்டிலேயே அறிவித்திருக்கிறார்கள் .. “சிதம்பரம் நடராஜர் கோயிலின் உள்ளிருக்கும் தீண்டாமைச் சுவரை இடித்து, தமிழக அரசு சமூக நீதியை நிலைநாட்ட வேண்டும். ஒரு மாத காலத்திற்குள் அந்தச் சுவர் இடிக்கப்படவில்லை என்றால், நாங்கள் முன்நின்று எல்லா பிரிவுகளையும் சேர்ந்த முற்போக்காளர்களை ஒன்று திரட்டி அந்த அவமானச் சின்னத்தை உடைத்தெரிவோம்.”

மனதிற்குள் இருக்கும் சுவர் தான், இவ்வாறு வெளிப்படுகிறது. அத்தகைய சுவர்களை உடைப்பதன் மூலம், ஆதிக்க எண்ணம் கொண்டோருக்கு எதிரான வலுவான தாக்குதலை நாம் நடத்துகிறோம். இவ்வாறான சுவர் இடிப்பு போராட்டங்கள், தமிழகத்தில் சாதி குறித்த வெளிப்படையான விவாதத்திற்கு வழிவகுக்கும். பிற்போக்கான சாதியடுக்கு சிந்தனைகள் பொது மேடையில் தூள்தூளாகும்.

தமிழகத்தில் பல கிராமங்களிலும், ஒதுக்கப்பட்ட பகுதிகளில் இருக்கும் ஒட்டுக்குடிசைகளில் வாழும் தலித் மக்களை முன்னேற்றவும், ”அவர்கள் அடங்கிப்போகப் பிறந்தவர்கள்” என்ற ஆதிக்க எண்ணத்தை மாற்றி எழுதவும், பொருளாதார அடிப்படையில் ஒரே பிரிவில் இருந்தாலும், சாதி வேற்றுமைகள் பேசி பிரிந்துகிடக்கும் உழைக்கும் தமிழினத்தை ஒன்றிணைக்கவும் ஒரு மக்கள் இயக்கம் தேவைப்படுகிறது. அந்த இயக்கம், பெரியார் துவங்கிய சமூக நீதிப் போரை முழுமையாக முடிக்கவேண்டியிருக்கிறது. சாதிப்படிநிலைகளாக பிரிந்துகிடைக்கும் மக்களிடையே, ”எல்லோரும் ஓர் குலம்” என்ற வாழ்நிலையை ஏற்படுத்த வேண்டியிருக்கிறது. இது தானாக நடந்தேரும் என்று நினைத்தால், அவர் முட்டாள்களின் சொர்கத்தில் வாழ்கிறார் என்று பொருள். நாம்தான் முடிக்க வேண்டும். அதற்கென செயல்படத் துவங்க வேண்டும், இன்றே, இப்பொழுதே .. இந்த நொடியே .. துவங்குவோம்.

நாளை நமதே ... இன்று செயல்பட்டால் ...

நொய்யல் நதியை காப்பாற்ற .. செய்ய வேண்டியது என்ன?

2010-04-21T07:00:00.000-07:00

மீன்கள் துள்ளி விளையாடிட... ஜீவனுள்ள நதியாக விளங்கிய நொய்யல் நதி இன்று சாயக்கழிவுகளும், தொழிற்சாலைக் கழிவுகளும், நகரத்தின் இன்ன பிற கழிவுகளும், குப்பைக் கூளங்களும் நிரம்பி கழிவுநீர்க் கால்வாயாக ஓடிக் கொண்டிருக்கிறது.

மேற்குத்தொடர்ச்சி மலையில் வெள்ளிங்கிரி மலைப்பகுதியில் உருவாகும் நொய்யலாறு சுமார் 180 கி.மீ., நீண்டு கிடக்கிறது. 32 பெரிய ஏரிகள், நூற்றுக்கணக்கான குளங்களையும் நிரப்பும் இதன் நீர் பிடிப்புப் பகுதிகளின் பரப்பு சுமார் 3.5 லட்சம் ஹெக்டேர். இப்பகுதிகளில் 1970 முதல் 1994 வரை ஆண்டுக்கு சராசரியாக 607.8 மி.மீ., மழை பெய்துள்ளது. வருடத்தில் சராசரியாக 39.4 நாட்கள் மழை பெய்யும் நொய்யலில் வருடம் ஒரு முறையாவது வெள்ளப்பெருக்கு ஏற்பட்டிருக்கிறது. குறிப்பாக 1974 ஆம் ஆண்டு வந்த பெருவெள்ளத்தில் திருப்பூர் நகரின் மையப்பகுதியே நீரில் மிதந்தது, தற்போதைய மாநகராட்சி அலுவலகம் உள்ள பகுதி வெள்ளத்தில் மூழ்கியது. ஈஸ்வரன் கோயில் பாலத்தை சேதப்படுத்திய அந்த வெள்ளம் யுனிவர்சல் தியேட்டரையும் தாண்டி வீடுகளுக்குள்ளும் புகுந்தது. நொய்யலாற்றில் இயற்கையாக அமைந்துள்ள பாறைகள்தான் அந்த வெள்ளப் பெருக்கின் சீற்றத்தை மட்டுப்படுத்தி பேரழிவு ஏற்படாமல் செய்தன.

அமிலத்தன்மை:

வளமான நதியாக ஓடிக் கொண்டிருந்த நொய்யலாறு, கடந்த 20 ஆண்டுகளில் முழுமையாக பாழ்பட்டுள்ளது. புள்ளிவிபரங்களின் படி, திருப்பூரில் ஆண்டுக்கு 1500 டன் சாயக்கழிவுகள் வெளியேற்றப்படுகின்றன. கந்தக அமிலம், ஹைட்ரோ குளோரிக் அமிலம், சலவை திரவம், சோடா உப்பு, சோடியம் பெர்ஆக்சைடு மற்றும் வண்ண வேதிப்பொருட்கள் நொய்யலின் அமிலத்தன்மையை அதிகரித்துள்ளன. அத்துடன், மாநகரின் கழிவு நீர், தொழிற்சலைகளின் வேறு பல கழிவுகளும் கலந்து மாசு அளவு அதிகரித்துள்ளது. இதனால் நீரிலுள்ள ஆக்சிஜனின் அளவு 1900 ஆண்டுவாக்கில் இருந்ததைவிட குறைந்து தற்போது ஆறு தன் ஜீவனிழந்துள்ளது. இதே நிலை நீடித்தால் இன்னும் 15 ஆண்டுகளில் திருப்பூரின் சுற்றுப்புறச் சூழல் மிக மோசமாக பாதிக்கப்படும்.

நொய்யல் நதிக்கரையில் வசிக்கும் மக்கள், தங்கள் விவசாயத்திற்கும், வாழ்க்கைக்கும் ஆதாரமாக விளங்கிய விலை மதிப்பற்ற இயற்கைச் செல்வத்தை இழந்து தவிக்கிறார்கள். தற்போது அது குறித்த விழிப்புணர்வு அதிகரித்து வருகிறது. நொய்யலைச் சுத்தப்படுத்தி பழைய நிலைக்கு மீட்க வேண்டும் என்பதே இங்குள்ள பெரும்பாலோரின் எதிர்பார்ப்பாக உள்ளது.

நொய்யல் சீரமைப்பு:

நொய்யல் ஆற்றைச் சீரமைத்து அழகுபடுத்துவோம் என்ற அறிவிப்புடன் தற்போது ”நொய்யல் சீரமைப்பு குழுவினர்” சில பணிகளைச் செய்து வருகிறார்கள். அவர்கள், திருப்பூரின் மையப்பகுதியில் உள்ள ஆற்றின் ஒரு பகுதியை தூர்வாரி சுத்தப்படுத்துவதுடன், போக்குவரத்து நெருக்கடியைக் குறைக்கும் வகையில் ஆற்றோரச் சாலைகள் அமைக்கும் பணியையும் செய்யத் துவங்கியுள்ளனர். மாநகரின் இன்றைய அவசரத் தேவைகளைப் பார்க்கும்போது அவர்கள் பணி வரவேற்புக்குரியதே. ஆனால் நடைமுறையைப் பார்க்கும்போது சில அவசியமான கேள்விகளை எழுகின்றன.

எச்சரிக்கை தேவை:

நதிகள், பேரழகை மட்டுமல்ல, பேரழிவை உண்டாக்கும் சக்தியையும் தன்னுள்ளே கொண்டுள்ளவை. நதி சீரமைப்புப் பணியாற்ற துவங்கும் முன்பாக, ஆற்றின் எல்லைகள், வெள்ள அளவு, நீர்ப்பிடிப்புப் பகுதிகள், உயிர்ச் சூழல் என எல்லாக் கோணங்களிலும் ஆய்வுகள் செய்து, பின் விளைவுகளை உருவாக்காத வகையில் கவனத்துடன் திட்டமிட்டு, பின்னரே செயல்படத் துவங்கவேண்டும். ஆனால், நொய்யல் சீரமைப்புக் குழுவினர் இந்த எச்சரிக்கை உணர்வுடன் செயல்படுகிறார்களா?.

இதுகுறித்து மார்க்சிஸ்ட் கட்சியினர் சுற்றுப்புறச் சூழல் வல்லுநர்களுடன், நொய்யல் சீரமைப்புப் பணிகளை நேரடியாகப் பார்வையிட்டு கள ஆய்வு செய்தனர். அந்த ஆய்வு விபரங்கள் மற்றும் தற்போதைய புகைப்படங்களைப் பார்க்கும்போது நொய்யல் சீரமைப்புக் குழுவினர் மேற்கண்ட தன்மையில் ஆய்வுகள் செய்து வேலைகளைத் துவக்கியதாகத் தெரியவில்லை.

ஆற்றங்கரை ஆக்கிரமிப்புகள்:

நொய்யலாற்றின் எல்லைகளை வரையறுக்கப் பல ஆண்டுகளுக்குப் பின்னர் தற்போது பொதுப்பணித் துறையினர் சர்வே பணியைத் துவங்கியுள்ளனர். திருப்பூரின் உட்பகுதியில் காசிபாளையம், பூலவாடி சுகுமார் நகர், அணைக்காடு, மணியகாரம்பாளையம், மின்மயானம் ஆகிய பகுதிகளில் நொய்யலாறு சுமார் 400 அடி அகலம் பரந்துள்ளது. இதில், மணியகாரம்பாளையம் முதல் சுகுமார் நகர் வரை தெற்கு கரையோரத்திலும், சில பகுதிகளில் ஆற்றிற்குள்ளும் ஆக்கிரமிப்புகள் உள்ளன. அதேபோல் வடக்கு கரையில் அணைக்காடு, கருமாரம்பாளையம் பகுதிகளில் ஆக்கிரமிப்பு உள்ளது. காசிபாளையம் சுத்திகரிப்பு நிலையம் உட்பட சில தனியார் கட்டிடங்கள் ஆற்றின் கரையை பெருமளவு ஆக்கிரமித்துள்ளன. வளர்மதி பாலம் உள்ள பகுதியில் மிகக் குறுகலாக சுமார் 250 அடி அகலம் மட்டுமே இருக்கிறது. மேலும், மணியகாரம்பாளையம் மின்நிலையம் எதிர்புறம் ஆற்றில், நல்லுர் நகராட்சி குப்பைக் கழிவுகள் கொட்டப்பட்டு வருகிறன. இந்த இடத்தில் ஆறு மிகவும் குறுகி ஓடை போல் காட்சிதருகிறது.

குறிப்பாக கஜலட்சுமி தியேட்டர் இருக்கும் இடத்தில் பல ஆண்டுகளுக்கு முன்பு நொய்யல் ஆற்றங்கரை தியேட்டர் வாசலை ஒட்டினார்போல் இருந்தது. அதற்கு அருகிலேயே பல ஆண்டுகளுக்கு முன்பு சாலை அமைத்தனர். தற்போது அந்த சாலையும் ஆக்கிரமிப்பின் ஒரு பகுதியாக மாறி இருக்கிறது. மீண்டும் அங்கே சாலை அமைக்க மேற்கொள்ளும் முயற்சி நொய்யல் ஆற்றை மென்மேலும் குறுக்குவதாக இருக்கிறது.

ஆற்றுக்கு உள்ளே சாலை?

ஆனால், மேற்கண்ட ஆக்கிரமிப்புகளை அப்படியே விட்டுவிட்டு, கண்ணுக்குத் தெரியும் பகுதிகளில் மட்டும் வேலைகள் நடைபெறுகின்றன. ஒருபடி மேலே சென்று அணைக்காடு பகுதியை ஒட்டிய கரையில் ஆற்றிறுக்கு உள்ளேயே மாநகராட்சி திட்ட சாலை அமைத்தது. அதே பகுதியில் ஆற்றங்கரையில் சமுதாய நலக்கூடம் ஒன்றும் கட்டப்பட்டுள்ளது. இதற்கு பல்வேறு தரப்பிடமிருந்தும் எதிர்ப்பு கிளம்பியது. அதனைத் தொடர்ந்து பொதுப்பணித் துறையும், மாவட்ட நிர்வாகமும் தலையிட்டு அப்பணிகளை நிறுத்தியுள்ளன. மேலும், ஆற்றின் பரப்பில் உள்ள இயற்கையான பாறைகள் ”அழகை மேம்படுத்துதல்” எனும் பெயரில் கனரக இயந்திரங்கள் மூலம் உடைத்து இடம் மாற்றப்படுகின்றன. மேலும், ஆற்றில் கொட்டப்படும் கழிவுகளைத் தடுக்க எவ்வித நடவடிக்கையும் இல்லை.

இந்த செயல்பாடுகள், திருப்பூரின் மையத்தில் கண்ணுக்கு தெரியும் பகுதிகளில் மட்டும் நொய்யல் ஆற்றை அழகுபடுத்துவதாக உள்ளது. இப்போது நடைபெறும் பணிகள் நொய்யல் நதியை மீட்டு பழைய நிலைக்குக் கொண்டு வரும் அடிப்படை மாற்றத்துக்கு உதவாது.

பேரழிவு அபாயம்:

ஆறுகள் நீரினால் மட்டும் ஆனதல்ல, பாறைகளும், மணலும் ஆற்றின் போக்கை தீர்மானிப்பதில் முதல் பங்கு வகிக்கின்றனர். அனைத்து ஆறுகளுமே வளைந்து நெளிந்து தான் பயணிக்கின்றன, அதுதான் நீரின் போக்கு. ஆற்றின் இயல்பிற்கு மாறாக, பாறைகளை அகற்றுதல், ஆழப்படுத்துதல், எல்லைகளை குறுக்குதல் என அதன் போக்கை மாற்ற முயன்றால், வெள்ளம் பெருக்கெடுத்து எதிர்பாராத பகுதியில் பெரும் உயிர்ச்சேதத்தை விளைவிக்கும் என்கின்றனர் இயற்கை ஆர்வலர்கள். பேரிடர்கள் குறித்து முன்கூட்டியே கணிக்க முடியாத நிலையில், இதுபோன்ற பணிகள் மிகுந்த எச்சரிக்கையுடன் செய்ய வேண்டியவை.

அறிவியல் ஆய்வு அவசியம்:

கடந்த 50 ஆண்டுகளில் நொய்யல் நதியின் போக்கு குறித்து அறிவியல் அடிப்படையிலான ஆய்வு செய்யவேண்டும். புவி வெப்பமயமாக்கல் குறித்து உலகமே கவலை கொண்டுள்ளது. பல நாடுகள் அதற்கான தடுப்பு நடவடிக்கைகளை மேற்கொண்டு வருகின்றன. பருவ நிலையில் மாற்றம், வெள்ளப் பெருக்கு, வறட்சி, புதிய நோய்கள் உருவாக்கம், உணவு தானிய உற்பத்தி பாதிப்பு என பல்வேறு பிரச்சனைகளைத் தற்போது சந்தித்து வருகின்றது. எனவே நொய்யல் நதியைப் பாதுகாப்பது என்பதும் இதன் ஒரு பகுதியாகப் பார்க்கப்பட வேண்டும்.

கரையோர மேம்பாலங்கள்:

போக்குவரத்தை சீரமைக்க நொய்யலின் கரைகளையொட்டி சாலைகள் அவசியமே. ஆனால், இப்போது போல ஆற்றை ஆக்கிரமித்து சாலைகள் அமைப்பது மிக மோசமான விளைவுகளையே தரும். ஆற்றுக்குள் சாலை அமைக்கும் பணிகளை உடனடியாக நிறுத்த வேண்டும்.

குறிப்பாக இந்த விசயத்தில் திருப்பூர் மாவட்ட ஆட்சியர் சி.சமயமூர்த்தியின் கருத்துக்கள் பொருத்தமானவை. "ஆற்றில் எப்போது வேண்டுமானாலும் வெள்ளப் பெருக்கு ஏற்படலாம். அதனால் முழு அகலத்துக்கு ஆறு இருக்கும் வகையில் வழித்தடங்கள் அமைக்க வேண்டும். வெள்ளம் வரும்போது வளைவுப் பகுதிகளில் அரிப்பு ஏற்படும். எனவே அப்பகுதிகளில் போதுமான அகலம் விட்டு, சாலை அமைக்க வேண்டும். ஆற்றுப்பகுதியில் சாலை அமைக்காமல், கரையில் உள்ள தனியார்களிடம் நிலத்தைப் பெற்று சாலை அமைக்க வேண்டும். அப்போது தான் பொதுப்பணித் துறை நடவடிக்கையால் பாதிப்பு ஏற்படாமல் இருக்கும்." (தினமலர் 11.3.2010)

மதுரை மாநகரில் வைகை ஆற்றின் கரைகளில் சாலைகள் அமைக்கப்பட்டுள்ளன. ஆனால் அந்த சாலை ஆற்றின் அகலத்தைக் குறுக்காமல் கரையோரங்களில் அமைக்கப்பட்டுள்ளன. அத்துடன் ஆற்றங்கரை குறுகலான பகுதிகளில் தூண்கள் (பில்லர்) அமைத்து அதன் மீது சாலை ஏற்படுத்தப்பட்டு வருகிறது. வைகை அனுபவத்தை இங்கும் பின்பற்றலாம். சாலைகளை அமைப்பதற்கு முன்பாக எல்லைகளை வரையறுக்க வேண்டும்.

செய்யவேண்டியது என்ன?

நொய்யலாறு சீரமைக்கப்பட வேண்டுமென நாம் விரும்புகிறோம். அப்படிச் செய்வதென்பது, அதன் ஜீவனை மீட்பதாகும்.

ஆற்றோரம் மூன்று விதமான ஆக்கிரமிப்புகள் உள்ளன. அனைத்து ஆக்கிரமிப்புகளையும் முழுமையாக அகற்ற வேண்டும்
ஆற்றோரம் வசிக்கும் மக்களின் குடியிருப்புகளை அகற்றும்போது அவர்களுக்கு தகுந்த மாற்று இடம் கொடுப்பதுடன், அந்த இடத்தில் கலைஞர் வீட்டு வசதித் திட்டத்தில் முன்னுரிமை அடிப்படையில் காங்கிரீட் வீடுகள் கட்டித் தர வேண்டும்.
தனியார் ஆக்கிரமிப்புகளை எவ்வித பாரபட்சமும் இல்லாமல் முழுமையாக அகற்ற வேண்டும்.
அரசுத் துறை ஆக்கிரமிப்புகளையும் அகற்றிட வேண்டும்.
ஆற்றிலும், ஆற்றங்கரைகளிலும் கோழி, பன்றி, மாடு உள்ளிட்ட இறைச்சிக் கழிவுகளைக் கொட்டுவதை முற்றிலும் தடுத்திட வேண்டும்.
நகரிலும், சுற்று வட்டாரப் பகுதிகளில் இருந்து வெளியேற்றப்படும் கழிவுநீரை மையப்படுத்தப்பட்ட சுத்திகரிப்பு நிலையம் மூலம் முழுமையாக சுத்திகரித்து ஆற்றில் விட திட்டமிட வேண்டும்.
கரையோரம் மண் அரிப்பைத் தடுப்பதற்கு ஆற்றின் நீரோட்டத்துக்கு பாதிப்பில்லாமலும், அகலத்தைக் குறுக்காமலும் தடுப்புச் சுவர் அமைப்பதுடன், ஆற்றோர மரங்கள் மற்றும் தாவரங்களை அமைத்துப் பராமரிக்க வேண்டும்.

இதுகுறித்து மாவட்ட நிர்வாகமும், பொதுப்பணித்துறையும், ஆரோக்கியமான தலையீடுகளை மேற்கொள்ள வேண்டும். அறிவியல் அடிப்படையிலும், தொலைநோக்குடனும் பொது விவாதத்தை ஏற்படுத்தி, சமூகப் பொறுப்புணர்வோடு பணிகளை மேற்கொள்வது மிக அவசியம்.